Faanatinatiina o le Galuega o le Faaolataga
A o tatou valaauliaina, alolofa atu, ma auauna atu i isi, o le a avea i tatou ma soo moni o Iesu Keriso ma fesoasoani e faanatinati le galuega o le faaolataga.
E ui o loo i ai se naunautaiga e uiga i le galulue o faifeautalai faamisiona i le initoneti ma faamaimoa nisi i falelotu, ae o na suiga ua na o se vaega itiiti lava o le ata tele o le galuega o le faaolataga. O le vaega sili ona taua o le ala tatou te ofi atu ai, i tatou o tagata o le ekalesia, i le ata tele o le galuega o le faaolataga. E le o talosagaina i tatou e auai i se polokalama fou. E na o le uunaia lava o i tatou e avea ma soo moni o Iesu Keriso. O la tatou matafaioi o le faatofuina o i tatou lava ina ia alolofa ma auauna atu ia i latou o siomiaina i tatou—faamafanafana atu i se tagata lua te faigaluega o loo i ai se manaoga, valaaulia a tatou uo i se papatisoga, fesoasoani atu i se tuaoi matua i se galuega o lona fanua, valaauliaina o se tagata ua le o toe malosi mai mo se taumafataga, po o le fesoasoani i se tuaoi i lana talafaasolopito o le aiga. O ni auala masani uma nei ma le fiafia e valaaulia ai ni tagata ua le o toe malolosi mai ma i latou tatou te le o tapuai faatasi i o tatou olaga ma faasolosolo atu ai lava ina ia malamalama i le talalelei. O le fetufaai atu ma i latou i taimi malie ma taimi paia o o latou olaga atonu o se auala sili lea ona lelei e mafai ai e soo se tasi o i tatou “e galulue i lona [Iesu Keriso] tovine ma le faaolataga o agaga o tagata” (MF&F 138:56).
O Le a le Galuega o le Faaolataga?
O le galuega o le faaolataga o le galuega lea a le Tama Faalelagi “ia aumaia le tino ola pea ma le ola faavavau o le tagata” (Mose 1:39). O lenei galuega taua e aofia ai le galuega faamisiona a tagata o le au paia, faatumauina o tagata liliu mai, faatoagaina mai o tagata ua le malolosi mai, galuega o le malumalu ma talafaasolopito o aiga, ma le aoao atu o le talalelei.1 E tele ina tatou mafaufau faapea e le fesootai nei vaega o le talalelei. Ae i le O Le Galuega o le Faaolataga: Faasalalauga mo Taitai i le Lalolagi Atoa i le aso 23 Iuni, 2013, na aoao mai ai Elder Russell M. Nelson o le Korama a Aposetolo e Toasefululua faapea “e le mavavaeina le galuega. E le o ni gaoioiga eseese nei; o vaega uma nei o le galuega o le faaolataga.”2
O le fuaitau “Faanatinatiina o le Galuega o le Faaolataga”—o le igoa o le uepisaite o le faasalalauga (hasteningthework.lds.org)—e faasino i le folafolaga a le Alii: “Faauta, o le a Ou faanatinatiina la’u galuega i lona taimi” (MF&F 88:73).
O sauniga taua o le perisitua—papatisoga, faamauga, faauuina i le perisitua mo alii, ma sauniga o le malumalu—e avea ma ni mea taua o tutupu i o tatou ala i le toe foi atu i lo tatou Tama Faalelagi. Ao tatou auai i le galuega o le faaolataga, ua tatou mulimuli ma uunaia isi e mulimuli i lenei ala o le feagaiga.
Galulue Faatasi Tagata o le Ekalesia ma Faifeautalai Faamisiona i lalo o Ki o le Perisitua
Ua oo mai le taimi e toe taulai atu ai i mataupu faavae autu, o lona uiga i tagata auai o le Ekalesia a le Alii o le valaauina lea ina ia auai ma le atoatoa i Lana galuega o le faaolataga. O peresitene o siteki ma epikopo ua umiaina ki o le galuega faafaifeautalai i a latou iunite o le Ekalesia3 ma fesoasoani atu i tagata e faataunuu le mea e faia e soo moni o Keriso—o le faasoa atu o le malamalama o le talalelei. O peresitene o misiona e umia ki o le perisitua lea e mafai ai ona latou taitaiina le galuega a faifeautalai.4 O faifeautalai faamisiona ua aoaoina e aoao atu i latou o e ua saunia e talia le talalelei. Latou te fesoasoani i tagata ma le galuega faamisiona a le au paia, po o le isi foi itu. O faifeautalai faamisiona ma faifeautalai a le uarota o ni paaga i le aumaia o le talalelei i olaga o i latou ua saunia e le Alii e taliaina.
I le taimi o le faasalalauga, saunoa atu ai Peresitene Thomas S. Monson: “O le taimi lenei mo tagata o le ekalesia ma faifeautalai e o mai faatasi ai, e galueaiina le tovine a le Alii ma aumai agaga ia te Ia. Ua Ia saunia le anoanoai o auala mo i tatou e faasoa atu ai le talalelei, ma o le a Ia fesoasoani ia i tatou i la tatou galuega pe afai tatou te galulue i le faatuatua e faataunuu Lana galuega.”5
Na saunoa Elder Neil L. Andersen o le Korama a Aposetolo e Toasefululua i le taua o le alofa. Na ia saunoa ai, “Tatou te galulue faatasi i le faatuatua ma le lotogatasi—le faatuatua o le a taialaina e le Alii o tatou laasaga ma le lotogatasi o le tasi ma le isi faatasi ma faifeautalai, lea e faaosofia e le alofa mo Ia, mo le tasi ma le isi, ma mo i latou tatou te auauna i ai.”6
Taulamua ia Aufono a Uarota, Faamaopoopo e Taitai Misiona a Uarota
I lalo o le taitaiga a le epikopo, o le aufono a le uarota e faafaigofieina, lagolagoina, ma faamaopoopoa ia taumafaiga a tagata o le uarota e ala i le fuafuaina ma taitaia le galuega o le faaolataga mo le uarota.7
I le avea ai ma sui o le aufono a le uarota, o le taitai misiona a le uarota e “faamaopoopoa ia taumafaiga a le uarota e saili, aoao atu, ma papatiso tagata sailiili. Na te faamaopoopoina lenei galuega faatasi ai ma le galuega a faifeautalai faamisiona.”8
O le talanoa atu i taitai misiona a le uarota na saunoa ai Elder Nelson faapea: “Fesoasoani [i faifeautalai faamisiona] e faatumu le la api o taimi atofaina i ni taimi atofaina anoa, ina leai so la taimi e tuitui ai i faitotoa e tau saili ni tagata e aoao. … [O oe] o le sootaga fesootai lea i le va o faifeautalai, le aufono a le uarota, ma tagata o le uarota.”9
O Le Fua Moni o le Manuia
I le avea ma Au Paia o Aso e Gata Ai ua faamanuiaina i tatou i le ola ai i lenei vaitaimi ua faanatinatiina ai e le Alii Lana galuega. Talu ai e i ai se faamoemoega a le Atua i le tuuina o i tatou i le lalolagi i lenei vaitaimi, ua ia i tatou le gafatia e faia ai le mea e sili atu nai lo le mea tatou te manatu tatou te mafaia. Pau lava le tulaga ia tatou aapa atu ma le agalelei ma le alofa ia i latou o e manaomia la tatou faauoga ma le fesoasoani, o le a tatou le toilalo. O faamanuiaga a faifeautalai e oo mai i le mulimuli i uunaiga lea e tape mai i o tatou mafaufau ma loto ma le na o le valaauliaina o isi i o tatou olaga ua faaogatotonuina i le talalelei. O le valaaulia e faailoga ai le tulaga manuia, e le faapea ona ua papatiso ia tagata pe ua toe malolosi mai i le Lotu. E pei ona saunoa ai Elder Jeffrey R. Holland o le Korama a Aposetolo e Toasefululua e uiga i le autau maoae o faifeautalai ua ulufale nei i le galuega faamisiona: “Ua oo mai le taimi lea e tatau ai ona tatou faapea atu, ‘O lea ua latou o mai.’ E tatau ia i tatou uma ona fuafua mo ma faaaoga lenei punaoa na auina mai i le lagi i se auala sili ona aoga ma talafeagai.”10
O se taimi mo i tatou uma e malamalama manino atili ai i la tatou matafaioi i le faanatinatiina o le galuega o le faaolataga. Ao tatou aveaina le galuega faamisiona a au paia, faatumauina o tagata liliu mai, faatoaaga mai o tagata na le toe malolosi mai, galuega o le malumalu ma talafaasolopito o aiga, ma le aoao atu o le talalelei o se vaega masani faalenatura o o tatou olaga, o le a tatou mauaina le olioli sili ma faaeeina i meaalofa faaleagaga tatou te manaomia e faamalosia ai le Ekalesia i le seneturi lona 21.
Ata na tusia e David Stoker
Ata na tusia e John Luke ma Cody Bell