E Mafai Faapefea ona Avea Au Ma se Faifeautalai Faamanuiaina?
E alala le tusitala i Iuta, ISA.
E tusa lava po o le a le malosi na ma galulue ai ma la’u soa, na teena lava e tagata uma le ma savali. O le a se mea e mafai ona ma faia e avea ai ma ni faifeautalai faamanuiaina?
Na silia laitiiti ma se tausaga talu ona ou i ai i la’u misiona ae ou oo loa i se taimi sili ona faigata. Sa matou i ai tonu lava i le ogatototonu o se vaitau puaoa ma le pogisa—faatoa te’a atu lava le taumalulu ae agai atu i le tautotogo. Ma po o le a lava le malosi na ma galulue ai ma la’u soa, ae o tagata uma lava sa matou talanoa na matuai teena lava le ma savali. Ina ua matou feiloai ma isi faifeautalai, na ma iloa ai o loo agaigai malosi lava a latou galuega. Ou te le’i iloa seisi lava mafuaaga na matua le faamanuiaina ai i maua. Ua umi ona ou i ai i le galuega ua lelei ai la’u tautala i le gagana, o maua ma la’u soa o se uo lelei, ua matou fausiaina ni talitonuga ma tagata o le au paia, ma sa ma taumafai e mulimuli i le Agaga ma usiusitai a’ia’i i tulafono a le misiona.
Ae e tusa lava po o a mea na ma faia, sa ma feagai lava ma le teena i soo se itu. Ina ua mavae vaiaso ma vaiaso o lenei mea, na ou faatagaina ou uiga le lelei e lofituina au. I le taimi o se tasi o ma faiga fuafuaga sa iu ina ou alaga, “O le a le aoga? O le a leai lava se tagata e faalogo ia i ta’ua. Sa na ona faapea mai o la’u soa, o lē na sili atu lona manatu nai lo au, “Tatou te faatutuina sini e faaalia ai lo tatou faatuatua. Tatou te tulitataoina a tatou sini e faitau ai o tatou faamanuiaga.”
A o ou mafaufau loloto i ona manatu, sa ou iloaina ai e sese le metotia lea sa ou faaaogaina e faamasino ai lo’u tulaga faamanuiaina i le avea ai ma se faifeautalai. O loo i ai i le Tala’i La’u Talalelei: O Se Taiala mo le Galuega Faafaifeautalai se lisi o amioga o faifeautalai faamanuiaina,1 ma sa ou iloaina o na amioga e i totonu lava i le puleaga a le faifeautalai. E le mafai ona ou pulea pe e talia e tagata i la’u misiona le savali o le talalelei pe leai, ae e mafai ona ou pulea le ituaiga faifeautalai ou te filifili e avea ai. Na faaali mai e la’u soa ia te au, o le faatuatua malosi atu ia Iesu Keriso ma le agaga faafetai mo Ana faamanuiaga o le a mafai ona ou iloa ai auala ua avea ai au ma se faifeautalai faamanuiaina.
O Le Faatuatua e Faasusulu Atu Ai Vavega
Sa faalotomaulaloina lava au i le iloaina sa vaivai lo’u faatuatua. Sa ou vaavaai mo itu e mafai ona faamalosia ai lo’u faatuatua ma iloa ai, a le ogatasi mea e tusa ai ma le fuafuaga, na ou faatagaina a’u lava ina ia ou lotovaivai. Na ta’ua i le O Le Talai La’u Talalelei: “O le lotovaivai o le a faavaivaia ai lou faatuatua. Afai e te tuu faamaualaloina mea e te faamoemoeina, o le a tuuitiitia foi le lelei o au taumafaiga, o le a vaivai lou naunau, ma o le a matuai faigata ai lava ia te oe ona mulimuli i le Agaga.”2 Sa ou iloa ai na ou faatagaina o ma faafitauli e faavaivaia lo’u faatuatua.
Sa ou amata e ala i le tatalo mo se suiga o le loto ma ia faateleina le faatuatua. Sa ou faalagolago foi i le folafolaga na tuuina mai i le Mamona 9:21: “Soo se tasi e talitonu ia Keriso, ma lē masalosalo i se mea, soo se mea e ole atu ai i le Tama i le suafa o Keriso o le a tuuina mai ia te ia; ma o lenei folafolaga ua mo tagata uma, e oo lava i tuluiga o le lalolagi. O lenei folafolaga na taitaiina atu a’u ia ou tatalo faatauanau atili mo faamanuiaga ma vavega na ma lagona ma la’u soa sa ma manaomiaina, ma faaopoopo atu i taimi uma lava, “Ia faia Lou finagalo. Na fesoasoani nei tatalo ina ia ou taliaina ai fuafuaga e suia faapea ma faalavefau ma le faatuatua sili atu, ma le iloa e tali mai e le aunoa le Tama Faalelagi i tatalo faatuatua—e tusa lava pe oo mai tali i auala tatou te le o faamoemoeina. Sa oo ina mafai ona ou iloaina auala na taitai ai i ma’ua e le Alii i le faagasologa o o maua aso.
A o ou galue ai i le faamalosia o lo’u faatuatua, na ou iloa ai le moni o le itu lelei o le faamatalaga mai le Talai La’u Talalelei: afai e tuu faamaualuga mea e te faamoemoeina, o le a faateleina lou mataalia, o le a tuputupu a’e lou naunau, ma o le a mafai ona e mulimuli lelei atu i le Agaga. Ma le isi, sa sili atu ona ou talitonu o le a lelei mea uma i le galuega faafaifeautalai ma la’u auaunaga faafaifeautalai pe afai e mafai ona ou iloa ma talisapaia ia vavega na tutupu i aso taitasi.
O Le Agaga Faafetai e Aveesea Ai le Fuā
Na amata ona faaali mai e le Alii ia te au sa Ia galueaiina ni vavega mo i ma’ua i aso taitasi—ae sa le mafai ona ou iloaina pe ana ou le faia se taumafaiga magafagafa ina ia [ou] maua le lotofaafetai faamaoni. O le faaalia o le agaga faafetai e sili atu nai lo na o se aga masani lelei po o ni uiga faaaloalo lelei. Ina ua ou faailoa atu le agaga faafetai i le Alii ma isi, na faamalosia atili ai a’u. Sa oo ina ou lagona le fiafia mo isi faifeautalai pe a faamanuiaina i latou nai lo o le fuā (tagai i le Alema 29:14, 16). Sa sili atu ona mafai ona ou taulai atu i mea na ou maua, ma mea na sologa lelei nai lo o mea na ou le mauaina ma faaletonu.
Sa ou aoaoina o le agaga faafetai o le fofō lea o le faatusatusaina o i tatou i isi. O taimi na sa ou le lagona ai le pei o se faifeautalai faamanuiaina, sa masani ona oo mai ona sa ou fai ifo ia te a’u lava, “E le o lelei tele lau faatinoga e pei o i latou la,” po o le, “E sili atu lo latou lelei i le mea lenei nai lo a’u.” Sa ou aoaoina foi e ui o le mamanu a le Alii o le tuuina mai ia i tatou o ni faataitaiga amiotonu e faataitai ma mulimuli ai, ae o le taufaasese a Satani le faaosooso o i tatou e faatusatusa i tatou ma i latou ina ia mafai ai ona iloa lo tatou taua po o le manuia. Ae ua manino lava le Talai La’u Talalelei i lenei mea: “Aloese mai le faatusatusaina o oe i isi faifeautalai ma fuatia taunuuga vaaia o au galuega i a latou foi taumafaiga.”3 Mulimuli ane, sa fesoasoani le agaga faafetai ia te a’u e taumamao ai mai le faamaualuga ma faamanatu mai ia te au o le Alii e pule i Lana galuega. E le tatau ona ou fuā ona na foliga mai sa tele atu le faamanuiaina o o’u uso a faifeautalai.4
O Le Fua Moni o le Manuia
Ae ou te lei mauaina lenei suiga o le manatu, sa ou soona taulai atu i se ituaiga faamanuiaga faapitoa lea na galo ai ia te au ona pupula o’u mata i isi auala na tali mai ai e le Alii a ma’ua tatalo ma faamanuiaina ai la ma’ua galuega faafaifeautalai. Mulimuli ane, na amata ona faamanuia mai e le Alii le galuega faafaifeautalai i lo matou eria i ni auala matagofie ma e le’i mafaufauina. Na ma maua ni tagata na naunau e talia la ma’ua savali, ae o le taimi lena ua ou aoaoina e aua nei fuaina lo’u tulaga faamanuiaina i filifiliga a isi.
Na faasoa mai e Peresitene Gordon B. Hinckley (1910–2008) le fautuaga a se tasi o peresitene o le misiona e uiga i le galuega faafaifeautalai: “Fai le mea sili e te mafaia, lau [taumafaiga] sili, sili ona lelei. Fai au tatalo ma galue malosi ma tuu le seleselega i le Alii.”5 I le Talai La’u Talalelei o loo aoao mai ai se mea e talitutusa lava e uiga i faifeautalai faamanuiaina: “Fai le mea sili e te mafaia ina ia aumai ai agaga ia Keriso, ma saili ma le faamaoni e aoao ma alualu i luma.”6
Afai lava sa ou naunau e salamo, afai lava e mafai ona ou tali atu ma le faamaoni i le Alii sa ou faia le mea sili na ou mafaia, e mafai ona ou lagona le mautinoa sa avea au o se faifeautalai faamanuiaina—e tusa lava pe na talia e tagata la ma’ua savali. I le tele o itu, o le fuatia o lo’u faamanuiaina o se faifeautalai e mafai ona faamasinoina i lo’u naunautai e salamo ma lo’u finafinau e faaauau pea ona galue.
E tele au vavega na faamaumauina i lau api o talaaga mai lenei taimi o la’u misiona. A o ou taumafai ia sili atu ona faamaoni ma lotofaafetai, sa ou maua se vaaiga e sili atu, sa ou aloese mai le lotovaivai, ma sa faateleina lo’u lagonaina o le Agaga i le galuega. Na ou iloa o le mea o loo aoao mai e le Talai La’u Talalelei e moni: “Afai ua e faia le mea sili e te mafaia, atonu e te oo lava i ni tulaga e faanoanoa ai, ae o le a e le faanoanoa ia te oe lava. E mafai ona e lagonaina le mautinoa ua fiafia le Alii pe a e lagonaina le galue o le Agaga e ala atu ia te oe.”7 Ma ina ua ou lagonaina na fiafia le Alii ia te au, na mafai ona ou onosaia soo se tofotofoga.
I le tele o itu, o le fuatia o lo’u faamanuiaina o se faifeautalai e mafai ona faamasinoina i lo’u naunau e salamo ma finafinau e faaauau pea ona galue.
Ata na saunia e Del Benson