Sa Paulia i Limon

Christina Wadley, Misuri, ISA

Illustration depicting a family at the side of a road. Their minivan has broken down near Limon, Colorado.

I se malaga e vaai lo matou aiga lautele i se taumafanafana, sa pe le matou veni ua 12-tausaga ma se’e atu ai ina tu. Sa matou paulia. O le mea e lelei ai, sa na o le lima maila (8 km) mai le taulaga laitiiti o Limon, Colorado, ISA.

Na tuuina mai e le inisinia i le lotoifale se tala faanoanoa. Sa manaomia ona sui le totoga e sapalai ai le malosiaga i le afi ma e tatau ona matou faatalitali pe a ma le lima aso mo totoga ia. Sa le lava le matou tupe ae sa i ai le matou faleie ma ni mea o la matou tolauapiga, o lea na matou filifili ai e nonofo i se nofoaga mo tolauapiga iina.

Sa fiaselau maila mai le aiga ma uo, ae sa matou mafaufau ai pe faapefea ona matou oo atu i se faleoloa e faatau ai mea matou te manaomia e ola ai. Sa matou filifili e sue le peresitene o le paranesi iina ma le faamoemoe ia maua ai se auala e malaga ai. Sa matou telefoni ia Peresitene Dawsn, ma e lei atoa se afa itula ae matou maua ni valaau mai ni tagata se toalua o le Aualofa o se tamai paranesi. Sa matou iloaina ma le fiafia e i ai se aiga e tasi e nonofo i le vaega lea e i ai le tolauapiga; sa latou o mai ma matou feiloai i totonu o nai itula na matou valaau atu ai.

I le aluga o le vaiaso na sosoo ai, sa lofituina i matou i le alofa ma le tausiga sa matou maua mai lena paranesi laitiiti i laufanua matagia o Kolorato. O le aiga e nonofo lata ane, sa latou valaaulia i matou i lo latou fale mo se taligasua i le afiafi o lena aso muamua, ma sa matou fiafia i se afiafi maoae o talatalanoaga ma matua a o taaalo le ma fanau ma lo la afafine. O le taeao na sosoo ai na pue ai se matou lifi ma se tasi tagata o le au paia e o e faatau a matou meaai ma sapalai mo lo matou nonofo ai.

Sa faaauau pea le agalelei o tagata o le paranesi i talaatu o la matou uluai talosaga. Sa latou pikiina i matou mo le lotu i le Aso Sa. Sa latou fesoasoani ia matou maua ni manatuaga i le falemataaga faasolopito o le taulaga. Sa nonofo le ma fanau i o latou fale i le taimi o se uato’a. O se tasi o tagata o le paranesi sa ia faafaigaluegaina lou toalua mo ni nai aso e fesoasoani ia i matou e totogi le galuega lipea o le taavale.

O afiafi uma, sa fafagaina ai i matou e tagata o le paranesi laitiiti ma faafiafia le ma fanau i o latou aiga. Ina ua tulata i le iuga o lo matou nonofo ai, sa aveina i matou e se tasi o aiga i lo latou pamanu, lea sa aoao ai le tietie solofanua a le ma fanau.

Ina ua matou tuua Limon i se vaiaso mulimuli ane, sa matou tuua ma tatalo o le faafetai mo se vaega fou o uo pele o e na taliaina i matou ma faia ina ia matou maua le mafanafana i Limon.