Mapasalamaton ako sa Imong mga Tiil
Nicholas Nelson, Texas, USA
Mga paghulagway pinaagi ni Bradley H. Clark
Walay makapaikag sa akong mga tiil, busa ako naglibug og gamay sa dihang si Nieves, usa ka bag-ong kinabig sa Bolivia, miingon nga mapasalamaton siya niini.
“Ako mapasalamaton kaayo sa imong mga tiil,” siya mosulti namo paglabay sa mga semana human sa iyang bunyag.
Andam si Nieves nga midawat sa gipahiuli nga ebanghelyo, apan sa dihang giimbitar namo siya nga magpabunyag, nagduha-duha siya.
Siya mipasabut nga siya nag-antus sa usa ka sakit sa panit. Kon ang iyang panit mabasa og bugnaw nga tubig, ingon og dunay liboan ka mga dagum ang manuslok sa iyang panit. Kini nga kahimtang nakapugong niya sa pagbuhat bisan sa ordinaryong mga buluhaton, sama sa paghugas sa mga utanon o kinamot nga paglaba sa sinina.
Gipasabut namo nga ang bunyaganan mahimong painiton, ug among gipaniguro ni Nieves nga siya bunyagan sa init nga tubig. Misanag ang iyang nawong, ug siya mipili nga magpabunyag sa Adlaw sa Pasko. Ang akong kompanyon ug ako misulti sa presidente sa branch kabahin sa kondisyon sa iyang panit, ug siya miingon nga ang font painiton alang sa bunyag sa hapon.
Sa dihang miabut kami sa chapel alang sa bunyag, ang font bag-o lang gibutangan og bugnaw kaayo nga tubig! Ang nabalaka nga presidente sa branch mipasabut nga tungod sa walay maayong komunikasyon, mataud-tauran pa ang pag-andam sa tubig.
Ang akong kompanyon ug ako nasayud nga si Nieves gusto nga magpabunyag nianang adlawa, ug kami mituo nga ang Ginoo nagtinguha sa samang butang. Nakakita kami og bakanting kwarto ug nag-ampo nga Siya motabang ni Nieves nga mabunyagan.
Mibati kami og kahupayan human sa pag-ampo ug mihukom nga ipadayon ang tulumanon. Kadtong namulong sa wala pa ang bunyag nindot nga mitudlo, apan nakulbaan ko dayon dihang nakadungog ko, “Si Elder Nelson mobunyag karon ni Sister Nieves.”
Naningkamot ko sa pagtago sa akong kabalaka samtang ako nanaog sa bugnaw nga tubig. Migunit si Nieves sa akong kamot ug mitunob sa tubig. Nangandam ko sa pinakabati nga mahitabo, apan si Nieves wala mosiyagit o bisan mokulismaot. Kalma siyang nanaog sa hagdanan ug mipahiyom nako.
Human sa pag-ampo sa bunyag, mitighaya siya sa mabugnaw nga tubig. Sa dihang gihaw-as ko siya, siya mapahiyumon. Napuno ako sa pasalamat. Alang nako, ang iyang bunyag usa ka milagro.
Ang katapusang higayon nga akong nakita si Nieves, may gisulti siya nga nakapawala sa akong kalibug mahitungod sa iyang interes sa akong mga tiil. Miingon siya, “Mapasalamaton kaayo ko sa imong mga tiil, nga naglakaw paingon sa akong pultahan ug midala nako sa kamatuoran.”
Naghunahuna ko ni Nieves ug sa iyang yano nga pagtuo ug pasalamat sa matag higayon nga ako makadungog niini nga mga pulong ni Isaias: “Pagkatahum sa ibabaw sa kabukiran sa mga tiil niadtong nanagdala sa maayong balita, nga nanagmantala sa pakigdait; nga nanagdala sa maayong balita sa kaayohan, nga nanagmantala sa kaluwasan; nga nanag-ingon ngadto sa Zion, Ang imong Dios nagahari!” Isaias 52:7; tan-awa usab sa Mosiah 12:21.