O Le Mea Sa Ou Manaomia e Aoao

Michael Hendricks, Wyoming, ISA

Ina ua maea lo‘u tausaga muamua o aoaoga i le iunivesite, sa amataina se galuega faatino ina ia malamalama atili ai i le Tusi Paia. Sa ou filifili e suesue i aoaoga a ni vaega faalelotu sa ou faalogo i ai e le o ni Kerisiano ona ou faatusatusaina lea i aoaoga a le Tusi Paia.

Ina ua amata le semesa na sosoo ai, sa amata ona ou suesue i Le Ekalesia a Iesu Keriso o le Au Paia o Aso e Gata Ai. O se tasi o a’u vasega e manaomia ai le galue i le falesuesue ma se paga, ma sa ou tatalo mo se tasi e mafai ona ou aoao mai ai le mea sa manaomia ona ou aoaoina.

Sa ou filifilia se nofoa i le potu suesue, ma e lei umi ae oo atu se tamaitiiti aoga ma fesili mai pe ua i ai sa’u paga. Sa ia faailoa mai o ia o Lincoln. Ou te le manatua pe na ou vaai i ai i le tausaga faaleaoaoga ua mavae ma sa ou fesili pe na sau mai i se isi aoga.

“O le mea moni,” na ia fai mai ai, “Faatoa ou foi mai sa ou auauna atu o se faifeautalai mo Le Ekalesia a Iesu Keriso o le Au Paia o Aso e Gata Ai.”

Sa ou ta’u atu ia Lincoln o lea faatoa amata ona ou suesue i lana Ekalesia ma e i ai ni a’u fesili. Sa ioe fiafia mai o ia e tali a’u fesili.

I le isi tolu masina, sa ou fesili ai e uiga i le Tusi a Mamona, malumalu, perofeta o aso e gata ai, ma faaaliga i ona po nei. E ui ina sa ou aoaoina le mau mea i le taimi lea, ae sa ou mafaufau pea lava o Mamona e le o ni Kerisiano.

I le faaiuga o se tasi vaiaso sa faiaina ai le matou aoga i se taaloga tele. O nisi faiaoga i le potu suesue sa matuā talanoaina ma le inaina le faiaina, ma faaaoga faafia ona ta’ufua ai le suafa o le Alii. Sa alu atu Lincoln i faiaoga pe talosaga atu pe mafai lava faamolemole ona soia le tautatala faapena ia Iesu Keriso.

“E faalavelave moni lena mea ia te oe?” sa latou fesili atu ai ma se faaletonu.

“Ioe,” o le tali lea a Lincoln. “O Iesu Keriso o la‘u uo mamae.”

I lena taimi, sa suia ai la’u sailiiliga i le Ekalesia mai se faatinoga faalemafaufau i se fesili o le faatuatua. Afai e fua mai i lenei tapuaiga ni tagata faapea, o lona uiga o se Kerisiano i soo se itu e taua.

A o ma foi ma Lincoln i lena po, sa ou fesili pe mafai ona ma o i le lotu i se aso. Ina ua uma ona ou alu i le lotu, sa ou fesili atu ia te ia pe mafai ona ou maua se kopi o le Tusi a Mamona, ma pe mafai ona ou feiloai i faifeautalai.

Mo le lua tausaga sa ou sailiili i le Ekalesia ma faaaluina le taimi e faatasi ai ma ona tagata. Sa ou vaai i se mamanu faifai pea o le faamaoni o alii ma tamaitai o loo tauivi ma le filiga e avea ma soo o le Matai. I le tele o taimi sa faamautu mai ai e le Agaga Paia ia te au o Iesu Keriso, lea sa ou taumafai pea i le mea sili e auauna i ai, na toefuataia moni mai lava Lana Ekalesia i o tatou taimi. Sa vaaia e perofeta ma aposetolo ma e taitaia sa’o lava e Ia.

Sa papatisoina au ma ua ou olioli i le mau tausaga o faamanuiaga mai le talalelei toefuataiina ma ona aoaoga. E maeu lo’u faafetai ona ua tali mai e le Tama Faalelagi la’u tatalo ia maua se paga o le falesuesue o le a fesoasoani mai ia ou aoaoina le mea sa ou manaomia ona aoao.