O Kamila mai le Aai o Niu Ioka

O Kamila e iva tausaga le matua ma e toatele ia o ana uo. “O le mea ou te fiafia ai i au uo ona e eseese uma lava i latou,” o lana tala lea. “Latou te o mai mai nofoaga eseese, ma e eseese auala latou te faia ai ia mea.” E fiafia Kamila e aoao mai ana uo ni mea lelei, ma e fiafia e faasoa atu ni mea ia i latou. O le mea e sili na ia faasoa atu i se uo o le talalelei lea. Ina ua uma ona faasoa atu le mataupu faavae muamua o le faatuatua i lana uo o Yailin, na valaaulia e Kamila le aiga o lana uo e feiloai i faifeautalai. Na aoao foi e Kamila Yailin i le auala e tatalo ai. Ua avea nei Yailin ma lona tina o ni tagata o le Ekalesia.

O pese ou te fiafia lava i ai o le “O Au o se Atalii o le Atua” ma le “E Mafai Ona Faavavau Aiga.” O le mau ou te fiafia lava i ai o le Mataupu Faavae ma Feagaiga 19:23: “Aoao mai ia te au, ma faalogo mai i a’u upu; savali i le agamalu o lo’u Agaga, ma o le a e maua ai le filemu ia te au.” O lenei mau e masani lava ona faafiafiaina au pe a ou faanoanoa.

Na papatiso la’u uo o Yailin i le 2011. Ou te fiafia e mafai ona ma o faatasi i le lotu. O loo ou fesoasoani ia te ia e tauloto le Mataupu Faavae o le Faatuatua. O loo ma galulue i le mataupu faavae o le faatuatua lona iva.

O lou tina ma lou tama e o mai mai le Ripapelika Tominika. Masalo o le mafuaaga lena ou te fiafia ai i le araisa ma pi ma le moa. E faamanatu maia ia te au le mea na o mai ai lou aiga.

E toalima tagata i lou aiga. O lou uso, o Emily, o le a papatiso ma faamauina ia Tesema. O lou tuagane, o Victor, e faaigoa i le igoa o lou tama. E lei i ai ni au fagafao, ae o lea ou te mafaufau e aumai se laumei. Ou te fiafia i laumei aua e aulelei ma e tuai le latou o, o lea e le sosola ese ai.

Ou te fiafia i le tala ia Kapeteni Moronae i le Tusi a Mamona. Na faitauina e lo’u tama i le afiafi faaleaiga, ma na uunaia ai au e fai sau ia lava fua. E faamanatu mai e lau fua ia te au po o ai au ma o loo faatasi mai pea e le aunoa le Tama Faalelagai ia te au.

Ata pue mai faaaloaloga a le aiga, sei vagana ua faailoa mai; atapue o le Faatagata o le Saolotoga © Getty Images; O Mai i Luma, saunia e Walter Rane, faaaloaloga a le Falemataaga o Talafaasolopito o le Ekalesia.