2015
Mga Importanting Panghitabo sa Ika-185 nga Tunga sa Tuig nga Kinatibuk-ang Komperensya sa Ang Simbahan ni Jesukristo sa mga Santos sa Ulahing mga Adlaw
Nobyembre 2015

Mga Importanting Panghitabo sa Ika-185 nga Tunga sa Tuig nga Kinatibuk-ang Komperensya sa Ang Simbahan ni Jesukristo sa mga Santos sa Ulahing mga Adlaw

“Kamo mga anak sa atong Langitnong Amahan,” miingon si Presidente Thomas S. Monson sa Dominggo sa buntag nga sesyon sa kinatibuk-ang komperensya. “Gikan kamo sa Iyang presensya aron magpuyo niini nga yuta sa usa ka panahon, aron sa pagpamalandong sa gugma ug mga pagtulun-an sa Manluluwas, ug maisugong modan-ag sa inyong kahayag aron ang tanan makakita. Kon kana nga panahon dinhi sa yuta mahuman na, kon nabuhat na ninyo ang inyong bahin, mainyo ang mahimayaong panalangin sa pagpuyo og balik uban Kaniya sa kahangturan” (pahina 88).

Kining kinatibuk-ang komperensya gipahibalo ang bag-o nga pagkamatay ni Presidente Boyd K. Packer ug Elder L. Tom Perry ug Richard G. Scott sa Korum sa Napulog Duha ka mga Apostoles. Ang mga miyembro sa Simbahan mipaluyo og tulo ka bag-ong mga miyembro sa korum: Elders Ronald A. Rasband, Gary E. Stevenson, ug Dale G. Renlund.

Laing importanting mga bahin:

  • Mga pakigpulong ni Elder M. Russell Ballard, David A. Bednar ug D. Todd Christofferson sa Korum sa Napulog Duha ka mga Apostoles nga gipasabut og maayo kon ngano nga ang Ginoo mitukod sa Iyang Simbahan, uban sa mga propeta ug mga apostoles isip pundasyon niini, sa pagbuhat sa Iyang buhat ug kita makagahum sa pagbalik ngadto Kaniya (tan-awa sa mga pahina 24, 128 ug 108).

  • Ang mga pakigpulong ni Presidente Russell M. Nelson ug ni Elder Jeffrey R. Holland sa Korum sa Napulog Duha ka mga Apostoles mipasabut sa mahinungdanon nga tahas sa mga babaye. Si Presidente Nelson misulat: “Ang gingharian sa Dios dili kompleto ug dili mahimong makompleto kon wala ang mga babaye kinsa naghimo og sagradong mga pakigsaad ug dayon sundon kini, mga babaye nga makasulti uban sa gahum ug awtoridad sa Dios!” (pahina 96).

  • Si Elder Dallin H. Oaks sa Korum sa Napulog Duha ka mga Apostoles mimatuod nga “ang atong Manluluwas nakasinati ug nag-antus sa tanang hagit sa kinabuhi. … Ug tungod niini, ang Iyang Pag-ula nakahatag Kaniya og gahum sa pagtabang kanato—sa paghatag kanato sa kalig-on aron makalahutay niining tanan” (mga pahina 61–62).