Atong Luna

Pagpakigbahin sa Talan-awon ug sa Basahon ni Mormon

Samtang nagserbisyo ko isip misyonaryo sa usa ka gamay nga lungsod sa Wales, ang akong kompanyon ug ako nag-tracting sa usa ka dalan nga mopaingon ngadto sa usa sa daghang mga bungtod didto. Usa kadto ka mainit nga adlaw. Sa among pag-abut sa ibabaw sa bungtod, ang talan-awon nindot kaayo, mao nga ang akong kompanyon ug ako nakahukom nga mopahulay og kadiyot aron malingaw sa talan-awon ug mobalik ang among kalagsik.

Sa akong pagkuha sa orange gikan sa akong backpack, akong nakita ang Insik nga babaye nga nagtungas sa bungtod. Wala ko masayud kon ngano, apan mikaway-kaway ko niya. Malipayon siyang mibalos pagkaway-kaway ug miduol aron molingkod tupad namo. Nag-istorya mi, ug siya mipasabut nga siya mitungas sa bungtod aron malingaw sa talan-awon tungod kay kini nagpahinumdom kaniya sa Dios ug sa Iyang gugma alang kaniya. Misulti usab siya namo nga mouli na unta siya sa China sa dihang adunay gitanyag nga trabaho sa Wales. Gidawat niya kini, nagtuo nga ang Dios mihatag niini nga trabaho alang sa usa ka rason nga wala niya masayri.

Sa wala madugay human niining unang miting, nagsugod kami sa pagtudlo niya sa panimalay sa usa ka bag-ong kinabig ug mipakigbahin og daghang espiritwal nga mga panahon. Usa niini nga akong gipakabililhon pag-ayo. Gihatagan namo siya og kopya sa Chinese nga Basahon ni Mormon uban sa among mga pagpamatuod nga gisulat sa atubangan. Ang Espiritu kusog kaayo nga siya misugod sa paghilak.

Sa wala madugay, nabalhin ako sa laing dapit. Walay swerte, ako dili makabalik ngadto sa dapit alang sa iyang bunyag, apan nakapalig-on nako kanunay ang paghinumdom sa among unang panagkita sa ibabaw sa bungtod.

Jurek Bäder, Germany

Mag-uban Hangtud sa Kahangturan

“Pamilya mahimong manag-uban sa kahangturan pinaagi sa plano sa Langitnong Amahan” (“Pamilya Mahimong Manag-uban sa kahangturan,” Songbook sa mga Bata, nu. 98). Ganahan ko niini nga kanta sa Primary, diin nagtudlo nga ang mga pamilya mabugkos sa kahangturan. Nag-ampo ko nga kini mahimong tinuod alang sa akong pamilya, ilabi na human mamatay ang akong amahan.

Bag-ohay lang nga ang Ginoo mitubag sa akong pag-ampo. Ang akong inahan, akong duha ka igsoong mga lalaki, ug ako mibiyahe ngadto sa Manila Philippines Temple aron mabugkos sa usag usa ug ngadto sa akong amahan. Mao kadto ang among unang panahon nga magkauban didto sa templo, ug nakahinumdom gihapon ko sa kalipay nga akong nakita sa akong inahan ug mga igsoon. Dihay dakong pagbati sa kalipay.

Ako nasayud nga ang templo mao ang balay sa Ginoo ug nga kadtong anaa sa templo dunay tukma nga awtoridad sa pagpahigayon sa sagradong mga ordinansa. Mapasalamaton kaayo ko nga pinaagi niini nga mga ordinansa, makauban sa akong pamilya ang akong amahan pag-usab. Sukad sa pag-adto sa templo, naningkamot kami nga mahimong usa ka mas lig-on nga pamilya ug mobuhat sa tanan nga among mahimo sa pagtuman sa among mga pakigsaad aron kami magkauban sa kahangturan.

Crisanto Coloma, Philippines