Savali a le Au Peresitene Sili
O Aiga ma le Tatalo
Saunia e Peresitene Henry B. Eyring
Fesoasoani Muamua i le Au Peresitene Sili
Sa i ai se taimi, a o ou nofo i tafatafa o le moega o lo’u tama i le po, sa ia talanoa mai e uiga i lona olaga faatamaitiiti. Sa ia talanoa e uiga i le alofa o ona matua i taimi faigata ma le alofa o lona Tama Faalelagi ma le Faaola. Sa ou iloaina o le a maliu o ia i le kanesa, ma e le o se mea na faateia ai au sa i ai taimi sa filogia ai ona lagona mo le alofa o le Tama Faalelagi ma le alofa ma le agalelei o lona tama faalelalolagi. Sa masani ona fai mai lo’u tama pe a ia tatalo, sa mafaufau o ia ua mafai ona ia vaai atu i lona mafaufau i le soisoi mai o le Tama Faalelagi.
Sa aoaoina o ia e ona matua e ala i le faataitaiga e tatalo e faapei o loo talanoa atu i le Atua ma o le a tali mai le Atua ia te ia i le alofa. Sa ia manaomia lena faataitaiga seia oo i le iuga. Ina ua oo ina ogaoga le tiga, sa matou maua atu o ia i le taeao i ona tulivae i autafa o le moega. Sa matuai vaivai lava e toe foi atu i lona moega. Sa ia fai mai ia i maotu sa tatalo e fesili i lona Tama Faalelagi pe aisea lava ua matua mafatia ai o ia, ae sa ia taumafai i taimi uma ia amiolelei. Sa ia fai mai na oo mai se tali ma le agalelei: “E manaomia e le Atua atalii totoa.”
Ma o lea na ia lototele ai e oo lava i le iuga, sa talitonu e alofa le Atua ia te ia, sa faafofoga mai ia te ia, ma o le a ia siitia o ia i luga. Sa faamanuiaina o ia i le vave iloaina ma le faagaloina ai lava se Atua alofa e lata mai e faapei o se tatalo.
O le mafuaaga lena na aoao mai ai e le Alii matua, “Ma ia latou aoao foi a latou fanau ia tatalo, savavali tonu i luma o le Alii” (MF&F 68:28).
Ua toefuatai mai le talalelei a Iesu Keriso—faatasi ai ma le Tusi a Mamona ma ki uma o le perisitua e mafai ona fusia ai aiga—ona sa tatalo Iosefa Samita o se tamaitiiti i le faatuatua. Sa ia maua lena faatuatua i se aiga alofa ma le faamaoni.
Ua luasefulu tausaga talu ai, na tuuina mai ai e le Alii lenei fautuaga i le “O Le Aiga: O Se Folafolaga i le Lalolagi,” mai le Au Peresitene Sili ma le Korama a Aposetolo e Toasefululua: “O faaipoipoga ma aiga manuia e faavae ma tumau i mataupu faavae o le faatuatua, tatalo, salamo, faamagaloga, faaaloalo, alofa, agalelei, galuega, ma gaoioiga faafiafia tuufaatasi.”1
Ua tatou nofo aitalafu i se aitalafu lofituina o le loto faafetai i le aiga o Iosefa Samita le Perofeta mo le tausiga o ia. Na faaalia e lona aiga e le gata i le faatuatua ma tatalo ae faapea foi le salamo, faamagaloga, faaaloalo, alofa, agalelei, galuega, ma gaoioiga faafiafia tuufaatasi.
O tupulaga e mulimuli mai ia te oe, e mafai ona faaamuia ia te oe mo lau faataitaiga o le tatalo i lou aiga. Atonu e te le tausia se auauna maoae a le Atua, ae e mafai e ala i au tatalo ma lau faataitaiga o le faamaoni ona fesoasoani i le Alii o Iesu Keriso e tausia ni soo lelei faapelepele.
Mai mea uma atonu e te filifili e fai e fesoasoani ai i le Alii, o le tatalo o le a i le totonugalemu o na mea uma. E manino lava le i ai o tagata e le taualoa, o e, a latou tatalo, e musuia isi e pupula o latou mata ia iloa ai pe o ai o i ai iina. E mafai ona avea outou ma se tagata faapena.
Mafaufau i le uiga o lena mea ia i latou o e tootutuli faatasi ma oe i le tatalo faaleaiga. Pe a latou lagona faapea e te tautala i le Atua i le faatuatua, o le a faateleina lo latou faatuatua e talanoa foi ma le Atua. Pe a outou tatalo e faafetai i le Atua mo faamanuiaga ua latou iloa ua oo mai, o le a faatupulaia lo latou faatuatua e alofa le Atua ia i latou, ma e tali mai i au tatalo ma o le a tali mai foi ia i latou. E mafai ona tupu lena mea i le tatalo faaleaiga pe a e mauaina lena poto masani i le tatalo patino, i lea taimi ma lea taimi.
O loo faamanuiaina pea a‘u i se tama ma se tina o e sa talanoa ma le Atua. O a la’ua faataitaiga o le mana o le tatalo i aiga o loo faamanuiaina ai pea lava tupulaga na mulimuli mai ia i la’ua.
O loo faamanuiaina pea la’u fanau ma fanau a fanau i aso uma i le faataitaiga a o’u matua. O le faatuatua e faafofoga mai se Atua alofa ma tali mai i tatalo na faasolo mai ia i latou. E mafai ona e fatuina ai se talatuu faapena i lou aiga. Ou te tatalo o le a faapea ona outou faia.