O le a le uiga o le mataupu faavae lona valu o le faatuatua pe a fai mai, “Matou te talitonu o le Tusi Paia o le afioga ia a le Atua e tusa ma mea ua tonu ona faaliliuina”?

E le faatauvaa le Tusi Paia i isi tusitusiga paia. Na saunoa ia Elder M. Russell Ballard o le Korama a Aposetolo e Toasefululua, “Tatou te talitonu, ava, ma alolofa i le Tusi Paia. E i ai a tatou tusitusiga paia faaopoopo, … ae e lagolagoina ai Le Tusi Paia, e le suitulagaina lava” (“O Le Vavega o le Tusi Paia,” Liahona, Me 2007, 81).

Fai mai ai le mataupu faavae lona valu o le faatuatua, “Matou te talitonu o le Tusi Paia o le afioga ia a le Atua e tusa ma mea ua tonu ona faaliliuina.” I le taimi o Iosefa Samita, o le upu faaliliu e lei faapea e na o le aumaia o se mea mai se tasi gagana i se isi; o le isi foi uiga o le sii atu, faaali atu ai le, faaliliu, po o le faamatalaina. Ma e ui lava o loo alia’e mai mea sese i alofilima eseese mai le uluai faa-Eperu ma le faa-Eleni, o le faafitauli tele i le tilivaina mai o anotusi anamua i le taimi nei, “tele o mea manino ma pele [ua] aveese mai” (1 Nifae 13:28). O lea la, a o faasalalauina mai ia i tatou ia anotusi o le Tusi Paia, na leiloloa ni aoaoga patino. O se tasi lena o mafuaaga o le tele o faaliliuga eseese o le Tusi Paia, e pei ona oo i ai Iosefa Samita (tagai i le o Iosefa Samita—Talafaasolopito 1:12). O lea la o se tasi auala ua fesoasoani ai faaaliga i ona po nei e faamanino ma faamautu upumoni i le Tusi Paia o le toefuatai mai lea o isi upumoni ia sa leiloloa (tagai 1 Nifae 13:39–40).