Tiakono Fou Lava
“O lenei foi o i latou uma o e e talia lenei perisitua ua latou talia a’u, ua fetalai mai ai le Alii” (MF&F 84:35).
O le tufaina o le faamanatuga o se tiutetauave tele. Ae faapefea pe afai e sasi o ia?
Na tu Benji i luma o le faata, e faasaosao lona fusiua. Na fetaui lelei lona ofutino paepae ma le ofuvae lanumoana paauli. Na seluina lona ulu. Na mautinoa lava lona foliga saunia e faauuina o se tiakono. Aisea la na ia lagona ai le popole tele?
Na uu mai e Benji ana tusitusiga paia, ma aluese mai le potu. Sa ia taumafai e aua le mafaufau fua e uiga i le ala o le a eseese ai mea i le lotu i le asō. Ma sa i ai foi le tiute fou o le perisitua lea na faapopoleina ai o ia i soo se taimi lava e mafaufau ai i ai: o le tufaina o le faamanatuga. Ae faapefea pe a ia faia se mea sese i lona taimi muamua i le vaiaso a sau? Sa ia taumafai e faagalo foi lena mea ao ia tuua le fale.
Sa tutusa lava faagasologa o le sauniga faamanatuga e pei ona masani ai. Ae ina ua maea, na savavali atu Benji ma lona aiga i le ofisa o Epikopo Salazar. Na mautinoa lava le ese o lenei mea. E masani lava ona i ai o ia i sauniga amata o le Peraimeri i le taimi lenei.
Sa saofai Benji ao tuu e Tama, le epikopo, le peresitene o Alii Talavou, ma fesoasoani o le epikopo o latou lima i luga o lona ulu. Na tuuina atu e tamā ia te ia le Perisitua Arona. I le taimi o le faamanuiaga, na mou ese atu ai le lagona popole sa ia Benji. Sa ia lagona le to’a ma le fiafia.
Na tulai Benji ma lululima ma tagata uma. Ona ia fusiina lea o Tina ma lona uso, o Jay, ma lona tuafafine laitiiti, o Mirasol.
Mulimuli ane, sa alu o ia i le Aoga Sa. E ui lava e le tutusa ia vasega fou ma vasega lea sa i ai i le Peraimeri, ae na tutusa lava faalogona. O le lesona na faatatau i le tatalo. Na tele lava ana lesona e faatatau i le tatalo a o i ai i le Peraimeri. Na mapuea Benji ua uma atu lona popolevale. Atonu o le avea ma se tiakono o le a le faigata tele.
“O le a maoae,” na fai atu ai Jay ia Benji ina ua uma le lotu. “O le a ou faamanuiaina le faamanatuga ae tufa e oe.”
Na toe oo uma mai lava ia lagona popole ma le fefe. “Ioe, manaia,” na ia fai atu lemu ai. O le tufaina o le faamanatuga o le mea lea na sili ona popole i ai Benji!
I se taimi mulimuli ane i lena po na maua atu ai e Benji ia Tama o faitautusi i luga o le nofoa umi. “Ae faapefea pe afai ua ou misia se tasi ma latou le mauaina ai le faamanatuga? o lana fesili lea. “Ae faapefea pe a ou lāvea?” Sa mafai ona ia vaai manino faalemafaufau atu i lena aso, i le salalau o le fata i le fola ma felelei solo ipu vai.
Sa oomi e tamā le tauau o Benji. “Ou te manatua le taimi muamua na ou tufaina ai le faamanatuga. Masalo na sili atu lou popole nai lo oe i le taimi nei.”
Na emoemo Benji i le te’i. “Oe? E te le fefe i se mea!”
Sa ata Tama. “Sa ou fefe i le tele o taimi.E te iloa le mea na fesoasoani e aveese ai lou popole?”
Sa mafaufau Benji i sina taimi. “Tatalo?”
Na ataata tama. Sa’o lena. Tatalo. Ma na fai e lo’u tamā sou faamanuiaga. E te manao ou te faia sou faamanuiaga?”
Sa vave le lue [o le ulu] o Benji. “Ioe! Ou te manao tele i ai.”
Sa faapotopoto le aiga i le potu malolo. Sa tuu e Tama ona lima i luga o le ulu o Benji. A o tautala Tama, na lagona e Benji le amata ona maligiligi o ona loimata. “Ia manatua,” na fai mai ai Tama i le faamanuiaga, “ua e mauaina le perisitua e ala i se sauniga paia. Ua tuuina mai e le Tama faalelagi ia i tatou le perisitua ina ia mafai ona tatou auauna atu ai i isi.Afai e mafai ona e faia lenei mea ma le faamoemoe atoa o le loto, o le a faamanuiaina oe i lenei mea ma i mea uma.”
O le vaiaso atoa lava na tatalo ai Benji mo se fesoasoani. O le Aso Sa na sosoo ai, na faatasi atu ai o ia i le au tiakono i le pito i luma o le falesa.Na ia faalogologo ma le totoa ao faamanuiaina e Jay le falaoa.
Na faafuasei lava ona ia toe lagonaina atoa le popole. Mata e mafai ona ia faia lenei mea? Sa matua taua tele! Ona ia manatuaina lea o folafolaga mai le faamanuiaga a Tama. Na mouese atu ona lagona popole ao faatasi atu le Agaga ma ia.
Sa ia siiina i luga le fata ma savali atu ma le mautinoa i laina na tofia i ai o ia. Ma le faaeteete, sa ia tuuina atu ai le fata i se tamaitai i le laina muamua.
Sa ataata ane o ia ia te ia. Sa toe ataata mai i ai Benji, ma le iloaina sa ia auauna atu i le Alii.
Ata na tusia e Adam Koford