Inyo Nang Turno
Ni Bishop Gary E. Stevenson
Presiding Bishop
Gikan sa “Ang Inyong Upat ka Minuto,” Liahona, Mayo 2014, 84–86.
“Kini nga kinabuhi mao ang panahon … sa pagsugat sa Dios” (Alma 34:32).
Sa miaging tuig, ang mga tawo sa tibuok kalibutan nagtan-aw sa mga atleta gikan sa 89 ka nasud nga nagsangka sa 2014 Olympic Winter Games sa Sochi, Russia. Napulo niining mga atleta mga miyembro sa Ang Simbahan ni Jesukristo sa mga Santos sa Ulahing mga Adlaw. Gani ang tulo nila nakaangkon og mga medalya!
Pagkugi
Tuguti ko sa pagsulti kaninyo mahitungod ni Noelle Pikus-Pace, usa niining mga atleta nga Santos sa Ulahing mga Adlaw. Ang iyang dula mao ang skeleton. Hunahunaa nga magbiyahe nga mag-una ang ulo nga ang nawong mga pulgada lang ibabaw sa agianan subay sa nagliko-liko, nagka-ice nga track sa gipaspason nga 90 ka milya (145 km) kada oras, diha sa gamay kaayo nga sled! Sa Olympics, si Noelle adunay upat lamang ka minuto—upat ka tag-60 segundo nga dagan—aron maangkon ang iyang medalya.
Para kang Noelle, dili kini mao ang unang higayon nga siya miapil sa Olympics. Niadtong 2006 napiang ang iyang paa ug dili makadula sa Olympics. Niadtong 2010 wala siya makaangkon og medalya tungod sa ikanapulo sa usa ka segundo nga diperensya. Apan wala siya mohunong. Nagbansay siya sa daghang mga oras, adlaw, semana, ug bulan. Sa 2014 Olympics, hingpit kaayo ang iyang mga dagan! Nakadaog siya sa silver nga medalya!
Padayon sa Pagpaningkamot
Si Christopher Fogt sakop sa team nga nakadaug sa bronse nga medalya sa lumba sa four-man bobsled. Mahimo na unta siyang moundang tungod sa grabe nga disgrasya niadtong 2010 Olympics. Apan sama ni Noelle, siya mipadayon sa pagpaningkamot. Ug siya usab nakadaog og medalya!
Tabangi ang Uban
Ang snowboarder nga Santos sa Ulahing mga Adlaw nga gikan sa Australia, si Torah Bright, misurprisa sa kalibutan sa dihang nakamatikod siya nga ang American snowboarder nga si Kelly Clark nakulbaan human sa dili maayong unang dagan. Imbis nga magtutok sa iyang kaugalingong dagan, gigakos ni Torah si Kelly hangtud mikalma si Kelly. Tungod niining yano nga buhat sa pagkamabination gikan kang Torah, silang duha ang mibarug sa podium sa mananaug. Si Torah nakadaog og silver nga medalya ug si Kelly nakadaog sa bronse nga medalye. Kon kamo adunay higala o sakop sa pamilya kinsa nanginahanglan og pagdasig, tabangi usab sila.
Inyo Nang Turno!
Ang inyong kinabuhing dayon susama sa kasinatian niining mga atleta. Isip anak nga lalaki o anak nga babaye sa Dios, kamo mipuyo uban Kaniya. Kamo nag-andam sa pag-anhi dinhi sa yuta alang sa mubo nga panahon. Ang inyong kinabuhi dinhi sa yuta sama sa upat ka minuto para kang Noelle. Ang inyong mga binuhatan dinhi mohukom kon kamo makadaug sa ganti sa kinabuhing dayon.
Mga Checkpoint para Kaninyo
Sila si Noelle, Christopher ug Torah kinahanglan mohimo og pihong mga lakang aron mahimong mga atleta sa Olympics. Kamo adunay piho nga mga checkpoint aron makatabang ninyo nga makabalik sa Langitnong Amahan. Kini ang mga butang sama sa bunyag, pagdawat sa gasa sa Espiritu Santo, mga ordinasyon sa priesthood, mga ordinansa sa templo, ug pag-ambit sa sakrament matag semana.
Sa pagtabang kaninyo sa pagkab-ot sa inyong mga checkpoint, kinahanglan nga kada adlaw kamo nga mag-ampo ug magtuon sa kasulatan ug mosimba. Sunda ang mga sugo, tumana ang mga pakigsaad nga inyong gihimo, ug sunda ang mga sumbanan sa Ginoo. Kon kamo kinahanglan nga maghinulsol, hinumdumi ang milagro sa Pag-ula. Dili gyud mo pasagdahan sa Langitnong Amahan.
Hinumdumi, nangandam kamo para sa inyong panahon dinhi sa yuta. Kini mao ang inyong higayon nga mobuhat. Karon ang inyong panahon!