I le Aoao o le Ekalesia

Ua Faamanatu e Monokolia le 20 Tausaga o le Ekalesia

O le Aso Gafua, 15 Aperila, 2013, e silia ma le 300 tagata o le Ekalesia na potopoto i Zaisan Hill i Ulaanbataar, Monokolia, e faamanatuina le 20 tausaga o le Ekalesia i lena atunuu. O pesega na lagiina e se aufaipese e 50 tagata, ma sa faafofoga le faalapotopotoga i se saunoaga na pueina a Elder Neal A. Maxwell (1926–2004) a o ia faapaiaina ia Monokolia mo le talaiina o le talalelei i le 1993.

O Elder Tai Kwok Yuen, o se tasi sa i ai i le Au Peresitene o le Eria i Asia o le na malaga faatasi ma Elder Maxwell i Monokolia i le 1993, na matauina le ala na “galueaiina ai pea e aao o le Alii ia lea vaega o Lana tovine.”

O gaoioiga eseese i le aluga o le vaiaso na faailogaina ai le aso faamanatuina. Na tatai mai e se faatasiga a le misiona ni faifeautalai ua maea misiona e toa 200. E silia ma le 1,000 tagata Monokolia na auauna atu faafaifeautalai faamisiona—e toeitiiti lava toa 1 mai le toa 10 o tagata taitasi o le ekalesia i Monokolia. Na faataunuuina ni sauniga papatisoga i Monokolia atoa i le afiafi o le Aso Faraile; e toa 24 tagata na papatisoina i lena aso. O Mary N. Cook, o le na faamalolo talu ai nei mai le au peresitene aoao a Tamaitai Talavou, na saunoa i se faigalotu a Tamaitai Talavou, ma na faaalia ai i le faletatala o talafaasolopito o aiga se vitio o i ai ni faatonuga mo se galuega faatino fou o Gafa. Sa faalauiloa ai foi se tulaga faaaganuu tautaua o Monokolia i faafiafiaga faatasi ai ma taleni a le toatele o tagata o le Ekalesia.

Na Faailogaina e tagata o le Au Paia o Aso e Gata Ai i Haiti le Aso Faamanatu, e Fesoasoani i le Totoina o Laau

I le aso 1 Me, 2013, na auai atu ai tagata o le Ekalesia i Haiti i se galuega faatino maoae i totonu o le atunuu o le totoina o laau. Na totoina le anoano o tamai laau i le aso muamua o le galuega, ma o le a faauaau ai pea ona totoina le tele o laau. A maea le galuega faatino, o le a tutupu ae ni laau fou e 400,000 i Haiti, e aofia ai tipolo, moli, niu, esi, ma aluna (oak).

Na faatauina e le Ekalesia ia laau e avea o se vaega o lona lagolago faifaipea i le toe faaleleia o Haiti mai le mafuie. Na saunia ai foi e le galuega faatino ia tagata o le ekalesia mo se galuega auauna atu e faamanatu ai le atoaga o le 30 tausaga o le Ekalesia i lenei malo atumotu. O le tolusefulu tausaga ua mavae, sa asiasi atu ai Peresitene Thomas S. Monson, o avea lena ma se tasi o le Korama a Aposetolo e Toasefululua, i Haiti ma faapaiaina ai le atunuu mo le talaiina o le talalelei toefuataiina.

Na auai atu Elder Neil L. Andersen o le Korama a Aposetolo e Toasefululua i Haiti i le taimi o le Aso Faamanatu ma sa pulefaamalumalu ai i le tatalaga o se maa faamanatu lea na faailoga ai le amataga o le Ekalesia i Haiti.

Ua Foai atu e le Ekalesia le Tasi Miliona Pauna o Meaai i Feeding America

Ia Me 2013 na foai ai e le Ekalesia, e ala atu i lona lala agaalofa o le Latter-day Saint Charities, le silia ma le tasi miliona pauna o meaai i Feeding America, o se faalapotopotoga aupito i tele le suetupe e laveai tagata fiaai i le Iunaite Setete. O le foai na aofia ai meaai tuuapa e pei o fualaau suamalie, fualaau fai supo, ma pi, lea o le a tufatufa atu i aiga e le tagolima e ala atu i faleteuoloa ma nofoaga sulufai eseese o alalafaga i le Iunaite Setete atoa.

O Bob Aiken, o le peresitene ma le pule faatonusili o Feeding America, na saunoa faapea o le a saunia e lenei foai ni aiga e 625,000.

Na mamanuina e tagata sisiva ma ni ili le numera “20” i le aluga o se faafiafiaga lea na faia e faamanatu ai le lona 20 tausaga o le Ekalesia i Monokolia.

Ata na pueina o le faaaloaloga a le Misiona Ulaanbaatar Monokolia

Na totoina e faifeautalai ma le au paia i Haiti ni laau i luga o mauga maualuluga o le taulaga o Port au Prince, lea e mafai ona vaaia i tuaata.

Ata na pueina e Jason Swensen