O La Tatou Avanoa

O Lo Tatou Faamoemoega i le Lalolagi

I le taimi o le masina o le tulaga faatauaina o aoaoga a la‘u aoga, sa fai mai lo matou faiaoga e tusia se tala ua faaulutalaina “Aisea ua ou i ai iinei?” E tatau ona avea o se tala e 10-parakalafa i le autu o lo tatou faamoemoega i le olaga. A o ou faitau i le autu i luga o le laupapa, sa faatumulia lo‘u loto i le mafanafana ma le fiafia. O se tasi o le Ekalesia, sa ou iloaina o lo‘u faamoemoega i le avea ai ma se afafine o le Atua mo le tele o tausaga. Ae a o ou tilotilo atu i isi tamaiti o la‘u vasega, sa faatumulia lo’u loto i le faanoanoa. Aisea? Aua sa amata ona latou muimui ona o le faigata o le autu. Latou te le‘i maua le malamalama lea e tasi na ia te au.

Ina ua ou liliu atu i la‘u tala, sa ou iloaina lo’u faamanuiaina i le avea ai o se tasi o le Ekalesia moni e tasi. Mai lava i lena aso, na faamalosia ai lo‘u naunau e auauna atu i se misiona, ma faasoa atu lau molimau o le talalelei a Iesu Keriso.

Ou te iloa e alofa le Tama Faalelagi ia te au ma e finagalo ia ou faatasi ma Ia i se aso. Sa ou iloaina foi o lo’u faamoemoega o le auauna atu lea i isi.

Jaymee A., Filipaina

E Faapefea ona Fesoasoani le Tusi a Mamona ia te Au

E musuia i tatou e le Tusi a Mamona i soo se taimi tatou te manaomia ai tali i fesili po o le taimi foi tatou te manaomia ai le latalata atili atu i le Agaga o le Alii. O loo i ai valoaga ia na maua e i latou sa filifilia e le Tama ona sa latou faamaoni ma amiotonu. Mai i lenei tusi tatou te maua ai le poto atili e uiga i le talalelei, ma ua mafai ai ona tatou vaai o le Alii lava lea e tasi i taimi uma.

E fesoasoani le Tusi a Mamona i le taimi nei, aua o tagata i taimi ua mavae, sa feagai ma faigata atonu e tutusa ma faigata o loo tatou feagai nei, mai faafitauli faaleaiga e oo atu i faatosinaga mai isi tagata. O a latou faataitaiga tatou te maua ai le malosiaga ma le manao e fetaomi atu i luma i le faatuatua ma le amiotonu e aunoa ma le faavaivai. E faapei o i tatou, sa ui mai foi tagata anamua i tofotofoga eseese ae na latou manumalo ma sa le mafai e le fili ona faatoilaloina i latou. Ua tatou maua ai se manaoga e tele atu ia tumau malolosi ma le le faamaluelueina i le talalelei a Iesu Keriso.

Caroline M., São Paulo, Pasila

Auauna atu i Mea e Poloaiina Ai i Tatou

A o lei faapaiaina le Malumalu o San Salvador El Salvador, sa tonu ia te au ma lo’u aiga e auauna atu i se faletatala ma fesoasoani ia i latou e le o ni tagata o le ekalesia ia masani i le talalelei a Iesu Keriso a o latou asiasi atu i le malumalu. Sa tofia au e avea o se taiala ma talanoa ma tagata e uiga i potu taitasi i le malumalu, o feagaiga paia tatou te faia ai, ma pe faapefea ona suia o tatou olaga pe a tatou tausia na feagaiga.

Na oo mai la‘u sifi, ma sa amata ona ave la’u malaga maimoa. Sa ou faatoa alu ese mai le potu ae talosaga mai se tagata mo se taiala faaopoopo talu ai ua faatoa taunuu atu se vaega toatele. Sa ta’u mai ia te au ou te toe foi i le potu e faafeiloai ai ua i ai se isi vaega ua tofia i ai au.

Ina ua ou taunuu atu i le potu, na toe talosagaina au e suia lo‘u tofiga e faaali se ata vitio i tagata o e na faatoa taunuu atu i le malumalu. Sa ou lagona le faanoanoa ona sa le mafai ona ou talanoa i tagata ma ta’u atu ia i latou e uiga i le malumalu.

O le afa itula mulimuli ane, na taunuu ai se vaega mai le Iunaite Setete e le iloa faa-Sipaniolo. Sa taufetuliai solo volenitia e sue se tasi e tautala faa-Peretania e mafai ona taialaina lenei vaega. O iina na ou malamalama ai e auina i tatou e le Alii i le mea Na te manaomia ai i tatou, ae le o le mea tatou te mananao ai. Sa na o au le tagata e iloa faaaoga le vitio ma tuu atu upu faafeiloai i le gagana Peretania. Sa fiafia le au Amerika ina ua latou tuua, sa latou faafetai mai ia te au mo le talileleia o i latou.

I le faaiuga o le aso, sa ou lagona le faafetai i le Alii ona o le faasino mai ia te au o lena mea, a tatou faia mea i le ala Na te uunaia ai i tatou, o le a faamalieina i tatou i la tatou galuega.

Erick A., El Salvador