“Akong mga Adlaw” kabahin sa mga Templo ug sa Teknolohiya
Ni Elder Neil L. Andersen
Sa Korum sa Napulog Duha ka mga Apostoles
Gikan sa pakigpulong, “Find Our Cousins,” nga gipamulong sa debosyonal sa Family Discovery Day para sa mga batan-on dungan sa RootsTech 2014 Family History Conference sa Salt Lake City, Utah, niadtong Peb. 8, 2014. Aron mas makat-un, bisitaha ang lds.org/go/Andersen215. Aron motan-aw sa pakigpulong karong tuiga inigka Pebrero 14, bisitaha ang lds.org/discoverfamily.
Kini ang inyong mga adlaw nga mas mobati sa inyong mga kasingkasing ngadto sa inyong katigulangan ug modala sa makaluwas nga mga ordinansa sa minilyon sa inyong mga pamilya.
Naghunahuna ba mo kon nganong gipadala mo dinhi sa yuta karon kay sa laing panahon sa kasaysayan? Unsa kahay bation nga mobarug sa kiliran ni Moises o mahimong higala ni Maria, ang inahan ni Jesus? Unsa kaha kon magpuyo sa Nauvoo sa dihang si Propeta Joseph milakaw sa karsada, o moapil sa ubang mga tin-edyer samtang sila mibira ug mitulod sa ilang mga kariton sa liboan ka milya ngadto sa bag-o nga panimalay sa Walog sa Salt Lake?
Usahay kami motan-aw sa nanglabayng mga adlaw o sa lain-laing mga dapit ug mangutana, “Nganong dili ako? Nganong ania ko dinhi, ug nganong karon?”
Dili kamo ang unang naghunahuna kabahin sa panahon ug dapit sa inyong kinabuhi. Usa ka buhing propeta nga nagpuyo sa Amerika nangutana sa sama nga mga pangutana. Iyang ngalan mao si Nephi—dili si Nephi sa sinugdanan sa Basahon ni Mormon apan si Nephi ang anak nga lalaki ni Helaman ang ikaduha ug apo sa tuhod ni propeta Alma ang Batan-on.
Sa kalibutan diin nagpuyo si Nephi, kwarta, gahum, ug popularidad mas importante kaysa unsay matarung. Daghang tawo dayag nga mibaliwala sa mga sugo. Sila namakak, mangawat, ug wala tumana ang balaod sa kaputli. Kadtong nagsunod sa mga sugo gibiay-biay ug dili tarungon og tagad (tan-awa sa Helaman 7:4–5, 21; 8:2, 5, 7–8).
“Sa diha nga si Nephi nakakita [niining mga butanga], ang iyang kasingkasing napuno uban sa kasubo … ug siya [misinggit] diha sa hilabihan nga kasakit sa iyang kalag:
“O, nga ako unta nakaangkon sa akong mga adlaw diha sa mga adlaw nga ang akong amahan nga si Nephi sa sinugdanan mibiya gikan sa yuta sa Jerusalem, nga ako unta nakaangkon og hingpit nga kalipay uban kaniya didto sa gisaad nga yuta; niana nga panahon ang iyang mga katawhan sayon nga hangyoon, ug lig-on nga naghupot sa mga sugo sa Dios, ug dili dali nga dad-on sa pagbuhat sa dautan; ug sila dali sa pagpamati ngadto sa mga pulong sa Ginoo—
“Oo, kon ang akong mga adlaw nakaabut pa unta niadto nga mga adlaw, niana nga panahon ang akong kalag unta nakaangkon og hingpit nga kalipay diha sa pagkamatarung sa akong mga kaigsoonan” (Helaman 7:6–8).
Si Nephi usa ka talagsaon nga propeta sa Dios, apan sa makadiyot naghunahuna siya kon nganong siya nagpuyo sa yuta sa iyang panahon. Siya nasayud nga ang Manluluwas matawo sa yuta sa dili na madugay, apan sa karon, ingon og ang maanindot nga hitabo nga hapit na mahitabo daw layo pa para kaniya.
Sa 20 lang ka tuig gikan sa panahon nga siya namulong, usa ka gabii ang molabay nga walay kangitngit ug si Jesus matawo sa Bethlehem. Sulod sa 55 ka tuig, ang Manluluwas, nabanhaw ug nahimaya, manaog gikan sa langit ngadto sa mga Santos diha sa yuta sa Bountiful. Ang anak nga lalaki ni Nephi anaa didto, ug ang Manluluwas personal nga motawag niya ug mo-orden kaniya isip usa sa napulog duha ka disipulo nga gipili sa Kasadpang bahin sa Kalibutan. Atong mahunahuna nga ang mga anak ug mga apo ni Nephi anaa taliwala sa 2,500 ka mga Santos kinsa gidapit ni Kristo nga tagsa-tagsang moduol ug personal nga mobati sa agi sa lansang sa Iyang mga kamot ug tiil. Dili lisud tuohan nga ang mga apo sa tuhod sa Nephi anaa taliwala sa gagmayng mga bata nga tagsa-tagsang gipanalanginan sa Manluluwas ug gialirongan sa kalayo ug gialagaran sa mga anghel. Klarong nakita ni Nephi ang kaugmaon sa iyang matarung nga pamilya ug mga higala, sigurado dili niya usabon ang panahon sa iyang pagka-mortal.
Mapasalamaton, si Nephi nagpabiling matarung, mitudlo sa mga tawo uban sa kaisug, naghimo og mga milagro, ug uban ni propetang Samuel nanagna sa hapit na mahitabo nga pag-anhi sa Manluluwas. Ang Ginoo sa Iyang mga pulong misaad nga Iyang panalanginan si Nephi hangtud sa kahangturan (tan-awa sa Helaman 10–11; 16).
Bisan tuod naghunahuna siya kabahin sa iyang panahon ug dapit, iya kining gitapos gamit ang hilabihan ka gamhanan nga mga pulong: “Tan-awa, … kini ang akong mga adlaw” (Helaman 7:9).
Akong batan-ong mga kaigsoonan, kini ang inyong mga adlaw. Kamo gipili nga mabuhi sa katapusang katuigan sa dili pa mobalik ang Manluluwas dinhi sa yuta. Kita wala masayud sa tukmang adlaw o tuig sa Iyang pag-anhi, apan dali natong makita ang mga timailhan nga nag-una sa Iyang pag-anhi.1
Usa ka adlaw, sama ni Nephi nga nakaamgo sa iyang importante nga tahas sa pag-andam sa pag-anhi sa Manluluwas ngadto sa mga Nephite, kita mohinumdom ug motan-aw sa mahimayaong panalangin nga atong naangkon sa pagpuyo niining atong panahon samtang atong andamon ang kalibutan sa pagbalik sa Manluluwas. Molantaw kita lapas sa mga kalisud ug babag nga atong giatubang ngadto sa atong importanting mga katuyoan ug mahimayaon nga mga adlaw sa umaabut. Atong ipalanog ang pulong ni Nephi: “Kini mao ang akong mga adlaw.”
Tungod kay kini inyong mga adlaw, unsay gihangyo sa Ginoo kaninyo? Una, inyong dalhon sa inyong kaugalingon ang pangalan ni Jesukristo. Pagkat-on Kaniya ug sa Iyang gugma ug sa dili ikahulagway sa pulong nga kaayo para kaninyo ug tinguhaa nga kanunay ninyong sundon ang Iyang mga sugo. Kamo kinahanglang mosunod sa Manluluwas, mohigugma sa Dios, ug moserbisyo niadtong naglibut kaninyo. Kitang tanan adunay pribelihiyo nga magkinabuhi isip mga disipulo ni Kristo, ingon nga gigiyahan sa Iyang Espiritu ug magbayaw niadtong naglibut kanato.
Usa ka Sagrado nga Katungdanan
Pipila ka kasinatian giandam para sa piho nga mga henerasyon. Gusto kong maghisgot kabahin sa usa sa inyong sagrado nga katungdanan nga wala pa gayud mahisama sa nangaging henerasyon.
Mga pipila pa lang ka tuig nga ang mga templo nahimong anaa sa tibuok kalibutan. Uban sa pagpahinungod sa Phoenix Arizona Temple niadtong Nobyembre 16, 2014, karon kita adunay 144 ka magamit nga mga templo sa kalibutan. Sa dihang batan-on pa ko, adunay 13 lang ka templo sa Simbahan.
Ang akong asawa, si Sister Kathy Andersen, nagtubo sa estado sa Florida, USA. Sa dihang singko anyos pa siya, ang iyang mga ginikanan midala sa ilang pamilya sa templo aron mabugkos sa kahangturan. Ang pagbiyahe nagkinahanglan og unom ka adlaw, 2,500 ka milya (4,023 km) nga pagdrayb tabok sa Estados Unidos ngadto sa Salt Lake Temple. Karon adunay 47 ka templo nga mas duol sa iyang balay sa Florida kay sa Salt Lake Temple.
Si Presidente Thomas S. Monson miawhag sa kabatan-onan sa Simbahan nga kanunay mobisita sa templo aron sa paghimo og mga bunyag alang sa mga patay. Siya miingon: “Karon, akong batan-ong mga higala nga mga tin-edyer, itumong kanunay sa inyong panan-aw ang templo. Ayaw pagbuhat og bisan unsa nga makapugong ninyo sa pagsulod ug pag-ambit sa sagrado ug mahangturong mga panalangin didto. Gidayeg nako kadtong miadto na sa templo aron sa pagpahigayon sa mga bunyag alang sa mga patay, momata og sayo sa buntag aron makaapil sa maong mga bunyag sa dili pa magsugod ang klase. Wala koy laing mahunahunaan nga mas maayo sa pagsugod sa adlaw.”2
Kamo misanong sa propeta sa Ginoo, ug kada tuig minilyon sa pikas nga bahin sa tabil nahatagan og kahigayunan sa pagdawat sa ilang bunyag. Walay henerasyon nga nabuhi sa yuta nga adunay dako kaayo nga pribilehiyo sama ninyo nga mosulod diha sa pultahan sa balay sa Ginoo ug makatabang sa kaluwasan niadtong nag-una.
Sama sa inyong nasayran, adunay mahinungdanon nga unang lakang nga makapahimo nato sa pagtuman sa sagradong buhat sa templo. Kita mosiksik ug mangita niadtong mga sakop sa atong pamilya nga nag-una kanato.
Sa unang pagbisita ni Moroni ngadto ni Propeta Joseph Smith, siya misugo ni Joseph nga “ang mga kasingkasing sa mga anak mobati sa ilang mga amahan” (D&P 2:2). Sa wala madugay si Propeta Joseph mipasabut nga ang mga miyembro sa Simbahan kinahanglan nga mahimong “mga manluluwas sa Bukid sa Zion. … Apan unsaon nila nga mahimong mga manluluwas sa Bukid sa Zion?” nangutana siya. “Pinaagi sa pagtukod sa ilang mga templo … ug pagpadayon ug pagdawat sa tanan nga mga ordinansa … alang sa ilang tanan nga mga katigulangan kinsa namatay, … ug dinhi niini ang kadena nga nagbugkos sa mga kasingkasing sa mga amahan ngadto sa mga anak, ug sa mga anak ngadto sa mga amahan.”3
Si Propeta Joseph namulong niini nga buhat isip “sumpay” nga nagkonektar sa pamilya gikan sa usa ka henerasyon ngadto sa lain (D&P 128:18). Ang pisikal nga sumpay sa adlaw ni Joseph gimugna pinaagi sa pagpahumok ug pagpatunaw sa duha ka piraso nga metal diha sa nagdilaab nga hudno, sumpayon kini samtang humok pa, ug dayon pabugnawon ug pagahion ngadto sa dili maputol nga kadena. Ang kaimportante sa gamhanan, espirituhanong sumpay nga nagbugkos kanatong tanan sa kahangturan klarong gisulat diha sa kasulatan: “Kita kon wala sila dili mahimo nga hingpit; ni sila kon wala kita” (D&P 128:18).
Sa una kini nga buhat sa pagpangita og mga ngalan sa pamilya, pagdokumento niini, ug pagdala niini ngadto sa templo mao ang nag-unang buhat sa hamtong nga mga miyembro sa Simbahan. Ngano man nga ingon niana? Tungod kay kini nagkinahanglan og daghang panahon ug paningkamot. Kasagaran kini magsugod uban sa dagkong mga buboran nga gisudlan og gi-microfilm nga mga rekord. Kini nagpasabut nga tutukan gyud ang mga petsa ug dapit, limitadong baga nga mga libro sa kasaysayan, ug usahay hilit nga mga sementeryo sa nasud.
Ang atong abilidad sa pagpangita sa atong katigulangan diha sa internet mitumaw lang sa milabayng pipila ka tuig, uban sa dakong kalamboan sa milabayng pipila ka bulan. Sa mosunod nga mga bulan mas maanaa pa kini.
Samtang ang inyong henerasyon hingpit nga magmatinud-anon sa pagbisita sa templo, sa umaabut nga mga bulan ug katuigan kamo mahimong ingon ka maayo sa pagpangita ug pagdala og mga pangalan sa templo.
Gusto ko nga hagiton kamong tanan sa paghimo og personal nga tumong sa pag-andam kutob sa mahimo og mga pangalan para sa templo nga inyong bunyagan didto. (Aron sugdan ang hagit, bisitaha ang templechallenge.lds.org.) Adunay gahum sa pagsiksik niadtong nanginahanglan sa mga ordinansa sa templo, nasayud kon si kinsa sila, ug dayon mahimong kabahin nga ilang madawat kining sagrado nga mga ordinansa. Kini mao ang paagi nga kamo mahimong “manluluwas sa Bukid sa Zion” (tan-awa sa Abdias 1:21 ug D&P 103:9). Adunay kalipay ug katagbawan nga masabtan lang pinaagi sa espirituhanon nga mga pagbati. Kita mahangturong sumpay sa atong mga katigulangan.
Pipila sa atong mga pamilya anaa sa Simbahan sa daghang henerasyon, ug daghan sa buhat sa templo para sa atong katigulangan napahigayon na. Niadtong 2013, sa unang higayon, akong nakita ang akong katigulangan sa usa ka fan chart sa internet, lakip na ang akong apohan sa tuhod si Niels Andersen, diin gikuha akong ngalan, ug amahan sa akong apohan sa tuhod nga si Moroni Stocks, ang unang sakop sa pamilya nga ginganlan subay sa usa ka propeta sa Basahon ni Mormon. Nakakita ko og denosinang mga litrato sa sakop sa akong pamilya diha sa internet. Kahibalo ba mo unsay hitsura sa inyong mga apohan sa tuhod?
Pagkakaplag sa Atong mga Ig-agaw
Kon ang inyong tsart dili kompleto sama sa akoa, ang una ninyong responsibilidad mao ang pagpuno niini kutob sa mahimo. Magkadaghang impormasyon maanaa matag bulan.
Kon ang inyong tsart kompleto sama sa akoa, aduna pay importante kaayo nga buhat para nimo nga buhaton. Kini nga buhat magpadayon. Kini dili makompleto bisan kon ang Manluluwas mobalik. Kon ang atong tsart makita nga daw kompleto, kita makatabang sa uban sa pagpangita sa ilang katigulangan ug atong pangitaon kadtong duol kaayo nga paryente diha sa atong family tree. Ato kining gitawag og “pagkakaplag sa atong mga ig-agaw.”
Unsaon man nato pagpangita sa atong mga ig-agaw? Duha ka paagi.
Una, kita moadto sa atong tsart, ug atong pangitaon kadtong duol nga paryente sa atong mga apohan sa apohan sa tuhod. Sama pananglit, moadto ko sa akong chart ni Lola Frances Bowen Evans ug dayon tan-awon ang mga pamilya sa igsoon ni Lola Evans. Siya adunay lima ka igsoong babaye ug duha ka igsoong lalaki. Niining paagiha, makita nako ang akong mga ig-agaw.
Ang ikaduha nga paagi aron makakaplag sa atong mga ig-agaw mao ang pagtabang niadtong naglibut kanato. Atong sugdan gamit ang espesyal nga booklet My Family. Kon ang inyong pamilya bag-o pa sa family history, sulati ang booklet. O kon ang inyong tree sama sa akoa, dad-a ang booklet ngadto sa usa ka bag-o nga miyembro o sa usa ka tawo kinsa wala kaayo maapil sa Simbahan sama sa inyong pamilya ug tabangi sila sa pagsiksik sa ilang pamilya. Samtang inyo kining buhaton, kamo makatabang nila sa pagdala sa uban ngadto sa templo. Sila inyong mga kaigsoonan, apan gusto usab nato silang tawgon nga inyong “mga ig-agaw.”
Kitang tanan manag-igsoon sa pamilya sa atong Amahan. Ang ato mismong mga pamilya dili sulagma nga gilalang. Si Presidente Monson miingon, “Atong madiskubrehan ang kabahin sa atong mga kaugalingon kon masayud kita mahitungod sa atong mga kagikan.”4
Kon atong makita atong kaugalingon diha sa panglantaw sa atong pamilya, niadtong nag-una kanato ug niadtong nagsunod kanato, kita makaamgo kon sa unsang paagi kita kabahin sa usa ka talagsaon nga sumpay nga nagkonektar kanatong tanan. Samtang kita magsiksik nila ug dalhon ang ilang mga pangalan ngadto sa templo, ato silang gidala sa usa ka butang nga dili nila maangkon kon wala ta. Sa pagbuhat niini, kita nakonektar kanila, ug ang Ginoo pinaagi sa Iyang Espiritu nagmatuod sa atong kalag sa mahangturong kaimportante sa atong gibuhat.
Si Presidente Monson miingon, “Kadtong nakasabut sa mahangturong mga panalangin nga magagikan sa templo nasayud nga walay sakripisyo nga dako kaayo, walay kantidad nga bug-at kaayo, walay paningkamot nga lisud kaayo aron makadawat niana nga mga panalangin.”5
Akong idugang sa iyang mga pulong nga ang mga panalangin ug gahum gikan sa kahitas-an nagpaabut sa atong mga sakop sa pamilya kinsa nag-una kanato samtang ilang gidawat ang mga ordinansa nga atong gipahigayon para kanila diha sa balaan nga mga templo. Natapos na sila sa ilang pagka-mortal, apan sila padayon nga nabuhi. Kita mahimong “mga manluluwas sa Bukid sa Zion” ug nahiusa kanila hangtud sa kahangturan.
Kamo natawo sa panahon nga anaa ang mga templo ug teknolohiya. Kini ang inyong mga adlaw nga mas mobati ang inyong kasingkasing ngadto sa inyong mga amahan.
Samtang nagtinguha mo nga makatampo niining sagrado nga buhat, ang inyong kahibalo ug hugot nga pagtuo sa Manluluwas molambo ug kamo makadawat og mas piho nga pagsaksi nga ang kinabuhi magpadayon lapas sa tabil. Kamo makadawat og proteksyon batok sa mga tintasyon nga naglibut kaninyo, ug inyong maandam inyong kaugalingon ug ang kalibutan asa kamo nagpuyo para sa Ikaduhang Pag-anhi sa Manluluwas.
Ako nasayud nga ang kinabuhi magpadayon lapas sa tabil. Nasayud ko nga si Jesus mao ang Kristo. Siya ang atong Manluluwas ug Manunubos. Siya buhi! Ang Iyang mahimayaong Pag-ula nakapahimo niining mga ordinansa sa templo nga molungtad sa kahangturan.