O Le Paso a le Aiga o Lindsay
“E i ai se mea e te‘i ai mo oe,” na fai mai ai Tama ma se ataata.
“O i tatou o ni fanau e mafai ona sailia e pele ia i tatou, faasaoina o latou igoa ma mea e manatua ai i latou” Tusipese a Tamaiti, 90).
Na tamoe atu Lindsay i lalo ina ua ia faalogoina le valaau mai o lona Tama i lona igoa.
Talu ai nei sa la faia faatasi ai le tele o galuega o talafaasolopito o aiga. E fesoasoani tama e faaulufale o ia i le uepisaite a le FamilySearch, ona la taufai autilo ai lea mo ata o aiga ma tala. O le isi aso na ia maua ai se tusiga tuai lava e uiga i le misiona a Tamamatua!
Na oo atu Lindsay i le pito i lalo o le faasitepu lea sa faatalitali mai ai Tama. “E fai ni ta talafaasolopito o aiga i le po nei?” sa ia fesili ai.
“Ioe, o loo i ai se mea mo oe e te te‘i ai,” fai mai ai Tama ma se ataata. Sa ia tuu atu ia te ia se pepa umi na lolaina, ma sa ia umia i ona tua. Sa talatala lemu e Lindsay ma le faaeteete. Sa ia sioa atu i le mamanu o le ili tele i le lautusi. Sa i ai lona igoa i le pito i lalo! Sa tele isi mau igoa na pae solo i ni laina sa faataamilo i lona igoa.
“O oulua na ma Tina,” o le tala lea a Lindsay, ma faasino atu i igoa e sili ona vavalalata ma ia. “Ma Tinamatua foi ma Tamamatua!”
“E sao,” na fai mai ai Tama. “O lenei siata ili o loo faaalia ai igoa o ou tuaa mo augatupulaga e iva.”
Sa matuai tele naua igoa. Ae o ni vaega sa leai ni mea sa i ai. Sa mafaufau Lindsay i igoa o loo misi. “E foliga pei o le paso sa masani ona ma faia ma Tamamatua,” o lana tala lea. Sa maliu tamamatua i ni nai tausaga ua mavae, ma sa matua misia lava e Lindsay.
Na lue atu le ulu o tama. “E pei lava o se paso. O se paso taua tele. Ma o tagata uma o le aiga e pei o se fasi paso.”
Sa toetoe ina ata Lindsay ina ua ia vaai faalemafaufau ia Tinamatua ua foliga e pei o se fasi paso.
“Pe a tatou maua ai le igoa o se tagata ma faia o latou galuega i le malumalu, ua tatou faafesootaia i latou i le isi vaega o le aiga—e pei o le faafesootaia faatasi o fasi paso. O loo e fesoasoani i le fausiaina o le paso lenei.”
“Oka!” Sa ololo e Lindsay lona tamatamailima i luga o igoa. Sa ia iloaina e taua le talafaasolopito o aiga, ae o lenei ua sili atu ona fiafia e fesoasoani i ai. E mafai ona faafesootai faatasi lona aiga uma e faavavau!
Na faapipii e Lindsay lana siata fou i le faalo taumatau i luga a‘e o lona moega. Sa fiafia o ia e faataupupula i le siata ma suesue i igoa uma. Sa ia vaai faalemafaufau i tagata uma o loo uulima, ua fesootai faatasi e faapei o fasi paso. Sa ia lagona le fiafia. O le paso sili lea ona tele ua ia vaa i ai!
I se tasi po sa le mafai ona moe Lindsay. Sa matua pogisa lona potumoe. Sa faia e le tamai moli ni tamai ataata lafoia taufaafefe i luga o le puipui. Sa ia toso ae lona palanikeke ma moeiini mau ona mata.
Ina ua mavae sina taimi puupuu, sa autilo atu i luga ae o le palanikeke ma vaaia ai le siata. Sa ia faitauina lona igoa. Ona ia faitauina lea o igoa o le Tina ma le Tama. Ina ua ia tau atu i le igoa o Tamamatua, sa ia lagonaina le mafanafana ma le toafilemu.
Na ia manatua le ataata atu o Tamamatua ia te ia pe a la faia faatasi le paso. “Pe a ou fesoasoani ia Tama i le faia o talafaasolopito o aiga,” sa ia mafaufau ai, “Ua ou faafesootaia faatasi lo matou aiga!” Sa ia vaai faalemafaufau ia Tamamatua o sili ona ataata i lena mea. Sa le i toe fefe o ia. Sa ataata o ia ma faapupuu i lona palanikeke ma moemiti atu ai i tagata ma le paso ma le faafesootaia faatasi o lona aiga.