O Talavou ma Feagaiga o le Malumalu
Faatasi ai ma le faaitiitia o tausaga manaomia mo faifeautalai faamisiona, ua silia ma le fiasefulu afe talavou ua osia nei feagaiga paia o le malumalu.
I le avea ai ma tagata faigaluega o le malumalu, na matou maua ai le faamanuiaga o le feiloai ma talavou matutua e o mai i le malumalu mo le mauaina o a latou lava faaeega paia. Ua matou iloaina ai, o le semina sauniuni mo le malumalu na fesoasoani ia i latou, ae o faatosinaga a matua ma taitai amiotonu na i ai se matafaioi sili ona taua i le fesoasoani ia i latou e saunia e osia feagaiga o le malumalu. I le avea ai ma ni matua ma ni taitai, e manaomia ona tatou fesoasoani i le autalavou e le gata ina sauniuni mo le auaunaga faafaifeautalai faamisiona, lea e na o ni nai masina le umi, ae faapea foi mo le osia ma tausia o feagaiga o le malumalu, ia oo atu i le faavavau le umi. O laasaga muamua lava e mafai ona amata i le olaga faatamaitiiti.
Saunia o Fanau
E mafai e matua ona faailoa atu ia latou fanau le taua o le malumalu e ala i le tapuai i le malumalu ma e ala i le faasoaina atu o a latou molimau e uiga i le galuega o le malumalu. E oo lava i eria e le mafai ona auai soo atu ai i le malumalu, e mafai lava e matua ona toto i totonu o a latou fanau le naunau e auai i le malumalu.
Na aoao mai Peresitene Howard W. Hunter (1907–95) i matua: “Ia tatou faasoa atu i a tatou fanau ia lagona faaleagaga tatou te maua i totonu o le malumalu Ma ia tatou aoao i latou ma le faatauanau sili atu ma le to’alelei i mea e talafeagai ona tatou tau atu e uiga i faamoemoega o le maota o le Alii.”1 E manaomia ona iloa e a tatou fanau o le malumalu o se nofoaga tatou te maua ai tali i tatalo ma o le nofoaga tatou te lagonaina ai le alofa o le Atua.
E mafai foi e matua ona aoao atu a latou fanau e tulimatai atu i le ma ola agavaa mo a latou lava pepa faataga e faatapulaa le faaaogaina ina ia latou maua le avanoa e agavaa ai pe a atoa le 12 tausaga. Pe a oo mai le taimi mo nei talavou e auai atu ai, tatou te matauina le olioli ma le mitamita i le taimi latou te faaali atu ai nei pepa faataga i le malumalu.
Saunia o le Autalavou
E mafai ona fesoasoani matua i a latou fanau ina ia auai i le sailiga o talafaasolopito o aiga aua a atoa lo latou ta’i 12 tausaga e mafai ona latou aveina igoa o aiga i le malumalu. I le autalavou o e faia lena mea, ua folafola mai Elder David A. Bednar o le Korama a Aposetolo e Toasefululua faapea: “O le a faateleina lou alofa ma lou lotofaafetai mo ou augatama. O le a loloto ma mausali lau molimau ma lou liua i le Faaola. Ma ou te folafola atu ia te oe o le a puipuia oe mai le uunaiga faateleina a le fili.”2
Ua tatou vaaia le tele o faataitaiga o le faataunuuina o lenei folafolaga. Talu ai nei sa ta’u mai ai e se tamaitai talavou ia i matou, ina ua uma ona sailia le igoa a lona tinamatua, sa sau o ia i le malumalu e fai le galuega mo ia. Sa fai mai o ia ao papatiso o ia [tamaitai] mo ia [lona tinamatua], sa ia maua se musumusuga manino o le a faafeiloai o ia e lona tinamatua i le olaga a sau. O aafiaga faapenei e faamalolosia ai molimau ma totō ai se naunautaiga ina ia auai i isi sauniga o le malumalu.
O le toatele o le autalavou e feagai ma faaosoosoga e fai lavalava e le tauagafau. A ofuina e matua ma taitai ia lavalava mananaia, ma tauagafau i lalo ifo lea o le a ofuina ai le ofusa, o le a iloa e le autalavou e mafai foi ona latou faia faapea. E tatau ona malamalama le autalavou o le faiga o o latou lavalava ma le faiga latou te faia ai o latou tino e mafai ona faaalia ai lo latou avea ma soo.
E mafai ona fesoasoani matua i le autalavou ia saunia e ulu atu i le malumalu e ala i le fesoasoani ia i latou ina ia malamalama i feagaiga o le a latou osia iina. O feagaiga o le malumalu e aofia ai folafolaga o le “tausia o le tulafono o le tausisia o le ola mama ma le legavia, ia agaalofa, agalelei, faapalepale ma mama; ia tuuto atu taleni ma mea faaletino i le faasalalauina atu o le upu moni ma le siitia o le [aiga o tagata]; o le faatumauina o le tuuto i le pogai o le upu moni; ma saili i soo se itu ia saofaga ai i le sauniuniga tele ia faapea ona saunia le lalolagi e talia lona Tupu—le Alii o Iesu Keriso.”3 E mafai ona molimau atu matua o le a maua e talavou ni faamanuiaga patino ma le mamana i o latou olaga atoa a o latou tausia nei feagaiga, ma o nei feagaiga o le a sili atu ona anoa i le autalavou a o fesoasoani o latou matua e faamalamalama ia i latou, o faamanuiaga ma feagaiga e maua e ala i le Togiola a Iesu Keriso.
E tele auala e mafai ona tatou fesoasoani e saunia ai a tatou fanau ma le autalavou ina ia maua faamanuiaga o le malumalu. O le tele o lo latou saunia, o le faateleina foi lea o lo latou to’afimalie ma lagona le Agaga ma faapea ona maua ni aafiaga maoae faaleagaga ao latou maua o latou faaeega paia. O se aafiaga faagaeetia o le malumalu o le a avea atili ai i latou o ni soo tuuto o Keriso ma ni faifeautalai sili atu ona lelei—ua faaosofia e fesoasoani atu ia i latou latou te aoaoina ina ia saunia e maua o latou lava sauniga paia o le malumalu.
Ata na tusia e Steve Kropp