Patriyarkal nga mga Panalangin: Dinasig nga Giya alang sa Inyong Kinabuhi

Sa Simbahan adunay duha ka matang sa patriyarka: (1) mga amahan ug (2) mga lalaki kinsa gi-orden ngadto sa katungdanan sa patriyarka sa Melchizedek Priesthood. Ang mga amahan kinsa naghupot sa Melchizedek Priesthood makahatag og mga panalangin sa ilang mga sakop sa pamilya, apan kini nga mga panalangin wala marekord sa Simbahan, hinoon kini mahimong i-rekord sa pamilya. Sa laing bahin, ang mga panalangin nga gihatag ngadto sa takus nga mga miyembro sa Simbahan pinaagi sa gi-orden nga patriyarka gi-rekord sa Simbahan; kini nga mga panalangin gitawag og “patriyarkal nga mga panalangin.”

Ang mga patriyarka mohatag og mga panalangin sumala sa inspirasyon sa Espiritu Santo. Ang inyong patriyarkal nga panalangin mahimong maglakip og mga pasidaan ug saad, ug kini mopadayag sa unsay gilauman sa Ginoo kaninyo ug unsa ang inyong potensyal. Ang gisaad nga mga panalangin matuman sa panahon sa Ginoo—sumala sa inyong pagkamatinud-anon. Pinaagi lang sa pagsunod sa tambag diha sa panalangin nga inyong madawat ang gisaad nga mga panalangin. Pipila sa mga panalangin mahimong mahitabo sa sunod nga kinabuhi. Ang inyong patriyarkal nga panalangin dili mohatag sa kompleto nga mga detalye sa inyong kinabuhi. Kon wala kini maghisgut og full-time nga misyon o kaminyoon diha sa templo, sama pananglit, kana wala magpasabut nga kamo wala na nianang oportunidad.

Ang inyong patriyarkal nga panalangin mopahayag usab sa inyong kagikan sa kaliwatan diha sa balay ni Israel—kamo mahimong gikan sa tribo ni Ephraim, Judah, Manasseh, o usa sa ubang tribo.¹ Kini nga kagikan sa kaliwatan importante tungod sa pakigsaad ni Abraham, nga naglakip sa mga saad sa Ginoo ngadto ni Abraham nga pinaagi sa iyang kaliwat ang “tanan nga mga banay sa yuta pagapanalanginan, gani uban sa mga panalangin sa Ebanghelyo” (Abraham 2:11). Ang tanang mga miyembro sa Simbahan nahisakop sa balay ni Israel, ma-literal man nga kaliwat o sinagop sa espiritwal nga paagi. Sa ingon, kita adunay usa ka tahas sa pagpakatap sa ebanghelyo ngadto sa kalibutan.

Aron makadawat og patriyarkal nga panalangin, pakig-istorya sa inyong bishop o presidente sa branch, kinsa makahatag ninyo og rekomend aron makadawat niini. Mas mapanindot ninyo ang inyong kasinatian kon kamo magpuasa ug mag-ampo sa dili pa modawat niini. Ang suod nga mga sakop sa pamilya mahimong maanaa inigdawat ninyo sa inyong patriyarkal nga panalangin.

Human madawat ang inyong panalangin, usa ka giimprinta nga kopya niini ipadala kaninyo. Kompidensyal kini; ang tambag ug mga saad para lang nimo ug dili angay nga kaswal ra nga ipakigbahin kini ngadto sa uban. Tun-i kini kanunay; kini mohatag og giya, kahupayan, ug proteksyon.