O Le a le Mea ua E Oo mai ai i Rexburg?

Sandra Rush, Idaho, ISA

Ina ua mavae ni tausaga se tele o le nonofo ai i se nofoaga e le toatele ni tagata o le Ekalesia e i ai, na ma siitia atu ma lo’u toalua i se pitonuu i Rexburg, Idaho, ISA, lea e na o le toalua aiga e le lolotu na i ai. Sa o se faamanuiaga mo i maua le nonofo ai i autafa o se tasi o i latou.

Sa moa e le tamā lana vao i le taimi muamua na ma afe atu ai i le auala taavale o le ma fale. Na ma savavali atu ma lo’u toalua i lo ma fanua ina ia faamasani atu i [le tamā]. Ao faaloaloa atu atu lo’u lima, sa ou fesili atu, “O le a se mea ua oo mai ai lo outou aiga i Rexburg?”

Sa ia tali mai, O la’u galuega—ma na matou sueina faapitoa se nuu o loo manaomia le faailoa atu i ai o Keriso.”

Sa ou lagonaina le pei e asu mai se pakete vai malulu i ou foliga, peitai sa ou ataata lava. Sa ou tautino ai lava i lena taimi e tusa lava po o le a le mea na fai mai ai lo matou tuaoi fou pe faia foi, o le a avea i matou ma tuaoi sili i le aiga nai lo se isi lava tuaoi sa latou mauaina. O le a ma taumafai e tali atu i fegalegaleaiga uma ma i latou i se auala agalelei, alofa, ma lelei, e pei ona ono faia ai e le Faaola.

O tausaga e valu mulimuli ane na aumaia ai le tele o ni gaoioiga fefaasoaai i le va o o matou aiga. Sa valaaulia le tina e auai i gaoioiga a le Aualofa. Sa ia valaauliaina au ma le toatele o o matou tuaoi o le Au Paia o Aso e Gata Ai i se malaga na lagolagoina e lana lotu. Sa valaaulia i maua ma lou toalua i siva ma faaaliga ta piano a le la fanau. Na faaaofia lo latou aiga i kuka ma pati a le pitonuu. Ma sa ma maua ni valaau mai le la fanau matutua pe a latou manaomia se taavale e aumai ai i le fale mai galuega pe a le maua o latou matua.

Na popole ia matua nei fiafia tele le la fanau i le Au Paia o Aso e Gata Ai, o lea la te lei faatagaina ai le la fanau tama e auai i le polokalama o le Sikauti a lo matou uarota. Ae sa avea lo matou fale o se nofoaga saogalemu, lea la te faataga ai le la fanau e taaalo ai pe a asiasi mai fanau a le ma fanau.

Soo se taimi lava e taumafai ai lo matou tuaoi e fesoasoani mai ia matou iloa “le sese o o matou ala,” ma te faamanatu atu ia i laua lo ma faaaloalo tele i lo laua talitonuga ma le ala na latou ola ai ma tausia ai le la fanau. Ona ma faaopoopoa atu lea, ma te faamoemoe foi o le a ma maua lena lava faaaloalo e tasi mo o maua talitonuga, lea e totonugalemu foi i aoaoga a le Faaola.

Ina ua taumafai le tina o le aiga e faaaoga eseesega o o matou talitonuga ia latou taumamao ai ma i maua, e ala i le fai mai o le Au Paia o Aso e Gata Ai e talitonu i se “Iesu ese”, sa ou faamanatu atu ia te ia matou te talitonu uma lava o Ia [Iesu] e paia ma o le Alo pele o le Atua. Na iu lava ina ma maua se fegalegaleaiga mafana ma le fealofani.

Sa siitia ese lo latou aiga e aunoa ma le auai i le Ekalesia. Ae afai e mafai ona latou fai mai, “Sa matou nonofo faatasi ma tagata Mamona; o i latou o ni tagata lelei ma faaaloalo ma e loto faamaoni,” ona ou lagonaina lea na ma manuia i le avea ma ni tuaoi lelei ma i le fesoasoani atu ia i latou ina ia taliaina ma le lē manatu faapito lo latou iloiloga o le Au Paia o Aso e Gata Ai.