Ang Sinugdanan sa Bag-o nga Kinabuhi
Sa ting-init sa 2011, ang pamilyang Wundram andam na nga mobalhin gikan sa Guatemala ngadto sa Estados Unidos aron si Carlos Wundram, usa ka doktor, makapadayon og dugang nga mga pagtuon.
“Sa dihang andam na kami nga molarga,” mihinumdom siya, “adunay mipugong nako.” Ang iyang asawa, si Adriana, nakasinati sa samang pagbati, busa sila nag-ampo ug nakadawat og kumpirmasyon sa ilang mga kasingkasing nga dili sila mopadayon.
Gikanselar nila ang ilang mga plano—ug naglibog kon unsay gusto sa Dios para kanila. Upat ka bulan ang milabay ilang nasayran.
Si Carlos namiyembro sa Simbahan sukad 14 anyos pa siya apan mihunong sa pagsimba dihang misugod na siya sa pag-eskwela sa unibersidad sa edad nga 21.
Si Adriana, bisan og dili miyembro, dugay nang gusto nga maminyo sa usa ka Santos sa Ulahing mga Adlaw. Usa ka buotan niya nga higala, usa ka miyembro sa Simbahan, nagminyo og returned missionary kinsa malumo, mapinanggaon, ug maalagaron. Gusto ni Adriana og bana nga sama niana.
Sa dihang nagsugod pa sila og date, si Adriana ug Carlos wala maghisgot og relihiyon, apan si Carlos nagpakita og daghang mga kinaiya sama sa bana sa iyang higala. Siya wala molihok nga mas labaw kay kaniya. Human sila makasal ug makabaton og mga anak, mapasalamaton si Adriana nga si Carlos ang mopaligo sa mga bata ug moilis sa mga diaper!
Samtang nagtubo ang ilang tulo ka mga anak, “kami naghunahuna nga kinahanglang mas maduol kami sa Dios,” miingon si Carlos. Wala nila makaplagi ang ilang gipangita sa Kristiyano nga simbahan kon asa sila nanambong nianang higayona, apan ang pagbati nga kinahanglang magpaduol sila sa Dios nagpadayon.
Human nila gikanselar ang ilang plano sa pagbalhin ngadto sa Estados Unidos, ang mga Wundram mihukom nga paninduton ilang balay, lakip sa pagbutang og bag-ong mga bintana. Diha-diha dayon naganahan sila sa tawo kinsa miinstalar sa bintanan, si José Mena. Usa ka adlaw naghisgot sila kabahin og relihiyon. Siya miingon nga siya miyembro sa Ang Simbahan ni Jesukristo sa mga Santos sa Ulahing mga Adlaw, ug si Carlos mitubag nga siya usab apan taud-taud na nga wala mosimba.
Sa sunod higayon nga si Brother Mena mitrabaho sa mga bintana, siya midala og Basahon ni Mormon ug kopya sa Liahona para sa kada sakop sa pamilya. Nagbasa sa magasin, si Carlos misugod sa pagsinati sa pamilyar nga espirituhanong mga pagbati. Dayon si Brother Mena midapit kanila sa pagtambong sa open house sa Quetzaltenango Guatemala Temple.
Sa dihang misulod sa templo, ang mga anak sa pamilyang Wundram nangutana, “Pa, unsay atong buhaton aron mamiyembro niini nga Simbahan?” Sa ilang pagbiya, ang ilang kinamanghuran, si Rodrigo, edad 10, nagpabilin pa ug, sa tabang sa iyang inahan, misulat sa kard nga naghangyo nga bisitahan sa mga misyonaryo.
Ang pamilya nakighimamat sa mga misyonaryo. “Dili ko gusto nga pugson ang akong pamilya nga magpabunyag,” miingon si Carlos. “Apan sila mismo mibati sa Espiritu.”
Si Adriana ug ang mga bata nabunyagan niadtong Disyembre 2011, pipila ka adlaw sa wala pa ang pagpahinungod sa Quetzaltenango Temple. “Ang dako nga panalangin nga gihatag sa Dios kanako mao nga ako ang mibunyag kanila,” miingon si Carlos. Paglapas sa usa ka tuig, ang pamilya nabugkos didto sa templo, malipayon nga okasyon para nilang tanan.
Ang Oportunidad nga Mabugkos
Sa dihang si Ana Victoria Hernández, kinsa dili miyembro sa Simbahan, naminyo kang Belbin Calderón, si Belbin usa ka miyembro apan wala magsimbahan tungod kay magtrabaho siya ma-Dominggo. Si Belbin miingon nga usa ka kusog nga pagbati ang mipabalik kaniya. Siya mihinumdom, “Mihunong ko sa akong trabaho kay gusto ko nga mobalik sa simbahan.” Sa dihang naaktibo na siya pag-usab, ang iyang asawa nakamatikod nga siya mas mapainubsanon, ug mas nagkahiusa sila sa ilang panimalay.
Si Belbin nanghinaut nga ang iyang asawa mainteresado sa ebanghelyo, apan wala gyud niya dasiga. Usa ka Dominggo samtang nagtrapo sa abug sa bookcase, si Ana Victoria nakadiskobre sa usa sa mga basahon ni Belbin kabahin sa kasaysayan sa Simbahan. Nakuryuso, iya kining gisugdan pagbasa. Ang mga istorya sa sakripisyo sa mga pioneer nakatandog gyud kaniya.
Paglabay sa pipila ka semana, miabut ang Oktubre 2011 nga Liahona, usa ka espesyal nga isyu kabahin sa Basahon ni Mormon. Usab tungod sa kakuryuso, si Ana Victoria misugod sa pagbasa sa Basahon ni Mormon. Sa wala madugay siya nakaamgo nga kini dili lang kasaysayan apan mga pulong usab sa propeta. Siya misugod sa pagtambong sa miting sa sakrament uban sa iyang bana ug mga anak.
Dayon siya ug ang iyang pamilya mibisita sa open house sa Quetzaltenango Temple. Si Ana Victoria natandog sa dihang iyang nakat-unan nga ang iyang pamilya mahimong mabugkos sa kahangturan. “Kana adunay dakong epekto ngari kanako. Mibati ko sa panginahanglan nga mabugkos ngadto kanila,” mihinumdom siya. Misugod siya sa pagpaminaw sa mga leksyon sa misyonaryo ug nabunyagan niadtong Disyembre 7, 2011. Mitambong siya sa pagpahinungod sa templo paglabay sa upat ka adlaw.
Si Brother ug Sister Calderón nabugkos diha sa templo uban sa ilang mga anak niadtong Disyembre 2012. Si Ana Victoria miingon nga dili siya kahulagway sa iyang kalipay nga “nasayud nga akong makauban ang akong pamilya sa kahangturan.” Si Belbin mitawag sa kasiguroan sa ilang pagbugkos “ang labing dako nga panalangin nga posible nakong mahunahuna.”
Ang Templo Nakatandog sa Iyang Espiritu
Ang pagtukod og templo sa Quetzaltenango, Guatemala, nakatuman sa damgo ni Mónica Elena Fuentes Álvarez de Méndez. Siya anak nga babaye sa usa ka pioneer sa Simbahan kinsa misilsil kaniya sa gugma sa ebanghelyo ug sa mga panalangin niini. Ang iyang inahan, si Magda Ester Álvarez, nabunyagan niadtong 1953, unom ka tuig human ang mga misyonaryo sa Santos sa Ulahing mga Adlaw unang miabut sa Guatemala.
Si Mónica nagdako sa Simbahan ug sa katapusan naminyo og buotan nga tawo, si Enio Méndez, kinsa dili miyembro. Misuporta siya sa iyang asawa ug anak nga babaye sa mga kalihokan sa Simbahan ug midayeg sa mga miyembro niini, apan wala mopakita og interes nga magpabunyag. Bisan pa niana, si Mónica nakahinumdom sa iyang inahan nga misulti kaniya nga moabut ang adlaw nga ang iyang bana mamiyembro. “Wala ko mawagtangi og pagtuo,” siya miingon, bisan tuod og siya walay ideya unsay makapakabig sa iyang bana.
Ang iyang inahan nakatagamtam sa mga panalangin sa panagsa nga pagbisita sa templo sa Siyudad sa Guatemala ug napuno sa kalipay niadtong 2006 sa dihang gipahibalo nga tukuran og templo ang Quetzaltenango. Apan si Magda Álvarez nag-antus og sakit nga wala nay kaayohan ug namatay niadtong 2008, sa wala pa matukod ang templo sa Quetzaltenango.
Si Mónica ug ang iyang hamtong nga anak nga babaye, si Mónica Ester Méndez Fuentes, nagserbisyo isip tiggiya panahon sa open house sa Quetzaltenango Temple. Si Enio mitambong sa open house uban kanila, ug wala sila masayud niini, siya mibalik og kaduha pa.
Dungan nga nagbiya sa templo sa katapusang adlaw sa open house, si Mónica ug ang iyang anak nga babaye naghunahuna kon ang panagna ni Magda Álvarez kabahin ni Enio matinuod.
Si Enio kanunay nagtuo nga madawat niya nga siya miyembro sa iyang simbahan ug ang iyang asawa ug anak miyembro sa ilang simbahan basta morespeto lang sa pagtuo sa usag usa. Apan ang iyang mga kasinatian sa open house sa templo mas nakapahunahuna niya. “Misugod ko sa pagpuasa, nga wala magpahibalo kanila, ug nag-ampo,” siya mihinumdom. Miadto siya sa kabukiran, diin siya ganahan nga mamalandong. “Nangutana ko sa Ginoo, ‘Unsay angay nakong buhaton?’” Sa pagkatinuod, siya nahibalo na kon unsa ang eksakto, apan kinahanglan niyang sulbaron ang iyang mga pagduha-duha.
Si Enio nabunyagan niadtong Abril 2012—makapatandog kaayo nga okasyon para sa iyang asawa ug sa iyang anak nga babaye.
Ang pamilyang Méndez nabugkos didto sa Quetzaltenango Temple niadtong Oktubre 2013. Si Sister Méndez mipahayag sa ilang hingpit nga kalipay sa usa ka mahangturong tumong nga nakab-ut ug ang ilang paglaum nga magmatinud-anon hangtud sa katapusan sa ilang kinabuhi.