Aisea ae O a foi Mea e Tatau ona Ta’uta’u Atu i Lo’u Epikopo?
O le fesoasoani ia te oe ia salamo o se vaega faapitoa o le valaauga o se epikopo. O le a ta’u atu e lou loto fuatiaifo ia te oe pe a manaomia ona e talanoa atu ia te ia.
Atonu e te fia iloa pe aisea ua aoaoina ai oe e ta’uta’u atu i lou epikopo po o le peresitene o le paranesi pe a e faia ni agasala matuia. Atonu e te fai ifo ia te oe lava ia, “Pe le o le salamo ea o se mea e patino i le va o au ma le Alii? Afai ua ou taofia a’u amioga sese, ma ua ta’uta’u atu i le Atua, aisea e manaomia ai ona ou talanoa i lo’u epikopo?”
Ata na saunia e Christina Smith
Aisea e [Talanoa] ai i le Epikopo ae Le o Se Isi Tagata?
E toatele le autalavou e sili atu le to’alelei e tautau atu a latou mea sese i o latou matua po o taitai o le autalavou. E ui lava e mafai ona tuuina atu e ou matua ma taitai le lagolago ma fautuaga e manaomia, ua folafola mai e le Alii o le epikopo o se faamasino o Isaraelu (tagai i le MF&F 107:72, 74). Ua ia te ia le tiutetauave e iloilo ai le agavaa o tagata o lana uarota. E ala i le faauuina ma le ola amiotonu, ua agavaa ai le epikopo i faaaliga mai le Agaga Paia e faatatau i tagata o lana uarota, e aofia ai ma oe.
E mafai ona fesoasoani le epikopo ia te oe i le faagasologa o le salamo i auala e le mafai e ou matua po o isi taitai ona tuuina atu ai se fesoasoani. Afai e ogaoga tele le agasala, e mafai ona ia fuafua pe tatau ona faatapulaaina ou aia i le Ekalesia. Mo se faataitaiga, i le avea ai ma se vaega o le faagasologa o lou salamo, atonu na te talosagaina oe e taofi mai le ai ma inu i le faamanatuga po o le faaaogaina o le perisitua mo se vaitaimi. O le a oulua galulue faatasi e fuafua le taimi e te toe agavaa ai e toe faaauau ai na gaoioiga paia.
O le a fautuaina oe e lou epikopo po o le a se mea e faia e faamalosia ai lou gafatia e tetee atu i faaosoosoga. Atonu na te faamalosiau atu ia te oe e suesue i se autu faaleaoaoga faavae, e pei o le salamo, ona faasoa atu lea ia te ia o se mea sa e aoaoina. Atonu na te talosagaina oe lua te feiloai i vaiaso taitasi e lipoti mai po o le a se mea o e faia e aveesea ai oe mai tulaga tofotofoina.
O Afea e Tatau Ona ou Talanoa atu ai ia te Ia?
Atonu e te mafaufau faapea, “E lelei lena mea, peitai e mafai faapefea ona ou iloa o mea sa ou faia e matautia tele e manaomia ai le talanoa i le epikopo? O le tali pupuu: “O le a tau atu ia te oe e lou mafaufau.” A e lagona le maini o le lotofuatiaifo, galue loa, (tagai i le Alema 34:31–34).
Na aoao mai le Tupu o Peniamina e faatatau i le salamo, “E le mafai ona ou tau atu ia te outou mea uma e mafai ona outou faia ai le agasala; ona ua tele ala ma auala eseese, ua matua tele lava e le mafai ona ou faitauina” (Mosaea 4:29). O lea, nai lo o le tuuina atu o se lisi auiliili e uiga i mea e ao ona e ta’uta’u atu i lou epikopo, sei ou faasoa atu nisi o mataupu faavae o le a fesoasoani e te faia ai lena filifiliga.
O A Mea e Tatau ona Ou Tautau Atu?
Ou te iloa sa e taumafai e usiusitai, ae atonu ua e faia ni mea sese—e oo lava i ni mea sese matuia. O le tele o mea sese e fai e tagata e mafai ona faaleleia e ala i tatalo faaletagata lava ia ma le salamo faamaoni. O nisi o mea sese, ae maise lava ia mea sese na e faatatau i le le ola mama, e manaomia ai le tautau atu i le epikopo ae e te lei maua le faamagaloga a le Alii.
A o e mafaufau e uiga i mea sese na e faia, e mafai ona e lagona le tausalaina, le mautonu, le fiafia, po o le faanoanoa. Afai o e maua soo se tasi o na lagona, atonu la e moomia lou talanoa i lou epikopo e uiga i na mea sese.
Aua e te taumafai e faia ni alofaga mo oe lava pe fetuunai ni auala e te aloese mai ai. Atonu e mafai ona e mafaufau faapea, “O se maasiasi tele le tau atu i le epikopo o le mea sa ou faia. E manatu o ia o au o se tagata e lelei atu nai lo o lena. O le a te’i o ia pe afai ou te tauina i ai le mea na ou faia. E le toe fiafia o ia ia te au.”
Ou te folafola atu ia te oe na te le tausalaina oe. I le avea ai ma se auauna a le Alii, o le a ia agalelei ma malamalama ao ia faalogo atu ia te oe. O le a ia fesoasoani ia te oe i le faagasologa o le salamo. O ia o le avefeau o le alofa tunoa o le Alii e fesoasoani ia te oe ina ia mama e ala i le Togiola a Iesu Keriso.
Na fetalai mai le Alii: “Faauta, o le ua salamo i ana agasala e faamagaloina o ia, ma o au le Alii, ou te le toe manatua lava.
“Tou te iloa faapea se ua salamo i ana agasala—faauta, na te ta’uta’u atu ma lafoaia” (MFF 58:42–43).
Pe a e tautau atu ma lafoai au agasala, o le a faamagaloina oe e le Alii. O le a e le tali atu ia te Ia mo na agasala pe a oo i le taimi e faamasinoina ai oe.
Ae Faapefea pe Afai ou te le Ta’uta’u Atu?
O nisi taimi o le a taofia e le tagata le faia o mea sese, ae le tautau atu lava, pe a manaomia, i lona epikopo. O se taunuuga la, o le a faaauau pea ona tauaveina e le tagata le amoina na o ia o le agasala, nai lo le tuu atu i le Faaola e aveese le avega.
Sei ou avatua se faataitaiga. I se tasi afiafi i ni nai tausaga ua mavae, sa ou faatalanoaina ai tagata matutua mo le faafouina o o latou pepa faataga o le malumalu. Sa sau se tamaitai e faamatua tagata mo lana faatalanoaga. Sa faaipoipo i le malumalu, ma sa toaga i le Ekalesia i lona olaga atoa.
Sa ou lagonaina se faanoanoa tele i lona agaga. A o faagasolo pea le faatalanoaga, sa ou maua se uunaiga faaleagaga. Sa ou fai atu ia te ia, “Tuafafine, ua ou maua se uunaiga sa e faia se mea sese matuia ao e talavou e te le’i tautauina atu i se taitai perisitua. Mata e te manao e ta’u mai ia te au e uiga i ai?”
Sa amata loa ona tagi o ia. Sa ia ta’u mai ia te au e moni, ae sa ia lagonaina i taimi uma le maasiasi e tautau atu i le epikopo. Ina ua uma ona ia tau mai le mea sa ia faia, na ia faasoa mai ni faamatalaga auiliili na talafeagai ai mo au le faia o se iloiloga o lona agavaa.
O le tautau atu o lana agasala i se taitai perisitua na faailoga ai le faaiuga o le gasologa o lona salamo nai lo le amataga. Sa na tauaveina ma le leai o se uiga le avega ma le faanoanoaga o lena agasala mo le silia ma le 30 tausaga.
Talu ai ua na faamaeaina le laasaga mulimuli o le salamo, ua tafiesea lona tausalaina. E i ai ni taimi na ou vaai ai ia te ia talu mai le po o lena faatalanoaga. Sa susulu ona foliga, ma sa fiafia.
Ou te manao ia tou iloa ou te le o toe manatuaina lona igoa. E mafai ona aveesea e le Alii na manatuaga mai le epikopo. O le mea ou te manatuaina e faapea, e ala atu i le tautau atu i lona taitai perisitua, na mafai ai e se tamaitai faamatua tagata ona maua le fiafia ma na aveesea mai ia te ia ia lagona o le tausalaina lea na ia tauaveina mo le tele o tausaga.
Faamolemole aua le faia lena mea sese. Afai e i ai ni ou lagona o le tausalaina ae e te le o mautinoa pe tatau ona tautau atu i lou epikopo, alu e vaai o ia. Faataga o ia e fesoasoani atu ia te oe. Aua le lamatiaina oe i le amoina o se avega e le manaomia i lou olaga, lea o le a e lagona ai le faanoanoa. E ala i lou tautau atu i le epikopo ma lou salamo, o le a aveese ai e le Alii lena avega mamafa mai lou agaga (tagai i le Isaia 1:18).
Aisea e Manaomia ai ona Ou Salamo?
Na totogi e Iesu Keriso le tau o agasala a tagata uma e ala i Lana taulaga togiola. Ua Ia valaaulia oe ina ia salamo ma aloese mai faanoanoaga ma mafatiaga faaopoopo. “Salamo, ne’i … faigata tele ou puapuaga—o le tiga e te le’i iloa, ma o le uiga ese o le tiga e te le’i iloa, o le faigata ona onosa’i e te le’i iloa.
“Aua faauta, o Au, o le Atua, na mafatia i nei mea mo tagata uma, ina ia latou le mafatia pe afai latou te salamo;
“Ae afai latou te le salamo, o le a latou mafatia e pei lava o Au. …
“O lea, Ou te poloai atu ai ia te oe ia e salamo, … ma ia e tautau atu au agasala, nei e mafatia i nei faasalaga ua Ou tautala atu ai” (MF&F 19:15–17, 20).
Ou te molimau atu e faapea, o Ona puapuaga, ua totogi ai e Iesu Keriso le tau mo a outou agasala. E mafai ona faamagaloina oe pe afai e te salamo. Aua e te taumafai e totogi le tau mo au agasala. E le lava lou mafatia e faaola ai oe; ua na o le Togiola e te maua ai le faamagaloga.
Tau ina ia outou faaaogaina le faatuatua ia Iesu Keriso ma Lana Togiola. Ou te molimau atu i le suafa o Iesu Keriso o le salamo, e aofia ai le tautau atu i lou epikopo pe a talafeagai ai, o le a mafai ai ona outou mama. E le gata i lea, e ala i le alofa tunoa o le Faaola—Lona mana gafatia—e mafai ai ona faamalosia lou tomai e tetee atu ai i faaosoosoga i le lumanai. O le mea lea, o le a outou maua ai le filemu o le mafaufau ma le fiafia i lenei olaga, ma o le a outou mauaina le ola e faavavau i le lalolagi a sau.