Unsay Atong Nasayran kabahin sa Kinabuhi sa Wala pa dinhi sa Yuta

Ni Norman W. Gardner

Mga Seminary ug Institute

Ang sukaranang mga kamatuoran sa kinabuhi sa wala pa kita moanhi sa yuta nagpanalangin kanato og talagsaong mga ideya.

Usa ka batan-ong lalaki nga nakahukom nga magminyo kay sa mag-misyon giawhag sa pagkuha una sa iyang patriyarkal nga panalangin. “Atol sa pagpanalangin, daklit niyang nakita kon si kinsa siya didto sa kalibutan sa wala pa dinhi sa yuta. Nakita niya kon unsa siya ka maisugon ug epektibo sa pag-aghat sa uban aron mosunod kang Kristo. Dihang nakaila siya kinsa siya, mahimo kaha nga dili siya magmisyon?”¹ Kini usa lang ka ehemplo kon sa unsang paagi ang kahibalo sa kinabuhi sa wala pa dinhi sa yuta makahimo og kalainan ngari kanato.

“Pila ang inyong edad?” sayon ra kining tubagon. Ang birthday nagsukod sa panahon sa atong pisikal nga lawas. Apan sa tinuoray, kita mas maguwang pa niana. Matag usa kanato “hinigugmang espiritu nga anak nga lalaki ug babaye sa langitnong mga ginikanan” nga adunay “kinaiya sa pagkadios ug kalagmitan nga mahimong usa ka dios.”² Sa wala pa ang atong mga espiritu nga lawas gilalang, kitang tanan anaa isip “kaalam sa espiritu,” nga “walay sinugdanan, ni adunay pagkatapos.”³

Sa atong kinabuhi sa wala pa dinhi sa yuta, kita gitudloan og mga leksyon nga nag-andam kanato sa pagtabang sa Langitnong Amahan sa pagpahinabo sa kaluwasan sa Iyang mga anak (tan-awa sa D&P 138:56). Kita usab adunay kabubut-on sa pagsunod ug pagtuman sa Dios. Pipila sa mga anak sa Amahan mailhan pinaagi sa ilang “naghingapin nga hugot nga pagtuo ug maayo nga mga buhat” ug giorden nang daan, o gihatagan og mga buluhaton, sa pagserbisyo sa piho nga mga paagi dinhi sa yuta (Alma 13:3). Ang pinakabantugan nga misunod sa Langitnong Amahan niining panahona mao ang Iyang unang natawo nga espiritu nga anak, si Jesukristo—o Jehova, ingon nga nailhan Siya didto.

Si Propeta Joseph Smith mipasabut nga samtang kita didto pa sa kinabuhi sa wala pa dinhi sa yuta, kitang tanan anaa sa dihang ang Dios nga Amahan mipasabut sa Iyang plano sa kaluwasan ngadto sa Iyang mga anak. Atong nasayran nga ang Manluluwas gikinahanglan aron sa pagbuntog sa mga problema nga dala sa mga kondisyon sa mortal nga kinabuhi.⁴

Ang atong Amahan sa Langit nangutana, “Kang kinsa Ako mopadala [aron mahimong Manluluwas]?” Si Jesus mitubag, “Ania Ako, ipadala ako” (Abraham 3:27). Siya ang “Hinigugma ug Pinili sukad sa sinugdanan” (Moises 4:2) sa Amahan ug sa kanunay maoy gipasabut nga motuman niini nga tahas. Apan si Lucifer mibalda ug mihalad sa iyang kaugalingon uban sa usa ka tanyag nga mopawala unta sa kabubut-on sa tawo ug mohimaya ni Lucifer ibabaw sa trono sa Dios (tan-awa sa Moises 4:1–4). Ang atong Langitnong Amahan mitubag, “Ako mopadala sa una” (Abraham 3:27). Mirebelde si Lucifer ug nailhan nga si Satanas.

Ang pagkabahin sa mga espiritu nakamugna og gubat sa langit. Ikatulo nga bahin sa mga anak sa Dios mibiya Kaniya ug misunod ni Satanas (tan-awa sa D&P 29:36–37). Kining masinupakon nga mga espiritu gihikawan sa pisikal nga lawas, gibalhog ngadto sa yuta, ug nagpadayon sa pagpakiggubat batok sa mga Santos sa Dios (tan-awa sa D&P 76:25–29). Ang nahibiling mga anak sa Dios misinggit sa kalipay tungod kay sila makaanhi sa yuta ug tungod kay si Jesukristo ang napilian sa pagbuntog sa sala ug kamatayon (tan-awa sa Job 38:7).

Sa kinabuhi sa wala pa dinhi sa yuta, kita nakaangkon og kahibalo sa ebanghelyo, pagpamatuod, ug hugot nga pagtuo sa Manluluwas ug sa Iyang Pag-ula. Kining mga butanga nahimong importante nga proteksyon ug kalig-on sa gubat sa langit. Kadtong misunod sa Dios nakabuntog ni Satanas ug sa Iyang mga anghel “pinaagi sa dugo sa Kordero, ug sa pulong sa ilang pagpanghimatuod” (Pinadayag 12:11). Kon kita makakat-on sa ebanghelyo ug makaangkon og pagpamatuod dinhi sa yuta, kita sa lintunganay nagkat-on pag-usab sa atong nahibaloan ug nabati sa atong kinabuhi sa wala pa dinhi sa yuta.

Sama nga kita dili makahinumdom sa unang pipila ka tuig sa mortal nga kinabuhi, ang atong panumduman sa kinabuhi sa wala pa dinhi sa yuta gipugngan. Kini kinahanglan aron sa pagtabang kanato nga makat-on nga maglakaw pinaagi sa hugot nga pagtuo ug mag-andam kanato nga mahisama Kaniya. Apan kita makasiguro nga kita nakaila ug mihigugma sa atong Langitnong Amahan. Si Presidente Ezra Taft Benson (1899–1994) misaad nga “walay laing butang nga mas makapatingala nato kon kita moagi na sa tabil ngadto sa pikas kalibutan kay sa pagkaamgo kon unsa nato kaila ang atong Amahan ug unsa kapamilyar ang Iyang nawong ngari kanato.”⁶

Si Presidente Boyd K. Packer, Presidente sa Korum sa Napulog Duha ka mga Apostoles, mitudlo: “Walay paagi nga makasabut sa kinabuhi kon wala ang kahibalo kabahin sa doktrina sa kinabuhi sa wala pa dinhi sa yuta. … Kon kita nakasabut sa doktrina sa kinabuhi sa wala pa dinhi sa yuta, nan ang mga butang magkahiuyon ug masabtan.”⁷