E Fiafia e Fesoasoani Atu
E alala le tusitala i Iuta, ISA.
Afai e faigata mo tagata e toatolu ona lako, ai lava la se faigata mo se tagata e toatasi!
“Fealofani matou uma, ma o se aiga fiafia” (Tusipese a Tamaiti, 104).
Sa faalagolago e Viliamu lana lako i le puipui o le fale ae faapalasi ifo i luga o le mutia. O le lakoina o lau o se galuega faigata, ae o ia ma ona tuafafine o Chloé ma Amelia, sa iu lava ina uma. I se mamao maualuga i luga atu o atumauga o Alps, sa mafai ona ia iloa atu ai se vaalele o lele ane ai. Sa ia taumanatunatu po o fea e alu i ai.
E fiafia lava Viliamu i si ona taulaga laitiiti i tafatafa o le tuaoi o Farani-Suisi. E asiasi atu tagata mai i le lalolagi atoa iina. Sa ia mafaufau i nofoaga e fia alu i ai, o tagata e mafai ona ia feiloai i ai, ma mea fou e mafai ona ia faia i se aso.
Sa faateia o ia mai ona moomooga i le aso, i se mapumapu ma le paoo, paoo, paoo o laa i le fanua o lo latou tuaoi.
“Ai ua sauni Pati e lako ana laulaau,” sa mafaufau ai Viliamu. “Ua ou matua fiafia lava ua mae’a matou.”
“Ae afai e faigata le lakoina o laulaau mo tagata e toatolu, ai lava la se faigata mo se tagata e toatasi!” Sa mafaufau ai Viliamu. O le toalua o Pati, o Pama, e lei leva ona uma lona taotoga, o lona uiga e tatau ona lakoina e Pati ana laulaau na o ia lava.
E masani ona fai mai tina, “A tatou fesoasoani, tatou te fiafia!” ma sa mafaufau Viliamu atonu o lona uiga ia fesoasoani ia Pati, e ui ua latou le lavava mai le lakoina o a latou lava laulaau.
Sa tilotilo atu Viliamu ia Chloé ma Amelia, o loo fauina i lala laau ni tamai fale i le mutia. “Tatou o e fesoasoani ia Pati?” na ia fesili ai. “E mafai ona tatou fesoasoani ia te ia e vave ai ona uma.”
Sa malilie i ai Chloé ma Amelia ma mulimuli atu ia Viliamu.
“E manaomia se fesoasoani?” Sa fesili atu ai Amelia a o savavali atu i le pupuvao agai atu i le fanua o Pati.
“O le a ou matua fiafia lava! Ae ua alu le afiafi o tou lako vao. Ou te iloa ua outou vaivai.”
“E le afaina,” na fai atu ai Viliamu. “Matou te fia fesoasoani atu. O le mea moni, a matou fesoasoani atu, ua matou fiafia!”
A o latou galulue, sa faamatala atu e Pati ni tala mai lona olaga. O Pati e sau mai Initia, ae sa ola i le Atu Asia ma Aferika i lona olaga atoa.
Ina ua uma ona sa faotaga ia laulaau, sa tilotilo atu Viliamu ma iloa ai ni apu o taatitia solo i lalo o laau apu tetele i le fanua o Pati. E lei uma lelei le latou galuega. Sa punou ifo i lalo Viliamu ma amata ona tufi apu. Sa ia faavasegaina mea pala mai mea lelei a o ia savali atu i ai. Sa taufetuli atu Chloé ma Amelia ma tuu ni apu i faaputuga.
Sa tulei mai e Pati lana uilipaelo tuai lanumeamata mai le falefaigaluega. “Tuu ia apu pala i totonu i i. Ona ave lea o apu lelei ma outou.”
“E le afaina, Pati. Matou te le manaomia e ave au apu,“o le tala lea a Viliamu.
“Ou te manao e ave ma outou,” o le tala lea a Pati. “O le mea moni, a ou foai atu, ua ou fiafia!”
O le po i le taimi o le taligasua i le afiafi, sa faamatala e tamaiti ia Mama ma Papa lo latou fiafia ona sa latou fesoasoani ia Pati ma faalogologo i ana tala.
Na faafuasei ona oo ane se manatu ia Viliamu. “Ua ou iloa le mea e mafai ona fai i apu sa ia aumai mo i tatou!” Sa ia oso i luga ma uu mai se kopi o le Liahona mai le fatatusi. “Ou te manatu o le a fiafia ia Pati ma Pama i le mea lea,” sa fai mai ai Viliamu, ma susue i se itulau o i ai se fua o le keke apu. “Pei ona fai mai Pati ananei, pe a tatou foai atu, ua tatou fiafia!”
“Tatou faia se keke mo isi foi o tatou tuaoi!” O le tala lea a Chloé.
Sa ataata Viliamu. Sa ia mafaufau e uiga i tagata uma e mafai ona ia feiloai i ai ma tala mananaia e mafai ona ia faalogo i ai. Ma o mea uma e ala mai i sina agalelei itiiti. Ma sina fasi keke.