Sa Dili pa Matapos ang Atong Panaw
Alang niadtong kinsa molahutay pag-ayo, ang hugot nga pagtuo malig-on paglabay sa panahon.
Dili ko mabalaka kon asa pangitaa ang akong 92 anyos nga amahan, nga si Paul Romney, sa Dominggo sa hapon. Anaa siya sa iyang ward sa Siyudad sa Salt Lake, Utah, nanglimpyo sa chapel. Molungtad og sobra gamay sa usa ka oras ang iyang pagpanglimpyo.
Iyang gamiton ang iyang sungkod samtang nagsubay sa pasilyo. Dayon manggunit siya sa lingkuranan sa iyang pagbalhin-balhin og laray mamunit sa mga basura, magtarung sa mga hymnbook, ug mopundok sa mga pan nga nangatagak diha sa carpet. Mao kini ang buluhaton nga iyang himoon kada Dominggo, uban sa pipila ka mga eksepsyon, sukad sa iyang pagka-orden nga usa ka deacon niadtong 1934.
Pagpangandam alang sa Pagsimba
“Akong buhaton kini sa pagpakita nga ako nahigugma sa Ginoo,” siya miingon. “Ang pagbaton og limpyo nga chapel makatabang nato sa pagsimba Kaniya.”
Isip usa ka deacon, si Paul Romney nakat-on nga ang iyang mga katungdanan naglakip sa pag-atiman sa temporal nga mga panginahanglan sa ward. “Akong gihunahuna nga usa ka paagi sa paghimo niana mao ang manglimpyo human sa miting,” siya miingon. “Mao nga gisugdan nako kini sa paghimo, ug gihimo nako kini sukad kaniadto.” Dili kini usa ka opisyal nga buluhaton o calling, bisan og usahay siya moanha sa mga Sabado aron sa pagtabang sa uban nga gi-assign sa paglimpyo sa meetinghouse. Usahay ang iyang mga anak motabang niya. Sa milabay nga mga tuig sa dihang diha pa siya sa bishopric, siya miawhag sa mga deacon sa pag-apil.
Apan sa kasagaran siya maghulat hangtud mahuman ang katapusang miting nianang adlawa. Dayon, sa walay saba, iyang gisalmot ang iyang gamayng mahimo sa pagmintenar sa balay sa kahusay. Ug gihimo niya kini nga matinud-anon, kada Dominggo.
Ang ehemplo sa akong amahan mipakita nako nga bisan unsa pa ang atong kahimtang, kita makakita kanunay og paagi sa pagserbisyo. Nagtudlo kini nako og balaan nga pagtahud ug pagpangandam sa pagsimba. Ug kini nakatabang nako nga makakita nga dunay daghan nga atong makat-unan gikan niadtong nag-una nato sa ilang panaw sa kinabuhi.
Nagkausab nga mga Tahas
Akong nakat-unan ang susamang mga leksyon gikan sa akong mga silingan. Si Larry Morgan, 97, ug ang iyang asawa, si Elizabeth, 94, malampusong midawat og nagkalain-laing mga tahas sa ilang kinabuhi: bana ug asawa, amahan ug inahan, senior nga mga kompanyon nga misyonaryo didto sa Holland. Sa dihang si Larry nag-edad og 72, siya gitawag isip magtatambag sa bishopric. Nianang higayuna dihay 79 ka biyuda sa among kasilinganan, ug pinaagi sa sugo sa bishop, si Larry ug Elizabeth mibisita sa matag usa kanila.
Sobra na sa 40 ka tuig, ma-Dominggo sa puasa, ang mga anak ni Larry ug Elizabeth, ug karon ang ilang mga apo ug mga apo sa tuhod, magpundok sa gabii sa pagtapos sa ilang puasa. “Gusto namo ang among pamilya nga malingaw, ug ang tanan ganahan nga mokaon,” siya miingon. “Kami dunay daghang mga trigo sa tipiganan, mao nga kami mogaling sa among kaugalingong harina ug maghimo og mga waffle. Dayon kami mangaon hangtud ang tanan mabusog.” Kadtong yano, gisaluhan nga pagkaon nakapalungtad sa mga pagbati sa panag-uban sa pamilya.
Karon, ang mga anak ug mga apo maoy magluto. Si Elizabeth giangu-ango na pero nasayud nga anaa ra ang pamilya. Sa matag tawo nga anaa, iyang balik-balikon ang, “Gihigugma ko ikaw.” Kon mahuman na ang panihapon ug ang tanan nanguli na, malingaw siyang maminaw ni Larry nga mobasa og kusog sa mga kasulatan ug sa mga artikulo sa magasin sa Simbahan ug nakakaplag og kasiguroan sa pagkahibalo nga anaa siya.
Paglabay sa mga duha ka tuig, nahulog si Larry ug nadaut ang iyang dugukan. Isip resulta, siya dili na makalakaw. “Wala nako mag-usik og panahon sa pagpangutana, ‘Nganong ako?’” miingon siya. “Nakadawat ako og panalangin sa priesthood. Giingnan ko nga makalakaw ko pag-usab, bisan tuod og kini dili niini nga kinabuhi. Tungod sa Pag-ula ug Pagkabanhaw, ako nasayud nga kini mahitabo. Akong nakat-unan nga ang atong Amahan sa Langit mao ang nagdumala. Kon kita modawat sa Iyang kabubut-on, dayon kita makasalig sa Iyang tabang.”
Nagtubo nga Panglantaw
Akong nahimamat si Merle Christensen sa unang higayon sa usa ka assisted living center sa Brigham City, Utah. Ang apohan nga babaye sa usa ka higala sa among pamilya, hapit na siya mosaulog sa iyang ika-101 nga adlawng natawhan. Sa iyang kwarto, si Merle naglingkod nga gilibutan sa mga libro sa handumanan ug mga litrato. Duha ka mga litrato nga iyang gipakigbahin nakapadani nako.
Ang una, nga nakuha daghang mga tuig na ang milabay, mao ang grupo sa mga estudyante sa seminary, lakip ang mga anak nga babaye ni Merle. “Sila anaa sa atubangan nga lingkuranan uban sa ilang magtutudlo, nga si Boyd K. Packer,” miingon si Merle. “Batan-on siya tan-awon, apan siya usa ka maayo nga magtutudlo.” Karon siya ang Presidente sa Korum sa Napulog Duha ka mga Apostoles.
Sa dihang si Merle batan-on pa, nasakit siya og polio. “Dili kini sayon isip usa ka batan-ong babaye,” siya miingon. “Ang akong hugot nga pagtuo kinahanglan nga motubo aron makapadayon. Apan ang Ginoo mitabang nako kaniadto, ug Siya nagtabang nako karon.” Kadtong nag-antus og polio sa ilang pagkabatan-on sa kasagaran mag-antus sa post-polio syndrome samtang magkadako, makigbisog sa mga sintoma sama sa kaluya sa kaunuran ug hilabihang pangapoy. Mao kini ang nahitabo ni Merle.
Kon siya mobati og kakapoy, siya makahinumdom sa kasulatan sa Alma 7:11–12 nga nagsaysay kon giunsa sa Manluluwas “pagdala diha kaniya sa mga sakit ug mga balatian sa iyang mga katawhan … nga siya unta masayud … kon unsaon pagtabang ang iyang mga katawhan sumala sa ilang mga kahuyang.” Dayon, siya miingon, “salig lang kamo nga ang Ginoo nasayud kon unsa ang inyong giagian. Dawata kini kada adlaw, pag-ampo, simba, ug pagmabination sa uban. Ang gagmay nga mga butang makatabang nimo nga makasugakod.”
Ang ikaduhang litrato nga gipakita ni Merle nako anaa sa usa ka scrapbook—usa ka litrato sa tulo sa iyang lima ka anak nga babaye. Ang iyang tanang mga anak mga babaye, ug ang tulo natawo nga triplets niadtong 1936, ang unang triplets nga natawo sa Siyudad sa Brigham. “Ang pagbaton og triplets talagsa kaniadto,” miingon si Merle. Dili pa kaayo maayo ang pagpanambal kaniadto, ug duha sa mga babaye natawo nga dunay sakit sa kasingkasing. Si Sharon namatay niadtong 1958 ug si Diane niadtong 1972. Si Janice, nga walay sakit sa kasingkasing, namatay tungod sa kanser niadtong 1992.
“Gihigugma ko ang tanan kong mga anak, ilang mga bana, akong mga apo, ug mga apo sa tuhod,” miingon si Merle. Apan gimingaw siya sa iyang bana, nga si DeVere, kinsa namatay sulod na sa 26 ka tuig, ug gimingaw siya sa iyang mga triplet, nga mag-edad na og 79 niining Abril.
Iyang gibasa pag-usab ang Alma: “Ug siya modala diha kaniya sa kamatayon, nga siya mahimo nga mohubad sa mga higot sa kamatayon diin naghigot sa iyang mga katawhan” (Alma 7:12).
“Nasayud ko nga ang Manluluwas mibuntog sa kamatayon,” miingon si Merle. “Tungod niana, ako nasayud nga akong makita ang akong bana ug ang akong mga triplet ug ang tanan sa akong pamilya pag-usab.” Kana nga konbiksyon, siya miingon, nagkalig-on kada adlaw.
Mag-uban sa Paglakaw-lakaw
Si Alph ug Lucette Passeraub sa Lausanne, Switzerland, ganahan mag-uban sa paglakaw-lakaw. Ang usa sa ilang paborito nga lakaw-lakawan mao ang baybayon sa Lake Geneva, diin ang Alps nagbuntaog sa dagat. Duha ka tuig na ang milabay sa maong paglakaw-lakaw, ang mga Passeraub migahin sa gabii sa paghinumdom.
“Bisan usa pa ka tin-edyer, ako nangita sa kamatuoran,” miingon si Alph, 78 ang edad. “Ako kanunay moingon sa akong kaugalingon, Kon adunay Dios, Siya duna gyuy buhi nga propeta dinhi sa yuta. Anaa kanunay sa akong hunahuna kana.”
Samtang si Alph misugod sa iyang pag-eskwela human sa high school, usa ka higala miawhag kaniya sa pagtambong sa libreng klase sa Iningles nga gitudlo sa LDS nga mga misyonaryo. Human sa usa sa mga klase, ang mga misyonaryo midapit kaniya sa simbahan.
“Ang unang higayon nga mitambong ko, ang mga leksyon sa Sunday School mao ang mahitungod sa Amahan, sa Anak, ug sa Espiritu Santo isip tulo ka managlahi nga binuhat,” nahinumdom si Alph. “Ang magtutudlo miingon nga kita nasayud og daghan mahitungod sa Dios salamat sa mga pagtulun-an sa moderno nga propeta, si Joseph Smith, ug nga dunay mga buhing propeta karon. Ako nahingangha. Naghisgot sila kabahin sa unsay anaa sa akong kasingkasing sa dugay nang panahon.” Sa wala madugay siya nagpamiyembro sa Simbahan, “ug kada adlaw sukad niadto, ako nagmaya nga adunay mga propeta dinhi sa yuta.”
Si Lucette, nag-edad og 80, nagtubo isip usa ka bata sa Ikaduhang Gubat sa Kalibutan. “Kinahanglan kong motrabaho sa edad nga 14 ug wala gayud makahuman sa akong edukasyon,” miingon siya. “Apan akong nahibaloan nga ang Simbahan mihatag kanako og oportunidad sa pagpadayon sa pagkat-on.” Human makaserbisyo og full-time nga misyon, siya misugod sa pagpakig-date ni Alph. Naminyo sila sa templo, nagbaton og pamilya, ug karon naghinumdom sa ilang panaw nga naglakip sa 14 ka tuig isip presidente sa Primary sa ward si Lucettes, si Alph 32 ka tuig sa stake high council, kanunay nga pagbiyahe sa templo, pagbisita sa mga anak ug mga apo, ug sa kanunay, kanunay, nga mapasalamaton sa kamatuoran nga ilang gidawat sa batan-on pa sila.
“Napanalanginan kami nga magkauban sa paglakaw,” miingon si Lucette. “Ug sa matag lakang, ang among hugot nga pagtuo nalig-on.”
Nakat-on ko og daghan gikan niining mga higala kinsa mas magulang kay kanako. Sila si Larry ug Elizabeth nagtudlo nako sa pagdula sa nagkausab nga mga tahas sa kinabuhi uban sa dignidad ug uban sa tabang gikan sa Ginoo. Si Merle nagpakita nga ang hugot nga pagtuo sa paglahutay hangtud sa katapusan kinahanglan matukod pinaagi sa hugot nga pagtuo sa Manluluwas karon. Ug ang Passeraubs nagmaya sa ebanghelyo matag adlaw. Kadtong tanan mga leksyon nga makapalig-on nako sa dili pa mahuman ang akong panaw.