Avea ma se Faifeautalai o le Tala’i La’u Talalelei
Mai se saunoaga i se faigalotu na tuuina atu i le Nofoaga Autu o Aoaoga mo Faifeautalai i Provo i le aso 24 o Iuni, 2011.
E mafai ona e faia lena mea! Ua silafia e le Alii ua fai ai oe ma sui ma auauna atu i ai e te mafai ona faia lenei mea. Ou te iloa e te mafai ona e faia lenei mea.
O se Aposetolo e muamua, taulamua, ma o taimi uma e avea ai ma se faifeautalai. O lena mafuaaga, ua ou matuai fiafia ai lava e talanoa atu ia te outou o uso a auauna i lenei galuega matagofie i aso e gata ai.
O Le a le Faifeautalai o le Tala’i La’u Talalelei?
O se faifeautalai o le Talai La’u Talalelei o se auauna a le Alii, ua valaauina e ala i valoaga ma faatagaina e ala i le faaee atu o lima, o e folafola atu le talalelei e faavavau ma toefuataiina a le Faaola i Lana ala (tagai i le MF&F 13–14, 17–24; MF&F 68:1).
O le faamoemoega atoa o se faifeautalai o loo faamatalaina i le Talai La’u Talalelei o le “valaau atu i isi ina ia o mai ia Keriso e ala lea i le fesoasoani atu ia i latou e talia le talalelei toefuataiina, e ala i le faatuatua ia Keriso ma Lana Togiola, salamo, papatiso, mauaina le meaalofa o le Agaga Paia, ma tumau e oo i le iuga.”1
O le tiutetauave paia e talai atu ma le mautinoa le talalelei ma faia sauniga faaola, na faatinoina lava talu mai ona tuliesea Atamu mai le Faatoaga o Etena, ma o le a faaauau ai pea seia “faapea mai Ieova o Au ua mae’a le galuega.”2
O Tulaga Manaomia e Avea ai ma Faifeautalai o le Tala’i La’u Talalelei
Ou te fia talanoaina ni tulaga manaomia autu se lima mo le avea ma ni faifeautalai o le Talai La’u Talalelei.
Tulaga manaomia #1: E malamalama faifeautalai o le Talai La’u Talalelei latou te auauna atu ma fai ma sui o Iesu Keriso.
O faifeautalai o le Tala’i La’u Talalelei e iloa ma malamalama o ai o loo latou fai ai ma sui, le pogai latou te auauna atu ai, ma mea e tatau ona latou faia. Ua valaauina faifeautalai faamisiona e auauna atu ma vaetofia faalelei o ni auauna ma ni sui o le Alii o Iesu Keriso. Tatou te molimau atu i Lona suafa ma i le moni, paia, ma le misiona a Iesu Keriso i atunuu uma, ituaiga, gagana, ma nuu (tagai i le MF&F 133:37).
Tatou te alolofa i le Alii. Tatou te auauna ia te Ia. Tatou te mulimuli ia te Ia. Tatou te fai ma sui mo Ia.
O Ona faamoemoega e tatau ona avea ma o tatou faamoemoega. O mea e fiafia i ai o Ia e tatau ona avea ma mea tatou te fiafia i ai. O Lana galuega e tatau ona avea ma a tatou galuega. O Ona ala e tatau ona avea ma o tatou ala. O Lona finagalo faateleina e tatau ona avea ma o tatou loto.
I le avea ai ma sui o le Togiola, tatou te talai atu faafaigofie ma manino ia aoaoga faavae autu ma mataupu faavae o Lana talalelei toefuataiina. Tatou te le tuuina atu ni manatu o le tagata lava ia po o masalosaloga. Tatou te folafola atu ma molimau atu e uiga i le upumoni faigofie ua toefuataiina i le ala a le Alii ma i le mana o Lona Agaga.
O faifeautalai o le Tala’i La’u Talalelei e malamalama e le uma le tiutetauave o le fai ma sui o le Faaola, ma ia molimau atu e uiga ia te Ia. Faamolemole ia manatua o Ia i mea uma e te mafaufau i ai, i mea uma e te faia, ma i mea uma e te taumafai e avea ai, ma ia lelei ona avea ma Ona sui i fanau uma a le Tama Faalelagi lea tou te fegalegaleai i le taimi nei ma taimi uma.
Tulaga manaomia #2: O faifeautalai o le Talai La’u Talalelei e agavaa.
O se tulaga manaomia taua i le avea ma faifeautalai o le Talai La’u Talalelei o le agavaa patino i luma o le Faaola.
Sei ou tau atu nisi o upumoni faigofie i le manino tonu o loo o’u iloaina ai.
-
O i tatou o ni sui faatagaina o le Togiola ma le Faaola o le lalolagi.
-
Ua valaauina i tatou e talai atu Lana talalelei toefuataiina ma le faavavau.
-
E le mafai ona tatou pisia i po’upo’ua o le lalolagi ma avea ma ni Ona sui malolosi ma galulue ma le mana i Lona suafa paia.
-
E le mafai ona tatou fesoasoani i isi ia manumalo mai noataga o le agasala pe afai o loo ponatia i tatou lava i le agasala (tagai i le MF&F 88:86).
-
E le mafai ona tatou fesoasoani i isi e aoao ia salamo pe afai tatou te le o iloaina foi e i tatou le auala e salamo sa’o ai ma le atoatoa.
-
E mafai ona tatou folafola ma talai atu ma le mana na o mea o loo tatou taumafai e avea ai.
-
O le a tatou tali atu i luma o le Atua mo o tatou manaoga amiotonu ma le agavaa e galulue ai o ni Ona sui.
E le o manaomia i tatou i le taimi nei ina ia atoatoa. Ae ua poloaiina i tatou ia ola mama, ma savavali tonu i luma o le Faaola o Isaraelu. “Ia mama outou o e e tauaaoina ipu a le Alii” (MF&F 38:42).
O le salamo o se mataupu faavae o le faamoemoe ma le faamalologa—e le o le lotovaivai ma le faavauvau. O le salamo e moni lava e faalotomaulaloina—ae le o le taufaafefe. O le salamo e o faatasi lava le faasaulala ma le mafanafana, faigata ma le fimālie. O le salamo o se meaalofa tautele na mafai ona maua e ala i le Togiola a Lē tatou te alolofa, auauna, ma mulimuli i ai.
E tusa lava pe na e faia ni agasala matuia, o le Togiola a Iesu Keriso ma le salamo faamaoni, o le a mafai ai ona e toe mamā ma agavaa.
O loo i ai ni talavou o e o loo manaomia ona salamo atoatoa. O le taimi lenei. Faamolemole, faamolemole, faamolemole aua le faatuai le aso o lo outou salamo.
O loo i ai talavou o e ua salamo ma o loo faaauau pea ona salamo ma o loo mafaufau pea pe ua latou faia mea uma e manaomia ina ia taliaina ai e le Alii (tagai i le MF&F 97:8). Faamolemole ia manatua, e manaomia e le Alii lou mama ae le o le atoatoa. O le toe galue ai o le Agaga Paia i lou olaga o le faailoaga mautinoa lea o le faamagaloga e le Alii aua “e le afio le Agaga o le Alii i malumalu le paia” (Helamana 4:24). Ma ia iloa o le poloaiga ia “faamagalo atu i tagata uma” (MF&F 64:10) e aofia ai le faamagalo o oe lava.
O faifeautalai o le Tala’i La’u Talalelei o ni soo a le Alii o Iesu Keriso e faamamalu ma usitai i poloaiga. Faamolemole ia manatua o Ia i taimi uma ma ia mama ma agavaa e avea ma Ona sui.
Tulaga manaomia #3: O faifeautalai o le Talai La’u Talalelei e teuina upu o le ola e faavavau.
Ou te valaaulia outou ina ia “teu i o outou mafaufau e le aunoa afioga o le ola” (MF&F 84:85). O le teuina o upu o le ola e faavavau e sili atu nai lo na o le suesueina pe taulotoina, e pei lava o le “taumamafa fiafia i le afioga a Keriso” (2 Nifae 31:20; tagai foi i le 2 Nifae 32:3) e sili atu nai lo na o le tofo po o le lamulamu. O le teuina e fautuaina mai ai ia te au le taulai atu ma galue, su’e ma popoga, mafaufau loloto ma tatalo, faaaoga ma aoao, faataua ma le talisapaia, ma le olioli ma le faamemelo.
Manatua atalii o Mosaea—o ni faifeautalai mataina e toafa e igoa ia Amona, Arona, Ominea, ma Himinae—na “matua malolosi i le malamalama o le upumoni; ona o i latou ni alii mafaufau lelei ma sa latou suesue i tusitusiga paia ma le filiga” (Alema 17:2).
O nei faifeautalai totoa na teuina moni pea lava pea ia upu o le ola e faavavau. Latou te le’i faatamala pe na o le faatino e le tagata lava ia ma faalesoa ia suesuega o tusitusiga paia. O le poto ma le malamalama faaleagaga na tuia loloto ai o latou lava agaga, ma na faamaonia le moni o aoaoga faavae ma mataupu faavae o le talalelei i o latou loto e ala i le mana o le Agaga Paia.
I le avea ai ma sui o le Faaola, ua ia te oe ma a’u le tiutetauave faifaipea e galulue ai ma le filiga ma totō i o tatou loto ma mafaufau ia aoaoga faavae ma mataupu faavae autu o le talalelei toefuataiina, aemaise lava mai le Tusi a Mamona. Pe a tatou faia faapea, o le faamanuiaga folafolaina e faapea o le a “faamanatu mai foi [e le Agaga Paia] ia [i tatou] i mea uma (Ioane 14:26) ma faamalosi i tatou pe a tatou aoao atu ma molimau atu. Peitai e pau le auala e mafai ona galue ai le Agaga faatasi ma ala mai ia i tatou, pe afai lea tatou te tuuina atu ia te Ia se mea e galue ai. E le mafai ona Ia fesoasoani ia tatou manatua mea tatou te le’i aoaoina (tagai i le Alema 31:5).
O faifeautalai o le Tala’i La’u Talalelei e teuina pea lava pea upu o le ola e faavavau, latou te faalagolago i le aogā o le upu, ma e i totonu ia i latou le mana o le upu. Faamolemole ia manatua pea o Ia, ia agavaa i taimi uma e fai ma Ona sui, ma ia teuina ma faalagolago i le aogā o le upu.
Tulaga manaomia #4: O faifeautalai o le Talai La’u Talalelei e malamalama o le Agaga Paia o le faiaoga mulimuli ma le faamaoni.
O le Agaga Paia o le sui lona tolu o le Aigaatua, ma o Ia o le molimau o upumoni uma ma le faiaoga mulimuli ma le faamaoni. O lesona tatou te aoao atu ma molimau tatou te tuuina atu o ni sauniuniga ia i se tagata sailiili o loo galue ma aoao mo ia lava.
I le avea ai ma faifeautalai, o se tasi o o tatou matafaioi e sili ona taua o le valaaulia o tagata sailiili e faaaoga o latou faitalia ma galue e tusa ai ma aoaoga a le Faaola. O le osia ma le tausia o tautinoga faaleagaga, e pei o le tatalo mo se molimau i le moni, suesue ma tatalo e uiga i le Tusi a Mamona, auai i sauniga a le Ekalesia, ma le tausia o poloaiga, e manaomia ai e se tagata sailiili ona faaaoga le faatuatua, ia galue, ma ia suia ai.
Tusa lava po o le a le malosi tatou te auauna atu ai, e le mafai e oe ma a’u ona tuleia pe faamalosia le upumoni i totonu o loto o tagata sailiili. O a tatou taumafaiga sili ona lelei e na ona molioo atu ai o le savali o le upu moni i le loto (tagai i le 2 Nifae 33:1). I le iuga lava, o le tagata sailiili e tatau ona galue i le amiotonu ma valaaulia le upumoni i totonu o lona lava loto. E na o le pau lenei o le auala e mafai ai e tagata sailiili faamaoni o le upumoni ma tagata fou liliu mai ona atiina ae le malosiaga faaleagaga e sue ai tali mo i latou lava.
Talu ai o lo tatou tiutetauave o le fesoasoani i tagata sailiili e aoao e ala i le faatuatua ma le mana o le Agaga Paia, o lenei galuega e le faatatauina ia te au ma e le faatatau foi ia te oe. E tatau ona tatou faia mea uma i lo tatou malosi e faataunuu ai lo tatou tiutetauave o ni faifeautalai ma o le taimi foi lena e “aluese ai mai le ala” ina ia mafai e le Agaga Paia ona faia Lana galuega ma [Lana] matafaioi paia. O le mea moni, soo se mea e te faia pe ou te faia i le avea ai ma sui o le Faaola e tata’i atu ai ma le iloa ma le fuafuaina ia tosina atu i le tagata lava ia—i savali tatou te tuuina atu, i auala tatou te faaaogaina, poo o tatou uiga patino ma foliga vaaia—o se ituaiga o lea o faitaulaga pepelo lea e taofia ai le aoao atu ma le mataalia o le Agaga Paia.
“E talai atu ea e ia i le Agaga o le upumoni po o se isi ala? Ma afai e talai atu i se isi ala ua le mai i le Atua” (MF&F 50:17–18).
Faamolemole ia manatua pea o Ia, ia agavaa e fai ma sui mo Ia, ia teuina Lana afioga, ma faatagaina le faiaoga sili ma le faamaoni, o le Agaga Paia, e molimau mai i mea moni uma.
Tulaga manaomia #5: O faifeautalai o le Talai La’u Talalelei e malamalama o le aoao atu e sili atu nai lo le talanoa ma tau atu.
A o saofai le Faaola i luga o le Mauga o Olive, sa Ia fetalai mai: “Aua nei muai manatu i sa outou e fai atu ai, aua foi le luai fatufatuai; a o se mea e foaiina ia te outou i lena itu aso, o lea tou te fai atu ai; aua e le o outou e fai atu ai, a o le Agaga Paia” (Mareko 13:11).
Na faatonuina e le Faaola ia faifeautalai i aso popofou o lenei tisipenisione ia “tatala o oulua gutu ma o le a faatutumuina” (MF&F 33:8, 10) ma ia “sii ae o oulua leo i lenei nuu; tautala atu mafaufauga o le a Ou tuu i o oulua loto, ma o le a le faafememeaiina oulua i luma o tagata; aua o le a tuu atu ia te oulua i le itula tonu lava, ioe, i le minute tonu lava, mea e te lua fai atu ai” (MF&F 100:5–6).
Na faamamafa mai e nei mau se mamanu sili ona faigata ma a’ia’i mo le talaiga ma fesoasoani atu ai i tagata sailiili e aoao ai i upumoni. O faifeautalai o le Tala’i La’u Talalelei e iloa tatou te le aoaoina lesona; tatou te aoaoina tagata. E le na ona tatou faia pe tauloto atu ni savali e uiga i autu o le talalelei. Tatou te valaaulia tagata o loo sailia le upumoni ina ia oo i le liliuga tele o le loto. Ua tatou malamalama o le talanoa ma le ta’u atu e le o ni aoaoga.
O le talai atu o le talalelei i le ala a le Alii e aofia ai le matau ma le faalogologo ma le iloatino o mea e manaomia ao lei talanoa atu i ai. O le faasologa o nei faiga fesootai e fa e taua. Faamolemole ia matau o le fia iloa ma le faalogologo e muamua atu i le iloatino ma o le iloa, faalogologo, ma le iloatino e muamua atu i le tautala atu. O le faaaogaina o lenei mamanu o le a mafai ai e faifeautalai ona iloa ma aoao atu ia manaoga o tagata sailiili.
A o tatou matau, faalogo, ma iloatino, e mafai ona tuuina mai ai ia i tatou “i lea lava itula le vaega lena o le a fua atu i tagata taitoatasi” (MF&F 84:85)—o upumoni ina ia faamamafa atu ai ma le tali e tuuina atu o le a fetaui ma manaoga patino o se tagata sailiili faapitoa. E na o le iloaina, faalogo, ma iloatino e mafai ona taialaina i tatou e le Agaga e fai atu ma faia ia mea o le a sili ona fesoasoani ia i latou o e o tatou auauna atu i ai.
O le matau o se sauniuniga taua ina ia maua ai le meaalofa faaleagaga o le iloatino. O le iloatino o le vaai i mata faaleagaga ma lagona i le loto—o le vaaia ma le lagonaina o le pepelo o se manatu, o lelei o i se isi tagata, po o le isi mataupu faavae o loo manaomia e fesoasoani ai i se tagata sailiili. O le iloatino o le faalogo i taliga faaleagaga ma lagona i le loto—faalogo atu ma lagonaina o le popolega le magagana i se manatu faaalia po o se fesili, o le moni o se molimau po o le aoaoga faavae, po o le faamautinoaga ma le filemu lea e oo mai i le mana o le Agaga Paia.
O faifeautalai o le Tala’i La’u Talalelei e galulue i le faatuatua ma o loo taialaina e le Agaga ina ia fesoasoani i tagata sailiili e aoao i le upu moni. Faamolemole ia manatua pea o Ia; ia agavaa e avea ma sui mo Ia; ia teuina ai Lana afioga; faataga le Agaga Paia e molimau mai i mea moni uma; ma ia matau, faalogo, ma iloatino a o e molimau atu e uiga ia Iesu Keriso i tagata sailiili faamaoni o le upumoni.
E Mafai ona e Faia Lenei Mea!
Atonu e te faitau i la’u savali ma talitonu ai e mafai ma o le a faia e isi talavou uma mea sa ou faamatalaina atu. Ae atonu o le a e mafaufau pe mafai ona e faia. Faamolemole ia faalogo. E mafai ona e faia lenei mea!
Ana faapea e faatino moomooga o lo’u loto, ou te faaaluina ni nai minute ma outou taitoatasi. Ou te luluina lou lima, opoina mai oe, tilotilo atu i ou mata, ma fai atu, “E mafai ona e faia lenei mea! O le Alii o loo outou sui ai ma auauna atu i ai e silafia tou mafaia lenei mea. Ou te iloa e mafai ona e faia lenei mea. Ma o le avea ai ma Sana auauna, ou te folafola atu o le a e maua Lana fesoasoani. Faamolemole ia manatua e le aunoa, o Lana fesoasoani ma Lona malosi, e mafai ai ona e faia lenei mea!”
Ou te alofa ia te outou ma tatalo a o outou tauivi e avea ma tagata e tatau ona avea ai outou, o le a outou iloa ma tali atu i le faatuatua i le siufofoga ma le taitaiga a le Alii. Ona avea moni ai lea o outou ma sui malolosi ma le mataalia o le Alii o Iesu Keriso.
Ata na saunia e Publishing Services Department; Lovest Thou Me More than These? e David Lindsley