O Lo Tatou Tupuaga Maoae o Faifeautalai
O faifeautalai uma, anamua po o le taimi nei, e auauna atu ma le faamoemoe e faaleleia olaga o isi tagata.
Ua tauaveina e faifeautalai i lenei vaitaimi le talatuu maoae o le faatumuina o le lalolagi i le malamalama o le Alii (tagai i le Isaia 11:9). Mai ia Aperaamo ia Paulo ia Amona ia Uilifoti Uitilafi, o faifeautalai o loo i tusitusiga paia ma le talafaasolopito o le Ekalesia ua tuuina atu ai i faifeautalai i aso nei ni tagata e faataitai i ai le malolosi.
Pe o tatou o ni faamisiona a le ekalesia, sauniuni mo le galuega faafaifeautalai, auauna atu i se misiona, po o le fo’i mai i se misiona, e mafai ona tatou maua le lototele ma musumusuga mai nei faataitaiga.
O La Tatou Tupuaga o Faifeautalai i le Tusi Paia ma le Penina Tau Tele
O faifeautalai o le Feagaiga Tuai, e pei o Iona, na valaauina e momoli atu se leo o le lapataiga i tagata (tagai i le Esekielu 3:17–19). Mai le faataitaiga a Iona ua tatou iloa ai le taua o le salamo ma le usiusitai. O le tala ia Aperaamo ua aoao ai i tatou e uiga i le gafa ma le mana o le Perisitua Mekisateko.
O faifeautalai o le Feagaiga Fou, e pei o Peteru ma Paulo, na galulue e faasaosao ia aoaoga a Iesu Keriso. Ae ui i lea, i le aluga o taimi na pau atu ai le lalolagi i le liliuese. Na toefuatai mai e le Atua le talalelei e ala i le Perofeta o Iosefa Samita. O loo tatou galulue nei, e pei ona faia e na faifeautalai, e faasaosao ma faasoa atu aoaoga a Iesu Keriso.
O Iona i le Matafaga i Nineva, na saunia e Daniel A. Lewis. Na salamo Iona ma alu atu e talai ma faamaonia atu e nofotupu Ieova i soo se nofoaga ma e le faapito Lona alofa i se nuu se tasi po o ni tagata (tagai i le Iona 1–4).
© 2002 Daniel A. Lewis
O Peteru ma Ioane i luma o Faipule i Ierusalema, saunia e Simon Vedder. Na ave atu Peteru ma Ioane i luma o le aufono, ma fesili atu le faitaulaga sili ia i laua, “Pe ua matou le matua fai atu ea ia te outou ia soia le toe aoao i lena igoa? faauta foi, ua outou faatumu i Ierusalema i la outou mataupu. … Ona tali atu lea o Peteru … ua faapea atu, E tusa ona sili o lo matou anaana i le Atua i lo matou anaana i tagata” (Galuega 5:28–29).
Faaaloaloga a le Falemataaga o Talafaasolopito o le Ekalesia
O Le Aposetolo o Paulo, saunia e Karel Skreta. I ana femalagaaiga ma tusi, na tuuina mai ai e Paulo se molimau mamana e uiga i le Faaola i Asia Minor ma se vaega tele o le lalolagi na iloaina i lena taimi.
BPK, Berlin / Gemaeldegalerie Alte Meister, Staatliche Kunstsammlungen, Dres / Elke Estel / Hans-Peter Klut / Art Resource, NY
Ua Faamanuia e Mekisateko Aperamo [Aperaamo], saunia e Walter Rane Ua faamanuia e Mekisateko Aperamo (tagai i le Kenese 14:18–20) ma sa tuuina atu foi ia te ia le perisitua (tagai i le MF&F 84:14). I se isi taimi, na faaali mai ai le Alii ia Aperamo, ma fetalai mai, “ua Ou faamoemoe e … fai oe o se faifeau e tauave lo’u igoa i se laueleele ese. … Ma o le a avea oe ma se faamanuiaga i au fanau e mulimuli mai pe a mavae atu oe, ina ia latou tauaveina i o latou lima lenei auaunaga ma le Perisitua i atunuu uma” (Aperaamo 2:6, 9).
Faaaloaloga a le Falemataaga o Talafaasolopito o le Ekalesia
O La Tatou Tupuaga o Faifeautalai i le Tusi a Mamona
O Alema, Amoleka, atalii o Mosaea, ma Samuelu le sa Lamana ua na o nisi nei o faataitaiga o faifeautalai maoae ua tatou maua i le Tusi a Mamona. Mai ia i latou ua tatou vaaia ai ni faataitaiga o le salamo, faatuatua, usiusitai, ma le lototele. E faapei o i latou, e mafai ona tatou faalagolago i musumusuga ma faaaliga mai le Atua e taialaina ai la tatou auaunaga faafaifeautalai.
O Amona i luma o le Tupu o Lamonae, saunia e Gary L. Kapp. O Amona, o se tasi o atalii o Mosaea, na faasaoina lafu a le Tupu o Lamonae. Ina ua fesili atu le tupu ia Amona pe na auina mai o ia e le Atua, na fai atu Amona o ia o se tagata ua valaauina e ala i le Agaga Paia e aoao atu le talalelei “i le nuu [o Lamonae], ina ia mafai ona aumai i latou i le malamalama o mea ua tonu ma moni” (Alema 18:34).
© Gary L. Kapp, e le mafai ona kopiina
Na Ia Aumaia le Tala Fiafia i Lo’u Agaga, saunia e Walter Rane. Sa asiasi mai se agelu ia Samuelu le sa Lamana ma aumai le “tala fiafia i [le] agaga [o Samuelu]” e faatatau i le afio mai o le Faaola (Helamana 13:6–7). O se vaega o lona valaauga e talai atu i sa Nifaē, na a’e ai Samuelu i le papuipui o le aai ma faasoa atu nei tala fiafia i tagata.
Faaaloaloga a le Falemataaga o Talafaasolopito o le Ekalesia
O La Tatou Tupuaga o Faifeautalai i le Mataupu Faavae ma Feagaiga
Ina ua mavae le Toefuataiga o le talalelei, na manaomia ni faifeautalai. O faifeautalai e pei o Dan Jones, Orson Hyde, ma Parley P. Pratt na faasoaina atu le Tusi a Mamona ma le talalelei a Iesu Keriso. O nisi, e pei o le uso o le Perofeta o Iosefa o Samuelu, na auauna latalata atu i lo latou fale. O isi na malaga mamao e faasoa atu le talalelei i nofoaga e pei o Taialani, Atumotu o Sanuisi (Hawaii), Tenimaka, ma Egelani.
O nei faifeautalai anamua sa masani ona auauna atu i ni misiona uumi ma le tele. Na latou tuua matua, manamea, avā, fanau, ma fanau a fanau e pei foi ona tatou faia. Ua avea i latou ma faataitaiga ia i tatou i le taimi nei o le faatuatua, lototele, usiusitai, onosai, ma le filiga.
Faifeau Mamona, saunia e Arnold Friberg, e faavae i se uluai lomiga na saunia e Christen Dalsgaard. O lenei vaaiga o se faifeautalai o le Au Paia o Aso e Gata Ai anamua o loo aoao atu le talalelei a Iesu Keriso i se aiga Tenimaka o loo faapotopoto i lo latou fale i nuu maotua, o se ituaiga talaiga masani lea i le seneturi lona 19. Sa aoao atu foi faifeautalai i tulimanu o auala po o fale faafiafia e fai ai fonotoga a le nuu.
© IRI, faaaloaloga a Arnold Friberg
Ua Sauni Uilifoti Uitilafi mo Papatisoga i le Faatoaga a Benbow, saunia e Richard A. Murray. Na taitai atu e le Alii ia Uilifoti Uitilafi i le vaitau o le 1840 i le faatoaga a John Benbow i Herefordshire, Egelani. “O iina sa i ai ni tagata sa tatalo mo le faasologa anamua o mea,” na tusi ai Uilifoti “O le taunuuga la, o aso muamua e tolusefulu ina ua ou taunuu atu iina na ou papatisoina le toa ono selau … I le valu masina o o’u galue i lena atunuu na ou aumai ai i le Ekalesia ni tagata e afe valu selau. Aisea? Ona sa i ai ni tagata na saunia mo le Talalelei” (“Discourse,” Deseret Weekly, Nov. 7, 1896, 643).
Atinaeina i luga o La Tatou Tupuaga o Faifeautalai
Talu mai ona fofogaina e Peresitene Thomas S.Monson i le konafesi aoao ia Oketopa 2012 ua mafai e alii ma tamaitai talavou ona o i le misiona i se matutua e laiti ane, ua fiasefulu afe le Au Paia o Aso e Gata Ai ua lolofi atu i le misiona.
I le konafesi aoao ia Aperila 2013, na faaopoopo ai e Elder Neil L. Andersen o le Korama a Aposetolo e Toasefululua lana molimau e uiga i le galuega faafaifeautalai ma uunaia i tatou taitoatasi e avea ma se vaega taua o lenei vavega ua manino mai, e ala i le fesoasoani e saili i latou ua saunia e faalogo i le talalelei: “E pei lava ona mautinoa le musuia e le Alii o le toatele o faifeautalai e auauna atu, ua Ia fagua foi mafaufau ma tatala loto o le toatele o tagata lelei ma faamaoni ia talia Ana faifeautalai. Ua outou silafia i latou pe o le a silafia foi i latou. Latou te nonofo i o outou aiga ma nonofo i o outou tuaoi. Latou te savavali ae ma pasia outou i le alatele, tou te nonofo faatasi i aoga, ma outou fesootai i luga o le initoneti,” (“O se Vavega, Liahona, Me 2013, 78).
O faifeautalai na faatoa taunuu na papatisoina tagatanuu o le Atumotu o Sanuisi (Hawaii) i le vave e pei o le 1851. O ata lenei na pueina i se aso mulimuli ane.
E le mafai ona kopiina
Faasoaina atu o le Talalelei i Magāala, saunia e Ken Spencer. O loo faasoa atu e nei faifeautalai e toalua le talalelei i se alii sa i luma o se faletusi i New Brunswick, New Jersey, ISA.
Faaaloaloga a le Falemataaga o Talafaasolopito o le Ekalesia
Faifeautalai i Taimi Uma, saunia e Juei Ing Chen. O tagata o le Ekalesia i Taiuani, e pei o faamisiona i soo se mea, e saili e faasoa atu lo latou fiafia i le talalelei ma tusitusiga paia. O tusitusiga paia o loo i luga o le laulau; ae o le koneteina umi lanumoana o loo i ai ia tusitaai ua faaalia ai se ata o le Malumalu o Taipei Taiuani.
© IRI, faaaloaloga a Juei Ing Chen
O Le a Fuga mai sa Lamana e pei o le Rosa, saunia e Joselito Jesus Acevedo Garcia. O lenei ata o loo atagia mai ai le agaga o le galuega faafaifeautalai i totonu o tagata e tautatala faa-Sipaniolo. Ua sauni faifeautalai e toalua e aoao atu le talalelei ao fai e tagata a latou galuega masani i aso uma. O le Malumalu o Lima Peru, o loo tu i totonu o tamai fale ma manu o le atunuu, e faatusa i le tuputupu ae o le Ekalesia.
Faaaloaloga a le Falemataaga o Talafaasolopito o le Ekalesia
Faifeautalai o le Au Paia o Aso e Gata Ai i Sierra Leone, saunia e Emile Wilson O le uluai misiona i Sierra Leone na faatulagaina i Freetown i le aso 1 o Iulai, 2007. Na avea Freetown ma siteki lona 3,000 a le Ekalesia i le aso 2 Tesema, 2012.
Faaaloaloga a le Falemataaga o Talafaasolopito o le Ekalesia