Soifua Maloloina Faaletino ma Faalelagona

Mo nisi o le autalavou, o le toilalo i le faaaogaina o mataupu faavae o le malosi faaletino, e mafai ona avea ma se faafitauli tele i le faia o ni uo ma le fausiaina o le talitonu o le tagata ia te ia lava. E le gata i lea, o le soifua maloloina faaletino ma faalelagona o se vaega taua ae o le tele o taimi o se vaega e le lava le atinaeina i sauniuniga e auauna atu i se misiona. O itulau e 52–53 o lenei lomiga, o loo talanoaina ai e Elder Adrián Ochoa o le Fitugafulu le ala e mafai ai e le tausia o o tatou tino ona puipuia le soifua maloloina faaletino ma faalelagona. O loo ia faamanatu mai ia i tatou e fai faamalositino ma usitai i le Upu o le Poto (tagai i le MF&F 89) ina ia tatou maloloina ma fiafia ai. A o e fesoasoani atu i lau fanau e aoao ma faaaoga mataupu faavae o le soifua maloloina faaletino ma faalelagona, o le a mafai ona faateleina lo latou talitonu ia i latou lava ma saunia ai mo le auaunaga i le lumanai.

E pei o le saunoaga a Elder Ochoa: “O le tausia o lou tino o le a faamanuiaina ai foi lou mafaufau ma fesoasoani e te manatua ai o oe o se atalii/afafine o le Atua ma e mafai ona e maua le to’a ma le fiafia. O o tatou itu faalelagona, faaletino, ma faaleagaga e fesootai uma faatasi.”

Fautuaga mo le Aoaoina o le Autalavou

Faitau faatasi le tusiga a Elder Ochoa ma atinae se fuafuaga mo faamalositino faaleaiga faatasi ai ma ni sini patino ma mo’i.
Faatasi ai ma lau fanau talavou, faitau le vaega o le soifua maloloina faaletino ma faalelagona o loo i le Mo le Malosi o le Autalavou (itulau 25–27). Talanoa po o le a le uiga o le soifua maloloina faalelagona.
Usu faatasi le pese “E Ui i Faigata” (Viiga, nu. 63) ma talanoa i le mea ua aoao mai e le toetu e uiga i le taua o o tatou tino faaletino.
Suesue i mau o loo lisi atu i lenei tusiga ma talanoa i le mea o loo latou aoaoina mai e uiga i le soifua maloloina faaletino ma le faalelagona.

Fautuaga mo le Aoaoina o Tamaiti

Faaali atu i lau tama se ata o se malumalu. Ia talanoaina po o le a le uiga o le mea na aoao mai e le Aposetolo o Paulo e faapea o o tatou tino o “malumalu lea o le Agaga Paia” (1 Korinito 6:19) ma pe faapefea e lenei malamalamaaga ona fesoasoani ia i tatou e tausia o tatou tino ma mafaufau.
Fai se lisi o gaoioiga faafiafia aoga e manao lau tama e fai faatasi o se aiga. Ona fatu lea o se fuafuaga mo le auala e avea ai nei gaoioiga o se vaega o le olaga faaleaiga.
Ia talanoaina ni auala ia malamalama ma pulea ai lagona, e aofia ai le ita po o le faanoanoa. Usu le pese “Afai ua E Fiafia” (Tusipese a Tamaiti, 125), “O Loo Ou Taumafai e Avea e Pei o Iesu” (Tusipese a Tamaiti, 40), po o se isi pese e faatatau i lagona ma le faia o filifiliga lelei.

Ata na tusia e Taia Morley