Elder L. Whitney Clayton

Senior President sa Seventy

Sa batan-on nga pangidaron, si Elder L. Whitney Clayton nakakat-on sa paghigugma sa trabaho ug sa pamilya. Sayo sa matag Sabado, ang iyang amahan, nga usa ka doktor, mobiya aron atimanon ang medikal nga mga katungdanan. Sa dili pa siya mobiya, isulat niya sa pisara ang lista sa tanang buluhaton nga himoon nianang adlawa. Inigbalik niya moapil siya sa iyang anak nga mga lalaki ug magtrabaho kauban nila. Gikan sa iyang amahan, nakat-unan ni Elder Clayton ang kinaiya sa pagtrabaho nga nakapanalangin sa iyang kinabuhi.

Ang pamilya ni Elder Clayton nasayud usab nga ang panihapon nagpasabut nga panahon sa pamilya. “Naghisgot mi mahitungod sa politika, unsay nanghitabo sa eskwelahan, sa kasilinganan, sa ebanghelyo, ug sa Simbahan. … Usa kadto ka talagsaon nga sangkap sa pagtubo.” Ang pagbaton og mga panaghisgutan sa tingkaon maoy usa ka naandang buhaton nga gisunod niya ug sa iyang asawa uban sa kaugalingon nilang mga anak.

Gitawag si Elder Clayton nga Senior President sa Seventy niadtong Oktubre 6, 2015. Gipulihan niya si Elder Ronald A. Rasband, kinsa gitawag ngadto sa Korum sa Napulog Duha ka mga Apostoles.

Si Elder Clayton gipaluyohan isip General Authority Seventy niadtong Marso 31, 2001. Nakaserbisyo siya isip sakop sa Kapangulohan sa Seventy sukad niadtong 2008 ug dunay responsibilidad sa pag-supervise sa mga dapit sa Utah. Gitabangan niya si Elder David A. Bednar sa Korum sa Napulog Duha ka mga Apostoles sa pag-supervise sa Africa Southeast ug Africa West Area. Nagserbisyo usab siya isip sakop sa Public Affairs Committee. Nakaserbisyo siya isip magtatambag sa South America South Area Presidency niadtong 2002–2003 ug isip presidente niadtong 2003–2006.

Natawo sa Siyudad sa Salt Lake, Utah, USA, niadtong 1950, naminyo siya ni Kathy Ann Kipp niadtong 1973 sa Salt Lake Temple. Mga ginikanan sila sa 7 ka mga anak ug apuhan sa 20 ka mga apo.

Si Elder Clayton nakaangkon og bachelor’s degree sa finance sa University of Utah ug law degree sa University of the Pacific. Usa siya ka abogado sa California, USA, gikan sa 1981 hangtud 2001.

Nakaserbisyo siya isip Area Seventy, regional representative, magtatambag sa presidente sa misyon, high councilor, bishop, presidente sa stake mission, ug magtutudlo sa Doktrina sa Ebanghelyo. Nakaserbisyo siya isip full-time nga misyonaryo didto sa Peru gikan niadtong 1970 hangtud 1971.