Savali a Faiaoga Asiasi
Uelefea
Suesue ma le agaga tatalo i mea nei, ma pe a talafeagai ai, ia talanoaina faatasi ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga. Mo nisi faamatalaga, alu i le reliefsociety.lds.org.
Faatuatua, Aiga, Toomaga
O faamoemoega o le uelefea a le Ekalesia o le fesoasoani atu lea i tagata o le ekalesia ia ola faalagolago ia i latou lava, ia tausia e matitiva ma e le tagolima, ma tuuina atu ia auaunaga. O le uelefea e totonugalemu i le galuega a le Aualofa. Ua aoao mai Peresitene Henry B. Eyring, Fesoasoani Muamua i le Au Peresitene Sili e faapea:
“Sa saunia lava e [le Alii] mai lava i le amataga o aso ia auala mo Ona soo e fesoasoani atu ai. Ua Ia valaauliaina Ana fanau ia faapaiaina o latou taimi, o a latou meatotino, ma i latou lava e aufaatasi ai ma Ia i le tautuaina o isi. …
“Ua ia valaaulia ma poloaiina i tatou ina ia auai i Lana galuega e sii a’e i latou o loo manaomia le fesoasoani. Ua tatou osia se feagaiga e faia lena mea, i le vai o le papatisoga ma totonu o malumalu paia o le Atua. Tatou te faafouina le feagaiga i Aso Sa pe a tatou aai ma feinu i le faamanatuga.”1
I lalo o le taitaiga a le epikopo po o le peresitene o le paranesi, e fesoasoani atu ai taitai i le lotoifale i le uelefea faaleagaga ma faaletino. O avanoa e auauna atu ai e tele lava ina amata i faiaoga asiasi o e e saili atu i musumusuga ia iloa le auala e tali atu ai i manaoga o uso taitasi latou te asia.
Mai Tusitusiga Paia
Luka 10:25–37; Iakopo 1:27; Mosaea 4:26; 18:8–11; Mataupu Faavae ma Feagaiga 104:18
Mai lo Tatou Talafaasolopito
I le aso 9 o Iuni, 1842, sa faatonuina ai e le Perofeta o Iosefa Samita ia tuafafine i le Aualofa ia fai se “toomaga mo e matitiva” ma ia “laveai agaga.”2 O loo i ai pea nei sini i le loto o le Aualofa ma o loo faailoaina i la latou mautauave, “E Le Uma le Alofa” (1 Korinito 13:8).
O le peresitene aoao lona lima o le Aualofa o Uso Emmeline B Wells , ma ona fesoasoani sa faavaeina lenei mautauave i le 1913 e avea ma se faamanatu o a tatou mataupu faavae autu: “Matou te tautino atu o lo matou faamoemoega o le … pipiimau i aoaoga musuia a le Perofeta o Iosefa Samita ina ua ia faaalia mai le fuafuaga lea e faamanaina ai tamaitai e ala i le valaauga o le perisitua, e tuuvaega i faalapotopotoga talafeagai mo le faamoemoe e auauna atu ai i e mamai, fesoasoani i e le tagolima, faamafanafana i e ua pulapula lagoto le soifua, lapatai i e ta’umamaina ma fesoasoani atu i e ua matuaoti.3
O le taimi nei ua aapa atu le Aualofa i le lalolagi atoa a o faalautele atu e tuafafine le alofa mama, le alofa le pona o Keriso, i o latou tuaoi (tagai Moronae 7:46–47).