E Nofo po o le Usitai?
E alala le tusitala i Filipaina.
Ina ua ou ta‘u atu i o’u matua sa ou manao e auauna atu i se misiona, sa lei faamoemoeina a la tali. Sa la fai mai ia te au e filifili po o lo‘u aiga po o la’u misiona.
Ata na saunia e Scott Jarrard
E mafai ona ou manatua pea le upu a faifeautalai na aoaoina au: “Soo se mea e poloai mai ai le Atua, ia faia, ona mulimuli mai ai lea o faamanuiaga.” O nei upu na faia ai se uunaiga loloto i lo‘u loto. Sa ou papatiso i le 16 o o’u tausaga, na o au le tagata o le Ekalesia i lo’u aiga. I le valu masina mulimuli ane, sa ou maua le faamanuiaga o le vaai i lo‘u tei laitiiti ua papatiso i le Ekalesia.
Ina ua atoa lo‘u 18, sa ou manao e auauna atu faamisiona ma fesoasoani i le galuega a le Alii. Sa ou fai atu ma le naunautai i o‘u matua e uiga i la’u fuafuaga ma le ala na ou manao e valaaulia ai tagata e o mai ia Iesu Keriso e ala i le fesoasoani ia i latou e talia ma ola ai i mataupu faavae ma sauniga o le talalelei. O la la’ua tali na ou te’i ai. Sa la fai mai sa nutimomoia o laua loto i le mafaufau ia te au ua alu i se misiona, ma e tatau ona ou filifili: lo‘u aiga po o la’u misiona.
Sa ou ofo ina ua ou faalogo i na upu. Sa vave ona ou alu atu i le fale o le Ekalesia e latalata i lo matou aiga ma ulu atu i totonu o se tasi o potu e tootuli ma fesili atu i le Tama Faalelagi, “Pe o le a se mea o le a ou faia? O le a le mea o le a ou filifilia: lo‘u aiga po o la’u misiona? E taua uma mea e lua ia te au.”
A o ou tootuli, sa oo mai upu a faifeautalai i lo’u mafaufau: “Soo se mea e poloai mai ai le Atua, ia faia.”
Ou te alofa i lo‘u aiga ma ou te manao e toe faatasi ma i latou e faavavau. Ou te faaaloalo i o latou lagona. Ae fai mai le mau, “E sili le usitai nai lo le taulaga” (1 Samuelu 15:22). Na faatumulia au e le Agaga o le Alii, ma sa faamalosia ai a’u. Sa ou filifili e auauna atu aua sa ou iloa o le a fesoasoani le Tama Faalelagi i lo‘u aiga ia malamalama.
Na ou alu i le fale ae sa na ona tuliesea ai a’u i upu ita a lo’u tama ma sa fai mai e aua lava nei ou toe foi atu. Na tapena a’u mea, ma le le iloa po o fea o le a ou alu i ai. Sa leai ma sina o’u fefe, aua sa ou iloa sa faatasi mai ia te au le Alii, ua ia te Ia se fuafuaga mo aiga uma, ma e i ai se aso o le a malamalama ai lo’u aiga i lenei fuafuaga matagofie.
Sa na o ni nai laa ese mai lo‘u aiga ae maua a’u e lo’u tina. Sa ia fusi atu ia te au ma ta’u mai le tele o lona alofa ia te au. A o ou tuua, sa mafai ona ou vaaia lona tagi faatasi ai ma le alofa uma ma le tiga o se tina i le vaai ua alu sana tama.
Sa silia ma se tausaga, sa ou nofo i le fale o se faifeautalai ua maea lana misiona lea sa ou feiloai i ai ao avea au o se tagata sailiili. Sa faamaoni le Alii i Lana folafolaga i le 1 Nifae 3:7—ua Ia saunia le ala ina ia mafai ona ou usitai i Ana poloaiga. Na ia auina mai lenei tagata agalelei e saunia mo au ma fatufatuina se siosiomaga faaleagaga lea sa mafai ai ona ou tapena mo la’u misiona. Sa ou lagonaina le aao o le Atua sa lagolagoina ai au i taimi o o’u luitau. Sa ou lagonaina le alofa o lo tatou Faaola o Iesu Keriso e ala i Lana taulaga togiola. O lenei alofa sa tauaveina ai au i o’u tofotofoga seia oo ina ua vaetofiaina au e fai ma faifeautalai faamisiona i le Misiona a Filipaina Cauayan.
I ni nai masina mulimuli ane, na ou maua ai se tusi mai lo‘u aiga e ta’u mai ai o loo faatalitali mai i lo’u toe foi atu. E lei mamulu lava lo’u faatuatua o le a avea lo’u aiga atoa ma tagata o le Ekalesia, e faamauina i le malumalu mo le faavavau atoa, ma mafuta faatasi ma lo tatou Tama Faalelagi ma Lona Alo o Iesu Keriso, i se aso.
Ina ua ou toe foi mai la’u misiona, sa amata ona ou vaai ua moni lena miti. Sa mafai ona ou papatisoina lo’u tina, lea ua sauniuni nei e alu i le malumalu. Ou te vaai soo i lo‘u aiga, ma ua sili atu ona matou vavalalata nai lo le taimi muamua.