Savali a le Au Peresitene Sili
O Lo Tatou Tiutetauave le Laveai
Mo le Au Paia o Aso e Gata Ai, o le manaomia ona laveai mai o o tatou uso ma tuafafine o e, po o le a lava se mafuaaga, na se ese ai mai le ala o le toaga i le Ekalesia e faavavau lona taua. O tatou iloa ni tagata faapena o e sa i ai se taimi na taliaina atoatoa ai le talalelei? Afai e i ai, o le a lo tatou tiutetauave e laveai mai ai i latou?
Manatunatu i e ua leiloloa o e ua loa soifua, o e ua maliliu taitoalua, ma e e mama’i. E masani lava ona maua i latou i le vaomatua matutu ma tuufua o le tuulafoaiina e ta’ua o le tuuatoatasi. Pe a ua aluese atu le talavou, pe a ua fai ifo le soifua maloloina, pe a ua faitiitia le malosi, pe a ua taupulapula le malamalama o le faamoemoe, e mafai ona tausia ma lagolagoina i latou e lima e fesoasoani ma le loto e silafia le agalelei.
Ioe, e i ai isi e manaomia ona laveai. O nisi o tauivi ma agasala a’o isi o fesesea’i i le fefe po o le faapalapala po o le valea. Po o le a lava le mafuaaga, ua latou faaesea i latou lava mai le toaaga mai i le Lotu. Ma o le a toetoe lava a mautinoa lo latou tumau i le leiloloa sei vagana ua fagua ia i tatou—o tagata toaaga o le Ekalesia—se manao e laveai mai ma faaola.
Se Tasi e Faaali Mai le Ala
O se taimi ua mavae, sa ou maua ai se tusi na tusia e se alii ua sē ese mai le Ekalesia. Ua faatusa i ai le toatele naua o o tatou tagata auai. Ina ua uma ona faamatala i le ala na le toe toaga ai i le lotu, sa ia tusia:
“Sa tele naua mea na ou maua ao lea ua matua itiiiti lava. Ou te le o fiafia ma lagona e pei lava o loo o’u toilalo i mea uma lava. E lei tuua lava e le talalelei lo’u loto, e ui ua tuua lo’u olaga. Ou te talosaga atu mo a outou tatalo.
“Faamolemole aua ne’i galo i matou o loo iinei—o tagata o le Au Paia o Aso e Gata Ai ua leiloloa. Ou te iloa le mea o i ai le Ekalesia, ae o nisi taimi ou te manatu ai ou te manaomia se isi tagata e faaali mai ia te au le ala, faamalosiau mai ia te au, ave ese lo’u fefe, ma molimau mai ia te au.”
A o ou faitau i le tusi lenei, na liliu atu o’u mafaufauga i se asiasiga sa ou faia i se tasi o nofoaga maoae o le lalolagi e faaali ai faatufugaga—o le Falemataaga tautaua o Vitoria ma Alapati i Lonetona, Egelani. O i ai iina, o loo i ai se ata mataina ua matuai uigaese le faavaaina, na valiina i le 1831 e Joseph Mallord William Turner. O loo faaalia i le atavali ni ao uliuli ma le matamataita o le sami ma’ema’eā e faamalumalu mai ai le tulaga matautia ma le oti. O se malamalama mai se vaa ua pa’ulia o loo susulu mai se mea mamao lava. I luma mai, o loo felafoai maualuga ai e galu fafati, se vaafaaola tele. Na alo malosi e alii a latou foe ao tofu le vaafaaola i le sami sousou. I le matafaga o loo tutū ai se tina ma se fanau e toalua, ua susū i le timu ma sasa solo e le matagi. O loo latou autilo ma le popole agai i le sami. I lo’u mafaufau, sa ou faapuupuuina ai le igoa o le atavali. Ia te au na ta’ua I Le Laveai.1
I le lotolotoi o afā o le olaga, o loo faatalitali mai ai tulaga matautia. O alii ma tamaitai, tama ma teine latou te oo i le pa’ulia ma feagai ma le faatafunaga. O ai o le a taialaina le vaafaaola, tuua le mafanafana o le aiga ma le auaiga, ae alu atu i le laveaiga?
O la tatou galuega e le lofituina. Ua tatou i ai i le feau a le Alii; ua tatou agavaa mo Lana fesoasoani.
I le taimi o le galuega a le Matai, sa Ia valaau atu ai i faifaiva i Kalilaia e tuu a latou upega ae mulimuli atu ia te Ia, ma tautino atu, “Ou te faia oulua ma fai faiva i tagata.”2 Sei o tatou auai faatasi ma aufaifaiva o alii ma tamaitai, ina ia mafai ona tatou tuuina atu soo se fesoasoani tatou te mafaia.
O la tatou tiute o le aapa atu e laveai i latou o e ua tuua le saogalemu o le toaaga [i le Ekalesia], ina ia mafai ona aumaia i latou i le laoai o le Alii e taumamafa i Ana afioga, ia olioli i le mafutaga a Lona Agaga, ma ia “le toe tagata ese, po o e ua aumau, a ua nuu faatasi ma le au paia, o le aiga foi o le Atua.”3
O Le Mataupu Faavae o le Alofa
Ua ou iloa ni mafuaaga autu se lua e mafua ai se toe toaga mai ma, mo suiga i uiga faaalia, mausa, ma faatinoga. Muamua, ua toe foi mai tagata ona na faaalia e se tagata ia i latou o latou avanoa i le faavavau ma na fesoasoani ia i latou e filifili ia ausia. O tagata e le toaaga e le mafai ona faamalieina i le malolo umi i le tulaga vaivai pe a latou iloa e mafai ona latou aapa atu i mea e sili ona mataina.
Lona lua, e toe foi mai isi ona o e pele ia i latou po o le “nuu faatasi ma le au paia” ua mulimuli i le apoapoaiga a le Faaola, ua alolofa i o latou tuaoi e pei o i latou lava,4 ma ua fesoasoani i isi ina ia ausia a latou miti ma faataunuu a latou sini.
O le metotia i lenei faagasologa sa avea—ma o le a faaauau pea ona avea ma—o le mataupu faavae o le alofa.
I se tulaga moni lava, o i latou na sa pagatia i le atavali a Turner o le fesouaiga o le sami ua pei lava o le toatele o o tatou tagata le toaaga o loo faatalitali mai i le laveai a i latou o e taialaina ia vaafaaola. O loo momoo o latou loto mo se fesoasoani. O tina ma tama e tatalo mo o latou atalii ma afafine. O avā e aioi atu i le lagi ia aapa atu [se tasi] i a latou tane. O nisi taimi e tatalo tamaiti mo o latou matua.
O la’u tatalo ina ia tatou maua se manao e laveai e ua le toaaga mai, ma ia aumaia i latou i le olioli o le talalelei a Iesu Keriso, ina ia latou auai faatasi ma i tatou i mea uma ua ofoina mai i le faaaumeaga atoatoa.
Talosia ia tatou aapa atu e laveai mai e ua leiloloa o e o loo siomia i tatou: o tagata matutua, e ua maliliu taitoalua, o e mama’i, i latou e i ai manaoga faapitoa, o e le toaaga mai, ma i latou o e e le o tausia poloaiga. Ia tatou faaloaloa atu ia i latou le lima e fesoasoani ma le loto e iloa le agaalofa. O le faia o lena mea, o le a tatou aumaia ai le olioli i o latou loto, ma o le a tatou maua le lotomalie atoatoa lea e oo mai ia i tatou pe a tatou fesoasoani atu i isi i le agai atu i le ala o le ola e faavavau.
Aoao Atu mai Lenei Savali
Mafaufau e fesili atu i tagata e te asia pe latou te iloa soo se tasi na tauivi ma le auai i le lotu. E mafai ona e filifilia se tagata se toatasi ma talanoaina ni auala e faaali atu ai le alofa, e pei o le valaaulia o ia e auai i se afiafi faaleaiga po o le o mai mo se taumafataga.
Life-Boat and Manby Apparatus Going Off to a Stranded Vessel Making Signal (Blue Lights) of Distress, saunia e Joseph Mallord William Turner © Victoria ma Albert Museum, London, www.vandaimages.com