Faatino Lelei Lau Vaega
Mai se faeasaite a le Ofisa o Aoga a le Ekalesia mo talavou matutua na tuuina atu i le Iunivesite o Polika Iaga–Idaho i le aso 4 Mati, 2012. Mo le anotusi atoa i le Igilisi, asiasi lds.org/broadcasts/archive/ces-devotionals/2012/01?lang=eng.
Ia amiotonu. Fausia se aiga. Saili se auala talafeagai e tusia ai. Auauna atu e pei ona valaauina ai. Saunia e feiloai ma le Atua.
Sa masani lava on faamatalaina e Peresitene David O. McKay (1873–1970) se tala o se mea na tupu a o avea o ia ma se faifeautalai na auauna atu i Sikotilani. Sa ia lagonaina le misia o lona aiga ina ua mavae le i ai i le misiona mo na o se taimi puupuu ma faaalu ni nai itula e matamata ai i le Maota i Castle na lata ane. Ina ua la foi ane ma lana soa mai le asiasi atu i le maota, sa la pasia se fale lea sa i ai i luga a’e o le faitotoa se maa na vaneina ai ni upu o se upusii, e masani ona iloa ai ia Siekisipia, lea na faitauina, “Po o Ai Lava Lou Ituaiga Tagata, Faatino Lelei Lau Vaega.”
O le ta’ua ai o lenei aafiaga, na saunoa ai Peresitene MaKei: “Sa ou fai ifo ia te au lava, po o le Agaga i totonu ia te au, ‘O oe o se tagata o le Ekalesia a Iesu Keriso o le Au Paia o Aso e Gata Ai. E sili atu nai lo lena, ua e i ai iinei o se sui o le Alii o Iesu Keriso. Ua e taliaina le tiutetauave e avea ma se sui o le Ekalesia.’ Ona ou mafaufau lea [e uiga] i le mea na ma faia i lena taeao. Na ma matamata solo; na ma maua ai ni aoaoga ma ni faamatalaga anamua, e moni, ma sa ou matuai fiafia lava i ai. … Ae peitai, sa le o le galuega lena faafaifeautalai. … Sa ou taliaina le savali na tuuina mai ia te au i lena maa, ma mai lena lava taimi na ma taumafai ai e fai le ma vaega i le avea ai ma faifeautalai i Sikotilani.”1
Na matuai taua lenei savali ma sa tele sona aafiaga ia te ia o lea na faaaoga ai e Peresitene MaKei e avea ma se uunaiga mo lona soifuaga atoa. Sa filifili o ia po o le a lava se tiutetauave sa na maua, o le a ia faia le mea sili na te mafaia.
Aloese mai le Faia o ni Uiga e le Masani Ai
I se vaaiga i le faamoemoega tele mo le lelei o outou o tupulaga lalovaoa o le Ekalesia, o a ni o’u popolega mo lo outou lumanai? O le a se fautuaga e mafai ona ou tuuina atu ia te outou? Muamua, o le a e feagai ma ni uunaiga maoae e fai ni uiga e le masani ai—e oo i le faia o se ufimata—ma avea ai ma se tasi e le atagia atu ai lou tagata moni po o le tagata foi e manao e avea ai.
I popofou o le talafaasolopito o le Ekalesia, sa nonofo le Perofeta o Iosefa, o Ema, ma la laua masaga e 11-masina le matutua, o Iosefa ma Sulia, i Hiram, Ohaio, i le fale o John ma Alice Johnson. O tamaiti uma e toalua sa mamai i le misela. Sa momoe Iosefa ma lona atalii laitiiti i se moega faiuili e toso mai lalo o se isi moega, e lata i le faitotoa pito i luma.
I se tasi o po, na feosoi mai ai i le faitotoa se vaega o alii na vali uli o latou foliga, ma toso le Perofeta i fafo, lea na latou sasaina ai o ia ma sasaa le ta i o laua luga ma Sini Rikitone.
O le vaega aupito leaga o lenei osofaiga, o le taia ai o Iosefa laitiiti i le maluluina o le po ma aafia ai i se fulū ogaoga ina ua toso ese atu lona tamā. O se taunuuga, na oti o ia i ni nai aso mulimuli ane.2
O i latou na auai i le Fasiotiina o le Perofeta ma lona uso o Ailama na valiina foi o latou foliga e nanā ai o latou tagata moni.3
I lo tatou vaitaimi, lea ua faigofie atu ai nai lo se isi lava taimi le nanāina o tatou tagata moni, e i ai ni mataupu faavae taua o aofia ai i le le faia o se ufimata ma le “ia tutumau i faatuatuaga … ua faapea ona ma’umau ai soifua o e ua maliufasia.”4
O se tasi o ou puipuiga aupito sili e faasaga i le faia o filifiliga le lelei, o le lē faia lea o soo se ufimata o le lē faailoaina o le igoa. Afai e i ai se taimi e te manao ai e faia lea tulaga, faamolemole ia iloa o se faailoga ogaoga lea o le tulaga matautia ma o se tasi o meafaigaluega a le fili e faaoso ai oe e faia se mea e le tatau ona e faia.
O se mea masani i lenei vaitaimi le natiaina o le tulaga moni o se tasi pe a tusia ni fesootaiga le fiafia, faatiga, faailogalanu i luga o le initoneti. O nisi latou te ta’ua o le afi musaesae.
Na tusia e le Aposetolo o Paulo:
“Aua ne’i faaseseina outou: o le feoai ma e amio leaga e leaga ai amio lelei.
“Ina ala mai ia i le amiotonu, a e aua ne’i agasala; auā ua pouliuli nisi i la le Atua” (1 Korinito 15:33–34).
Ua manino lava o fesootaiga faatiapolo e le na o se tulaga o le le mafaufau. Afai e faia e le Au Paia o Aso e Gata Ai, e mafai ona matua aafia ai i latou e le o i ai se malamalama e uiga i le Atua po o se molimau e uiga i le Faaola.
O soo se faaaogaaga o le initoneti e soona fai, faaleaga ai se igoa o se tasi, po o le tuuina ai o se tagata i se malamalama leaga, o se faiga faataumaoi. O le mea ua tatou vaaia i totonu o atunuu, pe a faaaogaina e tagata ufimata o le lē faailoaina o igoa, ua sili atu ona latou auai i lenei ituaiga amioga, lea e matua faataumaoia ai aoaoga faalemalo. E faapea foi ona solia ai mataupu faavae autu na aoaoina e le Faaola.
Na faamalamalama mai e le Faaola e le’i sau o Ia ina ia faasala i le lalolagi, ae e laveai le lalolagi. Ona Ia faamalamalama mai lea o le uiga o le faasala:
“O le faasala foi lenei, ua oo mai le malamalama i le lalolagi, a o tagata e sili lo latou manao i le pouliuli i lo le malamalama aua e leaga a latou amio.
“Aua o i latou uma o e fai mea leaga e inoino i latou i le malamalama, e le o mai foi i le malamalama, nei faailoa a latou amio.
“A o le ua faamaoni ana mea e fai, e sau lava o ia i le malamalama, ia faaalia ana amio ina ua tatau i le Atua” (Ioane 3:19–21; tagai foi i le fuaiupu 17–18).
O tagata amiotonu e le manaomia le faia o ufimata e natia ai o latou faasinomaga.
Ia Faia e Tusa ma ou Talitonuga Moni
E te faia e tusa ai ma ou talitonuga moni e ala i le faaaluina o lou taimi i mea o le a fausia ai ma atiina ae ai lou tagata ma fesoasoani e te avea atili ai e faapei o Keriso. Ou te faamoemoe o le a leai se tasi o outou e vaai atu i le olaga ua na o se mea malie ma taaloga, ae o se taimi “e saunia ai e feiloai ma le Atua” (Alema 34:32).
O se faataitaiga matagofie o le faia o lau vaega ma faaaoga ma le tatau o le taimi e sau mai le soifuaga o Elder L. Tom Perry o le Korama a Aposetolo e Toasefululua, i le taimi, a o avea ma se [fitafita o le] malini, sa avea o ia ma se vaega o le fitafita a le I.S. lea na i ai i Iapani i le faaiuga o le Taua Lona II a le Lalolagi. Na faasoa mai e Elder Perry lenei tala ina ua ia faamauina lana molimau faapitoa i le Faaola.
“O au o se tasi o uluai Marini na tuvae i le pa’umatu o Iapani ina ua uma ona sainia le feagaiga o le filemu i le mae’a ai o le Taua Lona II a le Lalolagi. A o matou ulu atu i le aai ua faatafunaina o Nagasaki, sa o se tasi o aafiaga e sili ona faanoanoa o lo’u olaga. Sa matua faataumaoia se vaega tele o le aai. E lei tatanuina nisi o tagata oti. I le avea ai ma ni fitafita e puipuia nofoaga na manumalo ai, sa matou faatutuina nofoaga e faamautu ai ma matou galulue loa.
“Sa matua matautia le tulaga, ma e toaitiiti i matou na mananao e foai tele atu. Sa matou o i le failotu o la matou vaega ma talosagaina se faatagaga e fesoasoani ai i le toe fausiaina o falesa Kerisiano. Ona o puipuiga a le malo i le taimi o le taua, o lea na toetoe ai lava ina le toe faaaogaina nei falesa. Sa matua faaleagaina lava nai o latou fale na totoe. Sa volenitia atu se vaega o i matou e toe lipea ma toe fai simā o nei falesa i o matou taimi avanoa, ina ia mafai ai ona avanoa e toe fai ai a latou tapuaiga faa-Kerisiano.
“… Sa matou mauaina ia faifeau sa le mafai ona fai la latou tautua i tausaga o le taua ma faamalosiau atu ia i latou e toe foi i o latou pulelaa. Sa maoae so matou aafiaga ma nei tagata, a o latou toe oo i le saolotoga e faatino ai o latou talitonuga faa-Kerisiano.
“Sa i ai se mea na tupu a o matou tuua Nagasaki ae toe foi atu i aiga, o le a ou manatuaina pea lava. A o matou tulioso i le nofoaafi matou te o ai e pue le vaa e foi ai i le aiga, sa taufaifai mai le toatele o isi malini ia i matou. Sa latou faatasi ai ma a latou uo teine ma [sa] latou faamavae atu i ai. Sa talie mai ia i matou ma fai mai ua matou misia le malie o le i ai i Iapani. Na matou faama’imauina o matou taimi e faigaluega ai ma faasimā puipui.
“A o faifai tetele la latou taufaalilili, sa manu a’e i si mati’e laitiiti i talaane o le nofoaga o nofoaafi pe tusa ma le 200 tagata Kerisiano maoae Iapani mai nei falesa sa matou lipeaina, ma pepese mai i le ‘Savali i Luma le Autau Kerisiano.’ Na latou o mai ma la’u mai meaalofa mo i matou. Ona fai lea o la latou laina i autafa o le ala o le nofoaafi, ma a o amata solosolo malie ese le nofoaafi, sa matou aapa atu ma pa’i atu i o latou tamatamai lima a o matou malaga ese atu. Sa matou le magagana; sa matua o’otia o matou lagona. Ae sa matou faafetai ona sa mafai ona matou fesoasoani i sina ala itiiti e toefaatuina le faa-Kerisiano i se atunuu ina ua mavae le taua.”5
Faamolemole ia mafaufau loloto ma ia taulamua i le filifilia o auala e faaaoga ai lou taimi. E pei ona outou tagai i ai mai le faataitaiga a Elder Perry, ou te le o talanoa atu e uiga i le faaalialia o lau tapuaiga po o le faataga faamaoni. E mafai ona faamaasiasi ai oe ma le Ekalesia. O loo ou talanoa atu e uiga i lou avea ma tagata e tatau ona avea ai oe.
Faatutu ni Sini Talafeagai
O lau fautuaga lona tolu e faatatau i nisi o sini e tatau ona e mafaufau i ai. Pe tusa o le taimi lea na i ai Elder Perry i Iapani ma le vaega o malini, sa auauna atu ai foi ia Peresitene Boyd K. Packer, le Peresitene o le Korama a Aposetolo e Toasefululua, i Iapani i le vaega o le ea fosi i le faaiuga o le Taua Lona II a le Lalolagi.
I le 2004, sa matou malaga faatasi ai ma Peresitene Packer ma isi i Iapani. Sa ia maua se avanoa e toe faamanatu ai nisi o mea sa ia faia ma tomanatu ai i nisi o aafiaga ma faaiuga na ia faia i lena taimi. Faatasi ai ma lana faatagaga, ou te faasoa atu ai nisi o ona manatu ma lagona.
Na faamatalaina e Peresitene Packer ni aafiaga na tutupu i se motu e le mamao mai le talafatai o Okinawa. Na te mafaufau i lenei mea o lana mauga i le vaomatua. O lana tapenaga patino ma feiloaiga ma isi tagata o le ekalesia na atili loloto ai lona talitonuga i aoaoga a le talalelei. O le mea na te lei mauaina o le faamaoniga—le malamalama mautinoa i mea ua uma ona ia lagona e moni.
O lē na tusia le talaaga o le soifuaga o Peresitene Packer ua ia iloa le mea na tutupu: “E ese mai i le faamaoniga o le filemu na ia sailia, sa faafesagai tonu o ia ma le aasa o le taua e faasaga i tagata lē sala. O le sailia o se nofoaga filemu ma se taimi e mafaufau ai, na ia a’e ai, i se tasi o aso, i se maupu’epu’e i luga ae o le sami. O iina na ia maua ai ni toega o se fale a se faifaatoaga na faaleagaina, o lana faatoaga umala ua tuulafoaia na lata ane i ai. Ma sa ia vaaia i le lotolotoi o laau ua pepē le taatitia ai o ni tino maliliu o se tina na fasiotia ma lana fanau e toalua. O se vaaiga na faatumulia ai o ia i le faanoanoa loloto na milo faatasi ai ma lagona o le alofa mo lona lava aiga ma aiga uma.”6
Mulimuli ane sa alu o ia i totonu o se fale le tumau, lea sa ia manatunatu ai, mafaufau loloto, ma tatalo ai. I le toe tepa i tua i lenei mea na tupu, na faamatala ai e Peresitene Packer le mea ou te ta’uina o se faamaoniga o se aafiaga faaleagaga. Sa musuia o ia i le mea e tatau ona ia faia i lona olaga. E moni, e le’i i ai sona manatu o le a valaauina o ia i le valaauga maualuga ma paia o loo ia umia i le taimi nei. O lana vaaiga mamao sa fia avea ma se faiaoga, e faamamafaina atu aoaoga a le Faaola. Sa tonu ia te ia o le a ia ola i se olaga amiotonu.
Sa oo atu ia te ia i se ala loloto e faapea, o le a tatau ai ona su’e sana avā amiotonu ma o le a la tausia faatasi se aiga toatele. Na silafia e lenei fitafita talavou o lana matātā filifilia o le a tuuina mai ai se taui talafeagai, ma o lana soa lelei o le a manaomia ona la tausoaina faatasi ia mea e tatau ona faamuamua ma ia sauni e ola e aunoa ma nisi mea o le lalolagi. O Sister Donna Packer sa, ma, mo Peresitene Packer, o le soa tonu lava lea. E le’i i ai lava se taimi na lava ai se la tupe faasili, peitai e le’i ai lava se mea na la lagonaina ai le mativa. Na la tausia se fanau e toa 10, ma sa la ositaulaga. Ua toa 60 nei fanau a le la fanau ma a latou fanau e silia ma le 80.
Ua ou faasoaina atu lenei tala moni ona o le tele o taimi e faavae ai a tatou sini i mea e faatāūa e le lalolagi. O mea e taua e matuai faigofie lava mo tagata o le ekalesia o e ua mauaina sauniga faaola. Ia amiotonu. Fausia se aiga. Saili se auala talafeagai e tausia ai. Auauna atu ai e pei ona valaauina ai. Saunia e feiloai ma le Atua.
Na aoao mai le Faaola e faapea “e le ola se tasi i le tele o ana mea ua ia te ia” (Luka 12:15).
Fausia Lou Atunuu ma le Alalafaga
E le gata i uiga o le tagata lava ia, uiga auau mama, ma faaiuga, afai o le a avea outou ma tupulaga e tatau ona avea ai, o le a outou fausia atunuu ma alalafaga o loo outou nonofo ai. O le a manaomia ona puipui e lau tupulaga le amiotonu ma le saolotoga o tapuaiga. O le tofi o tagata Kerisiano-Iutaia ua tatou mautofi ai e le gata e taua ae e taua foi i le fuafuaga a lo tatou Tama oi le Lagi. E tatau ona tatou faasaosaoina mo tupulaga o le lumanai. E tatau ona tatou auai faatasi ma tagata lelei, e aofia ai i latou o faatuatuaga uma—ae maise lava o i latou o e lagonaina le tali atu i le Atua mo a latou amioga. O tagata nei o le a malamalama i le fautuaga e faapea “po o ai lava lou ituaiga tagata, faatino lelei lau vaega.” O le manuia o le faaleleia o tulaga faatauaina o tagata Kerisiano-Iutaia ma le saolotoga o tapuaiga, o le a faailoga ai la outou tupulaga o le tupulaga maoae e tatau ona i ai.
Faatasi ai ma luitau o i ai i le lalolagi i nei ona po, ua faapitoa ai le popole o le Au Peresitene Sili ma le Korama a Aposetolo e Toasefululua ina ia outou auai ma le tatau i faiga faaupufai i totonu o le atunuu o loo e aumau ai. E faavaeluatai le Ekalesia i tauvaga faaupufai ma e le lagolagoina ni sui po o ni pati. Ae peitai, matou te faamoemoe, o le a auai atoatoa o tatou tagata i le lagolagoina o sui ma pati o a latou lava filifiliga, e faavae i mataupu faavae ia o le a puipuia ai faigamalo lelei. Ua manino lava a tatou aoaoga faavae: o i latou o e e lelei, “faamaoni … atamamai … e tatau ona outou vaai ia sapasapaia” (MF&F 98:10).
E i ai lo matou talitonuga ia te outou. E talitonu faamaoni ia taitai o le Ekalesia e mafai ona sili atu lo outou fausiaina o le malo nai lo o se isi augatupulaga ua mavae atu. E le gata ua outou mauaina lo matou alofa ma le talitonuga, ae faapea foi a matou tatalo ma faamanuiaga. Ua matou iloaina o le manuia o la outou augatupulaga e taua i le faatuina faifaipea o le Ekalesia ma le tuputupu a’e o le malo. Matou te tatalo ina ia outou faatino lelei la outou vaega, a o outou aloese mai le faiga o se ufimata, galue e tusa ai ma lou faasinomaga moni, seti ni sini talafeagai, ma fausia lou atunuu ma le alalafaga.
Ata o Elder Quentin L. Cook na pueina e Craig Dimond; ata na tusia e Scott Davis
O Elder L. Tom Perry na faatinoina lelei lana vaega ao i ai i Iapani.
Ata pue o Elder L. Tom Perry © IRI
O Peresitene Boyd K. Packer ua faamanuiaina mo le setiina o ni sini amiotonu.
Ata pue o Peresitene Boyd K. Packer, e le mafai ona kopiina