Bishop Gérald Caussé

Presiding Bishop

Si Gérald Caussé nag-establisar pa sa iyang panginabuhi sa industriya sa distribusyon sa pagkaon didto sa France sa edad nga 33 sa dihang gipatawag siya sa presidente sa iyang kompaniya. Nakamatikod siya sa espiritwal nga konbiksyon ni Gérald ug sa iyang abilidad sa paghimo og maayong desisyon ug sa paghiusa sa mga empleyado—mga kinaiya nga napalambo pinaagi sa pagkaaktibo, pagserbisyo, ug pagpangulo sa Simbahan. Gitapos sa presidente pinaagi sa pag-ingon nga Gérald usa ka tawo nga iyang kasaligan.

Sa iyang katingala, si Gérald sa wala madugay gihatagan sa responsibilidad sa pagdumala sa 1,800 ka mga empleyado. Sa dihang gitawag siya nga moserbisyo isip usa ka General Authority Seventy usa ka dekada ang milabay, niadtong Abril 2008, nagdumala siya og pipila ka mga kompaniya sa distribusyon sa pagkaon.

Ang mga kahanas ni Bishop Caussé sa negosyo ug sa pagdumala, inubanan sa iyang eklesyastikanhong pagserbisyo ug kasinatian sa pagpangulo, nakatabang kaniya isip bag-ong Presiding Bishop sa Simbahan. Si Bishop Caussé, kinsa nagserbisyo isip Unang Magtatambag sa Presiding Bishopric sukad niadtong Marso 2012, nakadawat sa iyang bag-ong calling pipila lamang ka adlaw human sa kinatibuk-ang komperensya sa Oktubre. Iyang gipulihan si Elder Gary E. Stevenson, kinsa gipaluyohan ngadto sa Korum sa Napulog Duha ka mga Apostoles niadtong Oktubre 3, 2015.

Si Bishop Gérald Jean Caussé, ang ika-15 nga Presiding Bishop sa Simbahan, natawo sa Bordeaux, France, niadtong 1963. Naminyo siya ni Valérie Babin niadtong 1986, sa Bern Switzerland Temple. Sila dunay lima ka mga anak ug lima ka mga apo.

Agig dugang sa iyang kasinatian sa Presiding Bishopric ug isip sakop sa Seventy, nakaserbisyo siya isip magtatambag sa Europe Area Presidency ug isip Area Seventy, presidente sa stake, magtatambag sa presidente sa stake, magtatambag sa bishop, high priests group leader, ug presidente sa elders quorum.

Sa batan-on pa, si Bishop Caussé nakakita og kalipay ingon man usab sa hugot nga pagtuo pinaagi sa iyang pagserbisyo sa Simbahan. Nagserbisyo siya isip pianist sa Primary sa edad nga 12 ug isip presidente sa Sunday School sa edad nga 16. Na-busy usab siya sa mga katungdanan sa Aaronic Priesthood.

“Ang pagserbisyo sa Simbahan,” lakip ang pag-abag sa iyang amahan sa iyang katungdanan isip bishop ug branch president, “nakatabang kanako nga makaangkon og akong pagpamatuod,” miingon siya.