E Lei TUUA LAVA TOATASI i Sierra Leone
E ui lava i faama‘i, faaesea, ma le faaumiumi o le tulaga na i ai ina ua uma le taua, na iloa e le Au Paia o Aso e Gata Ai i le malo o Aferika o loo manatua i latou e le Tama Faalelagi.
Ata mai le faaaloaloga a Norman C. Hill MA Mariatu Browne, SEI VAGANA UA TUSIA: FU’A NA SAUNIA E ronniechua/iStock/Thinkstock; FUA SAMASAMA NA SAUNIA E Welden C. Andersen
A faapefea ona ola le Ekalesia pe afai o loo tau faaleleia lo outou atunuu mai le taua tele, aafia i se vairousa matautia faaesea ai lea mai isi atunuu ona o lena faama’i? O le a sau mea e fai pe afai ua aveesea mai faifeautalai e ese mai faifeau o le atunuu, e le faatasi a ua fai soo?
Afai sa e nofo i Aferika Sisifo i le malo o Sierra Leone, o le a e faalagolago i le Alii ma matamata i le olaola o le Ekalesia. O le a e vaaia taitai i le lotoifale o loo faalauteleina o latou valaauga. O le a e vaaia ai tagata o fefaamalosia’i le tasi i le isi, faaauau pea galuega faafaifeautalai, ma faatoilaloina le fefe e le faatuatua.
Tumau le Tuputupu Ae
E ui lava i taua mai le 1991 i le 2002, na vaaia i Sierra Leone le tumau o le tuputupu o tagata o le Ekalesia. Na uluai taunuu faifeautalai faamisiona i lenei atunuu o le itu-Sahara ia Me 1988. E lua tausaga mulimuli ane, ae faatuina se itu. I taimi eseese i le 1990, sa aveese ai faifeautalai ona o le taua, ae sa faagaoioia e tagata o le ekalesia i le lotoifale le Ekalesia ma faaauau pea. I le 2007 na faatuina ai le Misiona a Sierra Leone Freetown, lea na aofia ai ma Laipiria. Ona oo lea ia Tesema 2012, na faatulagaina ai se siteki i le aai o le laumua o Sierra Leone, Freetown e Elder Jeffrey R. Holland o le Korama a Aposetolo e Toasefululua. O le lona 3,000 ai lena o siteki a le Ekalesia.
Tauiviga ma le Ebola
Ona oo mai lea o le Ebola. Na amatalia le pesi mai o le fiva sanatoto e se vairousa na amata mai i Kini ia Mati o le 2014. Na ulufale atu i Sierra Leone ia Me ma televave ai ona sosolo. Sa toe sui tofiga o faifeautalai ma sa talosagaina le peresitene o le misiona i Kana, ia avea foi ma peresitene o le misiona a Sierra Leone—ae nofo pea i Accra.
“Ina ua o faifeautalai, sa matou popole i le tuua ai na o i matou e sue lo matou lava ala,” o le tala lea a le peresitene o le Itu a Kenema o Jonathan Cobinah. “Ae ui i lea, o le vaiaso lava lea e tasi sa matou maua ai se tusi mai le Au Peresitene o le Eria a Aferika i Sisifo e faamautinoa mai ai e le o le tulaga lena. Mai lava i lena taimi, sa mauaina e le au paia e 13,000 i Sierra Leona le lagolago mai le eria, ma a o galulue ia faalapotopotoga faavaomalo e aumai le toomaga, o le Auaunaga Faaleuelefea a le Ekalesia ma le tali mai mo faalavelave faafuasei, faatasi ai ma paaga na fauina e faalapotopotoga eseese faavaomalo ina ia faafetaiaia ai manaoga o tagata. (Tagai i faamatalaga i autafa.)
“I totonu o ni nai aso, sa faia ai se talanoaga faavitio ma le peresitene fou o le misiona,” na saunoa ai Peresitene Cobinah. “Sa ia ta’u mai ia i matou o sauniga ma gaoioiga a le Ekalesia o le a manaomia ai le faautautaga ina ia aloese ai mai le pesia i le faama’i, ae o le a faaauau pea mea uma e pei ona sa i ai i le taimi ua fano.”
Ina ia taofia le saga faasalalauina o le faama’i, sa faasilasila mai ai e le peresitene 2014 o Sierra Leona se tapu e amata i ni nai aso. I le taimi o le tapu, o le a manaomia tagatanuu uma ina ia nonofo i totonu o fale. O le tele lava o tagata o le a faaaoga po o a lava meaai o i ai i o latou fale.
I le Taimi Tonu Lava
O le mea na lelei ai, i na o nai vaiaso a o lei faasilasila maia le tapu, sa amata ona galulue le Eria a Aferika Sisifo ma le laumua e faataga le tiliva mai o sapalai faamama mo aiga uma e 7,800 o le Au Paia o Aso e Gata Ai i Sierra Leone ma aumaia ai se 110 pauna (50kg) taga alaisa ma le tele o lita ga’o e fai ai kuka i le silia ma le 2,500 aiga AAG pe a manaomia. A o lei iloa le tapu o le a oo mai, sa taufetuli lava ia taitai o le Ekalesia e tiliva nei sapalai.
“E faigata ona faamatala atu le faanatinati na matou lagonaina i lea taimi,” o le tomanatu lea a Sahr To‘e, o se fesoasoani faapitoa i le peresitene o le misiona. “I le faaiuga o le vaiaso ina ua faamaonia mai le tufatufaina o sapalai, na matou iloa ai se eria patino e ono manaomia ona faaasu. O le a matua faigata ai ona tiliva ia sapalai, o lea sa matou galulue ai e tusa ma le taimi e fai uta a loli ma faaalu i paranesi i le atunuu atoa. I se tasi aai, na taunuu ai sapalai ae toe o ni nai itula ona faasa lea. I le atunuu atoa, sa mafai ona matou tilivaina sapalai ae toetoe lava a amata le tapu. O se faamanuiaga ia i matou uma ma o se vavega lava i ona po nei.”
Na aumaia foi e le Ebola se faateleina o le leai o ni galuega. “Sa toetoe lava ina leai se faamoemoe,” o le tala lea a Sister Sai Kamaia o le Paranesi a Allentown, o se tina o se fanau e toatolu e maua tupe e ola ai i le faatau atu o nai oloa laiti. “Na alu uma la’u tupe ia Setema, a o lei amataina le tapu. Sa fefefe tagata e fefaatauai. Ou te lei iloa le mea o le a ou faia.” Faapei foi o isi, sa maligi ona loimata i le fiafia ina ua ia maua ia sapalai mai le Ekalesia.
“O le avea o se ua oti lana tane ma o le ulu o lo matou aiga, sa ou matua lagonaina le fiafia ona sa mafai ona fesoasoani mai le Ekalesia ia i matou,” o le tala lea a Sister Mary Margay o le Paranesi a Kissy Lua. “Sa matou mafaufau po o fea e nonofo ai i le taimi o le tapu. Sa matou o matou fiafia ona sa mafai ona matou nonofo i le fale ae o loo i ai mea e ’ai.”
E pei o le tagata o le Ekalesia i soo se mea, sa taumafai le Au Paia i Sierra Leone ina ia faalagolago ia i latou lava. Ae i lenei vaitau e lei mafaufauina le manaomia, sa taunuu mai sapalai i le taimi tonu lava sa leai se isi mea e liliu i ai le toatele. “O nei taimi e oso faalava, na iloa ai e le Au Paia iinei o le a le tuua lava na o i latou,” o le tala lea a Mariatu Brwne, o le faatonu o le va i fafo a le atunuu. I le taimi o le faaasu, sa faasoa atu ai foi e le Au Paia o Aso e Gata Ai a latou sapalai i o latou tuaoi, ma faamanuiaina ai le toatele o e semanu e itiiti ni mea po o le leai foi.
I Aao o le Alii
Ae paga lea, o le aloese mai le fia aai, sa le na o le pau lea o le popolega. Sa pesia nisi o le Au Paia o Aso e Gata Ai i le faama’i. O Simona Kamara o le Paranesi a Teko Road, o le sa na o le tausaga talu ona avea ma tagata o le Ekalesia, sa ia vaai i lona toalua ma lona atalii ua maliliu i le Ebola. Ona aafia ai foi lea ma ia.
“O lo’u ola ua i aao o le Alii,” o lana tala lea a o i ai i le nofoaga autu mo togafitiga. “E pei o soo se tama, ou te manao i le mea sili mo la‘u fanau. Ae o lea ua ou mauaina le talalelei ma malamalama i le fuafuaga o le faaolataga, ua sili atu lo’u faamoemoe mo au lava faapea lo’u aiga tusa lava po o le a le mea e tupu.” E ui i le uluai faailoga o le toe malosi mai, ae na maliu lava Uso Kamara. Ua matua misia e le fanau o loo ola o latou matua, e ui o loo tausia nei e tagata o le au paia ma uo ma o loo manuia.
O Se Vavega Patino
O Sister Haju Julloh o le Paranesi a Waterloo o se tausi soifua. O le tausia o e mamai, sa mafai ona taia o ia e le vairousa. A o faateleina le avega a ma’i, o ofu puipui i le falemai lea sa ia galue ai, o nisi taimi sa lei tataina lelei ma faamama. E lei leva ona ia auai i le Ekalesia i le 2014 o Aokuso, sa suesueina Sister Julloh ma iloa ai ua maua o ia i le Ebola ma sa faaasu o ia i le fale.
“Sa le mafai ona ou alu i le lotu, o lea sa tauvalaau mai ai tagata o le paranesi ma faamalosiau mai ia te au,” o lana tala lea. “O lo’u nofo ai i lo’u potu, sa tonu ia te au e punouai i le suesueina o le Tusi a Mamona. Sa ou faitau e uiga i le tele o aafiaga faaleagaga, e aofia ai ni vavega na tutupu i tagata le taualoa pei o a‘u. Sa ou manao i se vavega, ae sa ou le iloa pe tatau ona ou ole atu ai. Sa ou faitau pea ma talanoa i uo i luga o le telefoni e uiga i mea sa ou faitauina. Ina ua mavae ni vaiaso i le fale, sa toe suesueina a’u mo le vairousa ma sa aumai tali ua leai se mea. Sa ou toe nofo e faaasu mo se isi vaiaso ona toe suesue ai lea o a’u. O le tali foi, sa leai se mea. O lea na faatagaina ai au e tuua lo‘u aiga ma alu i le lotu faapea foi ma le toe foi i le galuega. O se vavega lena ia te au.”
Faanatinatiina o le Galuega
I taimi mafatia, pe tatau ea ona faaauau le galuega faafaifeautalai? E i ai se tu masani a le Au Paia i Sierra Leone. E faaauau pea ona latou faasoa atu le talalelei e tusa lava po o le a se mea e tupu.
“Nai lo le faamatala o o tatou le fiafia ma tumau ai pea i le limulimua, sa fautuaina i matou e faapotopoto le Au Paia e ala i le valaauina o faifeautalai faale-paranesi e sui ai faifeautalai faamisiona,” sa faamatala mai ai Peresitene Bai Seasy o le Itu a Kossoh Town. “Sa leai se taimi matou te faavauvau ai mo i matou lava; sa i ai le galuega o le faaolataga e fai. Sa matou faia ni soa a faifeautalai ua uma mai misiona, ma i latou ua tatau ona faamisiona ma faatulagaina i latou i ni sone.”
“Sa faatagaina taitai misiona taitasi o paranesi e fai se kata telefoni mo faamoemoega o le talaiga. E tatau ona latou tali atu mo lona faaaogaina, na fesoasoani i faifeautalai o paranesi e fesootai ai ma tagata sailiili fou ma tagata fou faatoa liliu mai, ma o le faatumauina o le fesootai na tele se eseesega sa i ai,” o le tala lea a Brian Robbn-Taylor, o se tasi fesoasoani faapitoa i le peresitene o le misiona.
“Sa faia a matou ’lesona i telefoni’ ma tagata sailiili ma tagata fou ua liliu mai,” sa ia faaauau ai. “E faaopoopo atu na i lesona faalevaiaso a faifeautalai e faia i le lotu. Sa matou fetuunai i manaoga o tagata o le au paia ma tagata sailiili ia semanu e leai se fesootaiga, ona o le faasa sa tulai mai ona ole faaasu, po o le popole i maua i le faama’i.”
I le taimi nei o papatisoga liliu mai i Sierra Leone e na o sina maualalo teisi lava nai lo le mea sa i ai a o i ai faifeautalai faamisiona, e toatele tagata ua le toaaga ua toe malolosi mai, ma o loo tumau pea le tuputupu ae o le Ekalesia.
Mafuaaga Tele Mo Le Faamoemoe
I le taimi o le faamai, ua sili atu ma le 60 pasene le leai o ni galuega. Ua le mafai ona la’u i le maketi fua o faatoaga ona o faasa talu ai le tulaga o le faaasu. E toatele e pele na faaumatia. E mautinoa lava e tele isi mau luitau o i luma mo Sierra Leone.
Ae peitai, e ui lava i nei luitau, o loo faamaoni pea le Au Paia ma olaola le Ekalesia. E pei ona saunoa Mariatu Browne, “Ua tatou iloa e silafia lelei i tatou e le Tama Faalelagi. Ma a faatasi le Alii ma outou, e lagolagoina outou e le Ekalesia, ma outou galulue soosoo tauau, e i ai le mafuaaga tele o le faamoemoe. O ni Au Paia i Sierra Leone, e le tuua lava na o i matou.”