Mo Tamaiti Laiti
O Se Lagona Fou
O le tusitala e alala i São Paulo, Pasila.
“The Spirit whispers this to me and tells me it is true” (Children’s Songbook, 5).
Sa fiafia lava Gabriel e aoao e uiga ia Iesu. Sa fiafia o ia e faalogologo i tala mai tusitusiga paia. E faitau faatasi e lo latou aiga tusitusiga paia i po uma.
I se tasi o po timuga na latou faapupuu faatasi ai i lo latou fale mafanafana. Sa fai e Papa le tatalo. Ona faitauna lea e Mama o tala mai le Tusi a Mamona. Sa taumafai Gabriel e faalogo ma le toto’a. Sa faitau atu e Mama e uiga ia Iesu sa talanoa i tamaiti.
“Mama, sa i ai faatasi tamaiti ma Iesu?” O le fesili lea a Gabriel.
“E sao lena,” na fai mai ai Tina. “Ma sa Ia faamanuiaina i latou taitoatasi ma tatalo mo i latou.”
Sa mauaina e Gabriel se lagona fou i totonu. Na te lei iloaina po o le a lena lagona. Sa ia lagona le mafanafana e ui lava ina sa maatiati le malulu i fafo. Sa atili ai ona ataata o ia.
Sa manao Gabriel e faasoa atu lenei lagona faapitoa. “Sa ou lagona le fiafia tele ma le mafanafana!” o lana tala lea. Sa matuai fiafia o ia ma sa pei a tagi!
“O lena lagona faapitoa o le Agaga Paia,” sa fai atu ai Papa ia te ia. “Na te tuuina atu ia te oe se lagona mafanafana e fesoasoani ai ia te oe ia e iloa e moni tusitusiga paia.”
Sa ataata Mama ma fusi mai Gabriel. “O lena lagona ua ta’u atu ai e alofa Iesu ia te oe.”
“Ua faamanuia a’u e Iesu,” o le tala lea a Gabriel. “E pei lava o tamaiti i le Tusi a Mamona! Na ia auina mai le Agaga Paia ia te au!”
Sa le mafai ona ia taofi le ataata. “Ou te iloa e moni tusitusiga paia,” o lona mafaufau lea. “Sa ta’u mai e le Agaga Paia ia te au!”