Seia Tatou Toe Feiloai
O se Asiasiga mai le Faaola
Mai le “An Experience of My Father’s,” Improvement Era, vol. 33, no. 11 (Sept. 1933), 677, 679; o faailoga ma mataitusi tetele ua faaonaponei.
O i tonu lava na faaali mai ai ia te au le Alii o Iesu Keriso.
Ata pue o Lorenzo Snow mai le faaaloaloga a le Church History Library ma le Teugaoa; faamatalaga mai le Le Afio Mai Faalua, saunia e Harry Anderson
Ina ua uma lana tatalo, ua faamoemoe [lo‘u tama] i se tali, se faaaliga faapitoa mai le Alii. O lea sa faatalitali ai o ia—ma faatali—ma faatalitali. Sa leai se tali, e leai se leo, e leai se asiasiga, leai se faaaliga. Sa ia tuua le fatafaitaulaga, ma le potu ma le matua le fiafia lava. A o pasi atu o ia i le potu selesitila ma alu atu ai i le auala savali vatele, sa tuuina atu se faaaliga mamalu ia Peresitene Snow, o lea ua ou faamatala atu i upu a le afafine o lona atalii, o Allie Young Pond. …
“I se tasi afiafi a o ma talatalanoa ma Tamamatua Snow i lona potu i le Malumalu o Sate Leki, sa ou nofo ai lava seia oo ina ua o ia tagata e vaaia le faitotoa ma e lei o mai leoleo o le po i totonu, ona fai mai lea o tamamatua o le a ia ave au i le faitotoa autu i le pito i luma ona ou ui atu ai lea iina. … Ina ua ma tuua lona potu, ma a o ma i ai pea i le auala savali tele e tau atu i le potu selesitila, sa ou savali muamua mamao atu ia Tamamatua ae na ia taofia au ma fai mai: ’Faatali mo sina minute, Allie, ou te manao e ta’u atu se mea ia te oe. O i tonu lava, na faaali mai ai le Alii o Iesu Keriso ia te au i le taimi o le maliu o Peresitene Uitilafi. Sa ia faatonuina au ou te alu loa lava ma toefaatulaga le Au Peresitene Sili o le Ekalesia ma aua nei faatali e pei ona sa faia ina ua maliliu isi peresitene na muamua atu, ma ia ou suitulaga ia Peresitene Uitilafi.’
“Ona sau lea o Tamamatua e tasi se laa ua lata mai ai, ma faaloaloa mai lona aao i le itu tauagavale ma fai mai: ‘Sa tu tonu lava o Ia ii, pe tusa ma le tolu futu i luga a’e o le fola. Sa foliga mai pei sa tu o Ia i luga o se ipu auro mafolafola malo.’
“Sa faamatala mai e tamamatua e ese le mamalu o le peresona o le Faaola ma sa faamatala mai ona lima, vae, foliga ma lona ofu talaloa paepae matagofie, o ia mea uma o se mamalu o le sinasina ma le susulu lea sa tau le mafai ai ona vaai atu ia te Ia.
“Ona toe laa tasi agai mai lea o tamāmatua ma tuu lona lima taumatau i luga o lo’u ulu ma fai mai: ‘O lenei, afafine o lo’u atalii, ou te manao ia te oe ia manatua o le molimau lenei a lou tamāmatua, lea sa ia tauina atu ia te oe, i ona lava laugutu faapea sa ia vaai moni lava i le Faaola, iinei i le malumalu, ma sa talanoa faafesagai ma Ia.’”
… Sa ou faamatalaina lenei aafiaga i le sauniga faamanatuga a le Uarota Lona Sefuluvalu. Ina ua maea le sauniga sa ta’u mai e Elder Arthur Winter sa ia faalogo foi i lo’u tama o faamatala le faaali atu o le Faaola ia te ia i le malumalu ma faatonuina o ia e le gata ia toefaatulaga loa lava le Au Peresitene Sili ae ia toe filifilia foi ia fesoasoani o Peresitene Uitilafi sa i ai, o Peresitene George Q. Cannon ma Iosefa F. Samita.