Mensahe sa Unang Kapangulohan
Pagpamatuod ug Pagkakabig
Ni Presidente Henry B. Eyring
Unang Magtatambag sa Unang Kapangulohan
May kalainan tali sa pagdawat sa pagpamatuod sa kamatuoran ug sa tinuoray nga pagkakabig. Sama pananglit, ang halangdong Apostol nga si Pedro mipamatuod sa iyang pagsaksi sa Manluluwas nga siya nasayud nga si Jesus mao ang Anak sa Dios.
“Si [Jesus] miingon kanila, Apan kamo unsa may inyong sulti kinsa man ako?
“Si Simon Pedro mitubag nga nag-ingon, Ikaw mao ang Kristo, ang Anak sa Dios nga buhi.
“Kaniya mitubag si Jesus nga nag-ingon, Dalaygon ikaw, Simon Barjona: kay wala kini ipadayag kanimog tawo, kondili gipadayag kini kanimo sa akong Amahan nga anaa sa langit” (Mateo 16:15–17).
Ug sa wala madugay, sa Iyang sugo ni Pedro, ang Ginoo mihatag kaniya ug kanato og usa ka giya aron tinuoray nga makabig ug sa pagpadayon niana nga pagkakabig sa tibuok kinabuhi. Si Jesus miingon niini nga paagi: “Sa mahibalik na ikaw kanako, lig-una ang imong mga igsoon” (Lucas 22:32).
Si Jesus nagtudlo kang Pedro nga aduna pay dakong kausaban nga kinahanglang mahitabo nga labaw pa sa pagbaton og pagpamatuod ngadto sa paghunahuna, pagbati, ug paglihok isip tinuod nga kinabig nga mga disipulo ni Jesukristo. Kana mao ang dakong kausaban nga gitinguha natong tanan. Sa higayon nga ato kining maangkon, kinahanglan nato nga ipadayon kana nga kausaban hangtud sa katapusan sa atong mortal nga pagsulay (tan-awa sa Alma 5:13–14).
Kita nasayud gikan sa atong kasinatian ug sa pag-obserbar sa uban nga ang pagbaton og espirituhanong gahum sa pipila ka talagsaong panahon dili paigo. Si Pedro milimod nga siya nakaila sa Manluluwas bisan human na siya nakadawat og saksi pinaagi sa Espiritu nga si Jesus mao ang Kristo. Ang Tulo ka mga Saksi sa Basahon ni Mormon adunay direkta nga pagpamatuod nga ilang nadawat nga ang Basahon ni Mormon pulong sa Dios, apan sa wala madugay sila napakyas sa ilang abilidad sa pagpaluyo ni Joseph Smith isip Propeta sa Simbahan sa Ginoo.
O, Bulahang Jesus, ni Walter Rane
Kita nagkinahanglan og kausaban sa atong kasingkasing, sama sa gihulagway diha sa basahon ni Alma: “Ug silang tanan mipahayag ngadto sa mga katawhan sa sama nga butang—nga ang ilang mga kasingkasing nausab; nga sila wala nay tinguha sa pagbuhat og dautan” (Alma 19:33; tan-awa usab sa Mosiah 5:2).
Ang Ginoo mitudlo kanato nga kon kita tinud-anay nga nakabig sa Iyang ebanghelyo, ang tinguha sa atong kasingkasing dili para sa atong kaugalingon apan sa pagbayaw sa uban samtang sila naglambo padulong sa kinabuhing dayon. Sa pag-angkon niana nga pagkakabig, kita mag-ampo ug motrabaho nga may pagtuo nga mahimong bag-ong nilalang nga nahimong posible pinaagi sa Pag-ula ni Jesukristo.
Makasugod kita pinaagi sa pag-ampo alang sa hugot nga pagtuo nga maghinulsol sa kahakog ug alang sa gasa sa pag-amuma sa uban labaw pa sa atong kaugalingon. Makaampo kita alang sa gahum sa pagbuntog sa garbo ug kasina.
Ang pag-ampo mao usab ang yawe sa pagdawat sa gasa sa gugma para sa pulong sa Dios ug kang Kristo (tan-awa sa Moroni 7:47–48). Kining duha mag-uban. Samtang kita magbasa, mamalandong, ug mag-ampo para sa pulong sa Dios, kita maganahan pag-ayo niini. Ang Ginoo mobutang niini diha sa atong kasingkasing. Samtang mobati kita nianang gugma, magsugod kita nga mas mahigugma sa Ginoo. Uban niana moabut ang gugma para sa uban nga atong gikinahanglan aron sa paglig-on niadtong giandam sa Dios nga atong mahimamat diha sa atong dalan.
Sama pananglit, kita makaampo sa pag-ila niadtong gusto sa Ginoo nga tudloan sa mga misyonaryo. Ang full-time nga mga misyonaryo makaampo nga may pagtuo aron masayud pinaagi sa Espiritu unsay itudlo ug ipamatuod. Sila makaampo nga may pagtuo nga ang Ginoo motugot nila nga mobati sa Iyang gugma sa tanan nga ilang mahimamat. Ang mga misyonaryo dili makabunyag ug makahatag sa gasa sa Espiritu Santo sa tanan nga ilang mahimamat. Apan ilang mabatunan ang Espiritu Santo isip kauban. Pinaagi sa ilang pagserbisyo ug tabang sa Espiritu Santo, ang mga misyonaryo, sa igong panahon, mausab diha sa ilang kasingkasing.
Kana nga kausaban kanunay mabag-o samtang sila ug kita walay hinakog nga magpadayon sa tibuok kinabuhi nga molihok nga may hugot nga pagtuo sa paglig-on sa uban sa ebanghelyo ni Jesukristo. Ang pagkakabig dili lang usa ka panghitabo o butang nga molungtad lang og usa ka panahon sa kinabuhi apan usa ka padayon nga proseso. Ang kinabuhi magkahayag hangtud sa hingpit nga adlaw, sa dihang atong makita ang Manluluwas ug makakaplag nga kita mahisama Kaniya. Ang Ginoo mihulagway sa panaw niining paagiha: “Kana nga gikan sa Dios mao ang kahayag; ug siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw kahayag ug labaw nga kahayag hangtud sa hingpit nga adlaw.” (D&P 50:24).
Mosaad ko kaninyo nga posible kini natong tanan.
Pagtudlo niini nga Mensahe
Si Elder David A. Bednar sa Korum sa Napulog Duha ka mga Apostoles migamit sa “sambingay sa atsara” sa pagtudlo nga ang pagkakabig padayon nga proseso kaysa usa ka higayon nga hitabo: “Sugo ibabaw sa sugo ug lagda ibabaw sa lagda, sa hinay-hinay ug hapit dili mamatikdan, ang atong mga hunahuna, ang atong mga pulong, ug ang atong mga binuhatan magasubay sa kabubut-on sa Dios” (“Kinahanglan Matawo Kamo Pag-usab” Liahona, Mayo 2007, 19). Ikonsiderar sa pagribyu sa sambingay sa atsara niadtong inyong gitudloan. Unsay atong mahimo nga kanunayng magpadayon sa hinay-hinay nga proseso sa pagkakabig nga gihisgutan nila ni Presidente Eyring ug Elder Bednar?