Nao Le Ataata Lava ma Fai Atu Leai
E alala le tusitala i Metro Manila, Filipaina.
Na ou teteeina ni ofo e inu se pia, ae lea ua ofo mai e le peresitene o le kamupani ia te au se ipu uaina.
Ata na tusia e Sudi McCollan
I se tasi taumafanafana, sa ou auai ai i se galuega faataitai i le motu i Bicol, Filipaina. Sa matagofie le vaaiga i le vasa, ma sa ou tulimatai atu i taeao taitasi.
Ae peitai, sa ou fā’atu i afiafi. O le taimi lena e amata ai ona inupia ma fai pati a tagata e i totonu o le tolauapiga. Sa fai soo valaaulia i ia pati, ma e tatau ona matou o i ai ma au uo faigaluega, talu ai o le le auai o le le faaaloalo lea.
O le pati muamua o se pati faafeiloai lea mo tagata faigaluega faataitai fou. Sa ou fefe e auai atu i ai, aua sa ou mautinoa lava o le a latou ofoina mai ia i matou ni pia ma ou te le iloa pe faapefea ona teena. Sa ou valaau i se uo i la’u uarota i le matou nuu, ma sa ia tuuina mai ia te au nisi o fautuaga matagofie lea na faateleina ai lo’u talitonu ia te a’u lava.
Ina ua amata le pati, sa latou ofoina mai ia i matou ni pia ae, o le mea na laki ai, e lei faamalosia i matou e inu. Talu ai na taliaina e au uo faigaluega lo’u tulaga ou te le inu pia, o le teenaina o isi ofo na faigofie nei mo a’u—vagana ai se tasi o po. I se tasi o pati, na sau ai le peresitene o le kamupani. Sa ia uumaia se fagu lambanog (o se uaina i le lotoifale e fai i le popo). E lei leva ona ia taunuu mai, ae ou vaai o ia ligiina ni uaina. Ona ia faapea mai lea, “E tatau ona tou aoao i le auala e inu ai” ma tuu atu le ipu i se tasi o le au faigaluega faataitai. Sa vave ona ia inuina.
Sa amata ona tātāvale lo’u fatu. E le toe umi ae oo i lou taimi. Sa ou musumusu lemu ia te au lava, “o le a ou le inuina. O le a ou le inuina.” Ona ou vaai atu lea ua faaloaloa mai e le peresitene le ipu uaina ia te a’u. Ou te lei iloa le mea e fai. Na taufaitilotilo mai au uo faigaluega faataitai ia te au, ma faatalitali po o le a la’u mea o le a fai. Sa ou ataata atu i le peresitene ma fai atu ma le lotomaualalo, “Faamalie atu i lau susuga, ae ou te le inu ava.”
Sa ou iloa na le fiafia. Sa ia fesili mai pe aisea ou te le inu ai. Sa ou fai atu, “O au o se Mamona.”
Na fai mai o ia, “Ou te lei faalogo i lena tapuaiga. E foliga mai o se ituaiga o meaai.” Na taliē tagata uma.
Sa ou ataata foi, e le faapea ona o lana tala malie, ae ona na ou iloa sa ou faia le mea sa’o.
E lei toe i ai se tasi na ofo maia ia te au se ava malosi. Peitai sa le’i gata ai le tauemuina, mai foi i a’u lava uo. Na oo lava ina fai mai se tasi sa ou pepelo, ma e le o se mea moni le faapea atu o tagata o le Ekalesia e le inupia. O le taimi lena na ou lagonaina ai ia tulaga mamafatu ia e oo i ai tagata o le Ekalesia.
O lo’u nofo ai i lena motu na aoaoina ai au i le tele o lesona, e le na o le faaakatemia ae faaleagaga foi. Sa ou aoaoina ai atonu e le uma lava ia tauemuga, ae o le a taitaiina pea oe e le Agaga o le Alii e fai le mea sa’o.