Elder Gary E. Stevenson

Korum sa Napulog Duha ka mga Apostoles

Samtang namalandong siya sa iyang tawag ngadto sa Korum sa Napulog Duha ka mga Apostoles, si Elder Gary E. Stevenson sa katapusan miingon nga ang iyang serbisyo diha sa gingharian sa Ginoo ug ilabi na isip usa ka Apostol kasagaran mahitungod sa paggiya pinaagi sa pagserbisyo imbis nga pagserbisyo pinaagi sa paggiya.

“Si Jesukristo mikonsiderar sa Iyang kaugalingon nga usa ka sulugoon,” matud pa ni Elder Stevenson atol sa usa ka press conference human siya gipaluyohan. “Ato usab nga ikonsiderar ang atong kaugalingon nga mga sulugoon” (tan-awa sa Marcos 10:44).

Ang tawag ni Elder Stevenson ngadto sa Korum sa Napulog Duha ka mga Apostoles miabut sa wala damha. Hinoon, siya mibati, nga ang iyang pagserbisyo sa Simbahan—ilabi na isip usa ka General Authority Seventy sugod 2008 hangtud 2012 ug isip Presiding Bishop sukad niadtong Marso 2012—nakatabang sa pag-andam kaniya alang sa iyang bag-ong mga responsibilidad.

Usa sa labing importante nga mga butang nga iyang nakat-unan sa pagserbisyo sa Ginoo mao ang dako nga bili sa mga anak sa Langitnong Amahan. Si Elder Stevenson nagpaabut sa dugang nga mga oportunidad nga moabut kaniya isip usa ka Apostol ug sa pagpamatuod ngadto sa mga anak sa Dios sa tibuok kalibutan.

Nagpaabut usab siya sa padayong pakig-uban niadtong kinsa nangulo sa Simbahan sa Ginoo. “Ang paghunahuna nga maglingkod diha sa council ug makakat-on gikan [kanila], nga [ilang] matudloan, ug mobati sa ilang kalig-on ug sa ilang pagpamatuod kabahin ni Jesukristo ug sa Iyang Pag-ula,” miingon siya, “usa ka butang nga akong gituohan nga usa ka maanindot nga kasinatian.”

Si Gary E. Stevenson natawo niadtong Agosto 6, 1955, ngadto nila ni Evan N. ug Vera Jean Stevenson. Iyang gisubay ang kagikanan sa iyang pamilya ngadto sa unang mga pioneer nga mga Santos sa Ulahing mga Adlaw sa Utah. Nagdako siya sa Cache Valley sa amihanang Utah sa panimalay nga nakasentro sa ebanghelyo diin nakakat-on siya sa bili sa pagtrabaho og maayo ug sa kaimportante sa pagserbisyo. Ang iyang amahan, “ang bishop sa akong kabatan-on,” kasagaran midapit kaniya nga mokuyog sa pagbisita sa daghang mga biyuda nga nagpuyo sa ilang ward. Ang mga leksyon nga nakat-unan sa batan-ong si Gary gikan sa iyang amahan mahitungod sa Kristohanong pag-atiman ug pagserbisyo nagbilin og dili makalimtan nga impresyon ngadto kaniya nga nakatabang kaayo niya isip Presiding Bishop.

“Ang mga bishop sa Simbahan,” siya miingon, “mao gayud ang akong mga bayani.”

Ang pagserbisyo ni Elder Stevenson sa Simbahan nagsugod sa kahinangop sa dihang siya gitawag isip usa ka full-time nga misyonaryo ngadto sa Japan Fukuoka Mission, diin siya nakapalambo og malungtarong gugma alang sa mga Hapon ug sa ilang pinulongan, diin siya larino gihapong moistorya og Hinapon. Human sa iyang misyon mieskwela siya sa Utah State University, diin iyang gikahimamat si Lesa Jean Higley. Naminyo sila sa Idaho Falls Idaho Temple niadtong 1979 ug mga ginikanan sila sa upat ka anak nga lalaki. Si Elder Stevenson nakaangkon og degree sa business administration, nga nakatutok sa marketing. Sa wala madugay kauban siyang mitukod ug miserbisyo isip presidente ug chief operating officer sa usa sa nag-unang tighimo ug tigbaligya sa ekipo nga pang-ehersisyo.

Ang pamilya Stevenson nagpuyo sa Japan sulod sa pipila ka tuig. Niadtong 2004 si Elder Stevenson gitawag isip presidente sa Japan Nagoya Mission. Human sa iyang tawag ngadto sa Seventy niadtong 2008, miserbisyo siya isip magtatambag ug presidente sa Asia North Area. Nagserbisyo siya isip Presidente sa Area niadtong 2011 sa dihang usa ka kusog nga linog ang miigo sa duol nga baybayon sa amihanang Japan, nga miresulta sa dako kaayong tsunami nga mipatay sa liboan. Kana nga kasinatian nakapausab gayud sa iyang kinabuhi.

Si Elder Stevenson mitabang sa pamaagi sa pagtubag sa Simbahan, nga nakahatag og pagkaon, mga suplay, suporta, ug tabang nga mas motagal og dugay.

“Usa kadto ka pagpakita sa buhat sa Simbahan ni Jesukristo sa usa sa balaanong gitakda nga mga responsibilidad niini sa pag-atiman sa mga kabus ug timawa,” siya nahinumdom. Miingon siya nga usa kadto ka sagrado nga pribilehiyo sa “pag-alagad, ug pagpanalangin, ug pag-organisar og tabang.”