“O le a lau tali i tagata lotu ese e fesili mai pe aisea e le ola ai nisi tagata o le Ekalesia i o tatou tulaga faatonuina?”

E ese le matagofie pe afai e ola atoatoa tagata uma o le Ekalesia i le talalelei. E le gata o le a latou fiafia i le tele o faamanuiaga i o latou olaga ae o le a avea ai foi ma faataitaiga maoae ia i latou o siomiaina i latou. Ae o i tatou o ni tagata ola, o lea tatou te toilalo ai i nisi o itu. O le mafuaaga autu e ola atoatoa ai nisi i le talalelei nai lo isi ona e tofu uma lava i tatou ma tulaga o i ai o tatou liliuga ma le malosi o a tatou molimau. Ua tofu maua e i tatou ni tofotofoga eseese ma ni punaoa eseese ma tagata e fesoasoani ia i tatou.

Atonu e le malamalama tagata le lolotu i faaupuga e pei o le “liua” ma le “molimau”, ae o le a latou malamalama e mafai ona filifili tagata taitoatasi i le auala e ola ai. E mafai ona e faamalamalama atu faapea, ua fuafuaina e le Tama Faalelagi ia faapena. Sa Ia tuuina mai ia i tatou lo tatou faitali ina ia mafai ona tatou tutupu ae faaleagaga e ala i le filifiliina o le mea sa’o. Ae na silafia foi e le Tama Faalelagi o tagata uma lava—vagana ai Iesu Keriso—o le a faia ni mea sese, o lea na Ia saunia ai se Faaola mo i tatou. Ona o le Togiola, ua mafai ai ona tatou salamo, faamagaloina, aoao mai ia tatou mea sese, ma agai i luma i le olaga.

E mafai foi ona e faamalamalama atu faapea tatou te le faamasinoina i latou o e e le o mulimuli i tulaga faatonuina o le Ekalesia. Nai lo lena, tatou te taumafai e fesoasoani ia i latou, malamalama i ai, ma ia onosai ia i latou. E ui tatou te le taliaina le agasala, peitai tatou te le faasala i le tagata agasala (tagai i le Ioane 8:11). O loo i ai lava le salamo, mo i tatou uma.

Sailiili i Tusitusiga Paia

O le tali i le fesili e mafai ona maua i tusitusiga paia. Pe a le tausia e tagata poloaiga, e tatau ona tatou aloese mai i le faamasino atu (tagai i le Mataio 7:1). Fai mai le Roma 3:23, “Aua ua agasala tagata uma, ma ua le oo i le viiga mai le Atua.” Ae peitai, e moni e tatau i tagata o le Ekalesia ona taumafai ia usiusitai.

Madison M., 13 tausaga, Texas, ISA

Aoao atu e uiga i le Togiola

Pe a fai mai e tagata ni mea faapena, nai lo le saili masei i tagata e le o mulimuli i tulafono, ou te faaaogaina ia avea ma se avanoa e aoao atu ai e uiga i le Togiola. Ou te tau atu ia i latou e le faapea o i tatou o tagata Mamona ona tatou atoatoa ai lea, ma ua tatou maua le Togiola ina ia mafai ai ona tatou salamo i a tatou agasala ma foia ai na mea sese. E masani lava ona tatalaina e lenei mea le faitotoa i le anoano o isi fesili.

Jayde H., 16 tausaga, Oregon, ISA

Ua Aoao Mai i Tatou e le Ekalesia e Fai Mea Lelei

E pei lava foi o isi tagata, e feagai foi tagata o le Ekalesia ma luitau ma faaosoosoga. E tofu i tatou uma ma vaivaiga, ae e le faapea ai e le moni lenei Ekalesia. O le Ekalesia lenei a Iesu Keriso, lea o loo fesoasoani i tagata ia iloa le talalelei moni ma ia maua le faaeaga. O le tagata natura lea e le usitai i poloaiga (tagai i le Mosaea 3:19), ma e le o se sese o le Ekalesia. Ua aoaoina i tatou e le Ekalesia ia faia galuega lelei. Ae ua tofu i tatou ma se filifiliga.

Lavinia S., 19 tausaga, Bulacan, Filipaina

O Tulaga Faatauaina E mo Lo Tatou Fiafia

E fetaui tonu lava lenei fesili mo au aua ua ou iloa nisi o tagata o e ua faia ni filifiliga ua aveesea ai i latou mai le talalelei. Ua aumai e le Alii poloaiga ia i tatou mo lo tatou fiafia ma ia “aumai le tino ola pea ma le ola faavavau o le tagata” (Mose 1:39). E finagalo le Alii ia tatou toe foi atu ia te Ia; ae peitai, ua Ia finagalo ia tatou faia a tatou lava filifiliga. O le mafuaaga lena e le ola ai nisi o tagata i o tatou tulaga faatonuina. O tulaga faatonuina e fesoasoani ia te au lava ia aua ua ou iloa ua tuuina mai e le Tama Faalelagi ia te au ina ia mafai ai ona ou toe foi atu ma nonofo faatasi ma Ia ma maua le fiafia. O ni faamaoniga o Lona alofa mo au.

Morgane D., 18 tausaga, Languedoc-Roussillon, Farani

Avea ma se Faataitaiga

O lenei Ekalesia e taua tele e fesoasoani ai ia i tatou e faataunuu ia poloaiga a lo tatou Tama Faalelagi, ma toe mau faatasi ma Ia. Ae e le faapea la a auai se tagata i Ekalesia o le a avea ai pea lava pea o ia ma se tagata lelei. Tagai foi i lo tatou lalolagi i aso nei, ua tumu i le amioleaga ma mea inosia, e ui lava ua tumu le lalolagi i tagata o e na filifili e mulimuli ia Iesu Keriso i le muai olaga. Ou te manatu o le mea sili e mafai ona tatou faia o le faia o se faataitaiga mo a tatou uo.

Kaden S., 15 tausaga, Iuta, ISA

Tatalo mo i Latou ma Asiasi ia i Latou

O tagata o le ekalesia o e e le o ola i o tatou tulaga faatonuina atonu e le o i ai se molimau o taulai atu ia Iesu Keriso. E tatau ona tatou tatalo mo i latou, ina ia latou saili le taitaiga a le Agaga ma ia mafai ona latou maua ni a latou lava molimau. E tatau ona tatou asiasi atu i nei tagata ma fesoasoani ia i latou ia o mai ia Keriso.

Andrea C., 13 tausaga, Lima, Peru

Ola Ai i o Tatou Tulaga Faatonuina

E pei lava foi o se isi faalapotopotoga po o ekalesia, o loo i ai ni tagata ua sili atu ona tuuto pe itiiti foi le tuuto. E na o lo tatou ola lava i o tatou tulaga faatonuina i le mea sili tatou te mafaia ma faamoemoe ma tatalo o le a faia foi e isi.

Maren S., 16 tausaga, Arisona, ISA