Avea ma se Tagata o le Filemu
O le malumalu, misiona, ma auaunaga na fesoasoani ia Roger ma lona aiga e agai atu ai i le avea ma se aiga e faavavau.
Na iloa e Roger Randrianarison sa i ai se mea na misi mai le olaga o lona aiga.
“Na ou tatalo i le Atua e fesoasoani mai ia ou maua se mea e taitai ai lo’u aiga,” o lana tala lea. “Sa ia te a’u se naunautaiga e taitai atu lo’u aiga i se mea lelei, se mea o le a taitaiina atu ai i le ala sa’o.”
Sa popole o ia i se auala e tausi ai lana fanau e toatolu—atalii, o Randrianandry ma Sedinirina, ma le afafine, o Nirina. Sa le fiafia o ia ona o le vave o lona ita na oo atu ai i luitau i le aiga. Sa manao o ia e avea ma se matua agalelei.
“Sa ou filifili o au le tagata e tatau ona sui aua na ou vaai i le tagata na avea ai au,” o lana tala lea.
Na gau le pisinisi faufale a Roger i ni nai tausaga ua mavae, ma sa galue o se avetaavale laupesese laitiiti i Antananarivo, Matakasa. I se tasi aso sa ia pikiina ai ni tamaitai faifeautalai se toalua.
“O le taimi lava na oo ai i totonu o le taavale, sa la fesili mai i lo’u igoa ma pe i ai sou aiga,” o lana tala lea. “Sa la fesili mai pe ou te iloaina po o ai le Atua ma pe ou te tatalo ia te Ia.”
Na usuina e faifeautalai ma Roger ni pese i le taimi o le tietiega ma valaaulia o ia i le lotu. Sa ia taumafai e alu i ni nai taimi ae sa le mafai ona ia faafetauiina ia sauniga ma ana taimi atofaina, ma sa leiloa ai le latou fesootaiga ma faifeautalai.
Pe tusa ma le lima masina mulimuli ane a o galue Roger i le fale i se tasi aso, ae ona faalogoina ni faifeautalai se toalua o talanoa i se tasi i fafo atu o lana pa. Na iloa e Roger e mafai ona laua o mai e talanoa ia te ia. Sa ia lagonaina le pei e tatau ona ia tali ioe i soo se fesili la te fesiligia ai o ia.
Ina ua uma ona la faailoa atu o i laua, na fesili mai faifeautalai ia te ia pe na te iloa le Atua. Ioe. Pe na fia tatalo i le Atua? Ioe. Pe fia talanoa i faifeautalai? Ioe. Afea? I le taimi nei. Na fai mai faifeautalai o le a la toe foi mai i le 20 minute. Ina ua la toe foi mai, sa latou o mai faatasi ma se tagata o le ekalesia sa nofo latalata ane.
Sa aoaoina e faifeautalai ia Roger i ni taimi se tele mo se masina i lona aiga. Ae ona o mea sa latou faalogo i ai e uiga i le Ekalesia, sa le’i mananao ai lona aiga e aoao faatasi ma faifeautalai. Ina ua mavae se masina o aoao e uiga i le talalelei, sa o atu ai Roger i le lotu faatasi ma faifeautalai. O le taliaina agalelei na ia mauaina na tuua se lagona lelei ia te ia. “Na taliaina au e tagata e pei ua leva ona latou iloaina au,” o lana tala lea.
Na alu Roger i le fale mai le lotu ma ta’u atu i lona aiga o le a ia papatiso i se masina, ma e pule i latou pe filifili e auai i le Ekalesia pe leai. Sa latou talosaga atu ia te ia e faatali ina ia mafai ona latou auai faatasi ma ia. Sa amata ona latou auai i sauniga ma sa latou taufaiofo ma le fiafia.
O le taimi muamua lava sa ia auai atu ai i sauniga a le Ekalesia na tuua ai se uunaiga tumau i le atalii ulumatua a Roger, o Randrianandry. “O le taimi muamua lava na ou sau ai i le lotu sa ou matua te’i lava aua sa matua lotomaualalalo ia tagata,” na ia fai mai ai. “Muamua, sa lelei o latou lavalava mo le lotu. Ina ua mavae lena mea sa ou iloaina sa latou i ai moni lava iina mo se faamoemoega, e le ina ia faaalialia atu ai i isi tagata.”
Sa papatisoina le au Randrianarisons o se aiga i le aso 20 o Fepuari, 2003. O le taimi lena sa 8 ai tausaga o Nirina, 17 Sedinirina, ae 19 Randrianandry. Na le toe faigaluega le aiga i Aso Sa ma na avea le ola i le talalelei o se mea e faamuamua.
Suiga
“Ina ua uma ona ou papatiso, sa ou vaaia ni suiga se tele i lo matou aiga,” o le tala lea a Arelina, le faletua o Roger. “Na avea ma se aiga faaleagaga, ma le anoanoai o faamanuiaga, e faaletino ma faaleagaga, na oo mai i le ola ai i le talalelei.”
Mai se vaaiga faaletino, e faafetaia e Roger le Tama Faalelagi i le fesoasoani atu ia te ia e toe fausia lana pisinisi. Ina ua mavae le lua tausaga o le aveina o se tamai taavale laupasese ma le faia o soo se mea na te mafaia e tausi ai lona aiga, sa amata ona ia mauaina ni konekarate faufale. “Ou te talitonu e faamanuiaina au e le Atua i taimi uma pe a ou filifili e mulimuli ia te Ia,” o lana tala lea.
Ae na fai mai ona atalii o le suiga sili ona tele ua latou vaai ai i le latou tama o ona uiga faaletagata. Ua la faamatalaina o ia i le taimi nei o se faataitaiga o le lotomaualalo ma le agalelei. Fai mai Roger na faatalitonuina o ia e le talalelei e tatau ona ia sui. Talu mai lona amata suesue i ai, ua taumafai Roger e faatumuina lona olaga i mea lelei.
“Ona o aoaoga o le talalelei, ou te lei toe ita lava,” na ia fai mai ai. “O nisi taimi e faaosoina ai au i le ita, ae o loo i ai le talalelei i lo’u loto, i lo’u ulu, ma lo’u agaga. E fesoasoani ou te to’amalie ai.”
Pe a tulai mai se tulaga faatigaulu, o Roger le tagata e faafilemuina tagata o le aiga, ma faamanatu atu ia i latou e amio e faapei o le Faaola.
“Na oo ina lotomaulalo lo’u tama ma tausia lo matou aiga i le taimi lenei ma le alofa,” o le tala lea a Sedinirina. “A ou vaai atu i suiga ia te ia, ou te matuai faafetai lava mo le Tama Faalelagi, mo le talalelei, ma le avea ai ma tagata o le Ekalesia.”
O Se Aiga e Faavavau
I le 2006, faatasi ai ma le fesoasoani o le Tupe Lautele e Fesoasoani ai i Tagata Ulu i le Malumalu, na malaga ai Roger ma Arelina i Johannesburg, Aferika i Saute, ina ia faamauina i le malumalu.
Mai le 2009 i le 2011, na faamisiona ai Sedinirina ma Randrianandry i Aferika i Saute—o Sedinirina i Cape Town ma Randrianandry i Johannesburg. O se vaega o lo laua uunaiga e auauna atu o le fesoasoani lea i isi aiga e suia, e pei ona sa faia e lo latou aiga.
“O se vavega faapenei e mafai ona tupu, ma na tupu ona na o mai faifeautalai i lo matou fale,” o le tala lea a Randrianandry “O lea sa ou manao ai e fai lea lava mea e tasi mo se aiga i se mea.”
O lena filifiliga na aumaia ai se isi faamanuiaga i le aiga o Randrianarison. Sa i ai se periota o aso e iva o le a i ai uma ia Sedinirina ma Randrianandry i le nofoaga Autu e Aoao ai Faifeautalai i Johannesburg. Na faatulagaina e Roger e felelei atu i Aferika i Saute ma Arelina ma le la tama teine, o Nirina, ina ia mafai ona faamauina le aiga atoa i le malumalu. O Nirina, lea sa 14 tausaga i lena taimi, na fai mai e faigata ona ia faamatalaina le mea na tupu ma le mea sa ia lagonaina.
“Na faamalosia ai lo’u faatuatua ma fesoasoani ia te a’u e faalatalata atili atu ai i le Atua,” o lana tala lea.
I le taimi nei o loo galulue tagata o le aiga e fausia ma faamalosia i latou e siomia i latou. O loo auauna atu Roger o se epikopo o lana uarota. O Arelina o loo galue i le Peraimeri i le polokalama o le Faatuatua i le Atua. O Sedinirina o se failautusi fesoasoani o le siteki. O Randrianandry o se failautusi fesoasoani o le uarota. O Nirina o le taitai musika a le uarota.
Ua avea le talalelei ma se tali i tatalo i le aiga o Randrianarison. Ua faaleleia ai tiga tuai, aumaia faalatalata atili ai i latou, ma tuuina atu ai ia i latou le avanoa e faatasia ai e faavavau. Ua aoaoina ai Roger ina ia alofa. “O le olaga faaleaiga,” na ia fai mai ai, “o se olaga e tumu i le alofa.”
O le pikiina o faifeautalai i le taavale laupasese na amata uia ai e Roger Randrianarison le ala o le avea ma soo.
Ata o le aiga o Randrianarison na pueina e Matthew D. Flitton
O le suesueina o le talalelei o se aiga ua fesoasoani i le aiga o Randrianarison e ola vavalalata atili ai.
O le malaga atu i Aferika i Saute ina ia faamauina i le Malumalu o Johannesburg na faamalosia ai le aiga o Randrianarison.
Luga: ata na pueina e David William Newman © IRI; lalo: ata pue © Laura Parker