Manatu o le Konafesi Aoao

Saunia e Tina Spencer

E alala le tusitala i Washington, ISA.

“Mate Mai Po o Ai e Sau i le Taumafataga o le Afiafi?”

I le toe sefululima o aso oo i amataga o konafesi aoao taitasi, e tuu ai i luga e lo matou aiga le matou faailo e faalauiloa atu ai le amataga o le “Mate Mai Po o Ai e Sau i le Taumafataga o le Afiafi?” Ona matou faaopoopoa lea i ai o ata o o tatou perofeta, tagatavaai, ma talifaaaliga mai lomiga o konafesi talu ai o mekasini a le Ekalesia.

Ou te saunia e ala i le suesueina o le perofeta o le a matou taliaina i lena po. O nisi taimi ou te maua ai ni mea faitino i le fale e fai ma sui o ni nai mea na ou iloaina, ma ou tuuina i luga o se ipu mafolafola. I le taimi o le taumafataga, ao o’u faamatala atu ni tala e uiga i ia aitema taitasi, e taumafai tagata uma e mate po o ai. O nisi taimi, ou te faamatalaina ai se tala pe lua foi na faasoa mai e le perofeta i le taimi o le konafesi aoao ua mavae.

Ou te maofa i mea e manatua e la’u fanau e uiga i o tatou perofeta ma au aposetolo pele, ma ou te iloa o lenei taaloga faigofie ua faateleina ai lo’u alofa ma le malamalama e uiga i nei foi tamalii maoae.

O La’u Lava Kopi o le Konafesi

Ina ua asiasi mai Elder Neil L. Andersen o le Korama a Aposetolo e Toasefululua ma lona faletua, o Kathy, i le taimi o la matou konafesi faalesiteki, na faasoa mai e Sister Andersen se tala ia i matou. Fai mai o ia, a o latou nonofo i Farani, sa ia faia ai ni kopi o lauga o le konafesi mo le la fanau taitoatasi—e oo lava i le au laiti. Sa te’i o ia ina ua ia iloa le tau o kopi, lea sa matuai taugatā lava. Ona oo atu lea o se manatu i lona mafaufau: “O le a le tāua ia te oe o le mauaina e lou aiga o saunoaga a perofeta?”

Na matuai ou ootia lava i lenei tala, ma sa ou faamautinoaina ia tofu tagata uma o lo matou aiga ma lana lava kopi o lauga o le konafesi.Sa matuai fiafia le ma fanau teine. Sa matou faaaogaina i a matou afiafi faaleaiga ma i le taimi o suesuega i tusitusiga paia. Sa ou fiafia i le vaaia o se tasi o afafine o faitauina e ia lava ia lauga ma faailoga i lana penivali sesega. O le isi afafine, na papatiso talu ai nei, na viga mai ia ma faitaua na o ma’ua ia lauga.

Lu’i o le Konafesi

I le avea ai ma se vaega o la’u lesona i le Aualofa, sa ou lu’iina ai uso taitoatasi e toe faamanatu lauga mai le konafesi ua mavae; o nisi uso na toe faitauina lauga, o isi na matamata i ai i le initoneti. Na faailoa mai e nisi o uso le ala na latou lagona ai ua sili atu ona [latou] saunia mo le konafesi o loo loma.

ATA NA SAUNIA E CARLOS ISRAEL GUTIERREZ ROBLES