Brian K. Ashton

Ikaduhang Magtatambag sa Kinatibuk-ang Kapangulohan sa Sunday School

Si Brother Brian K. Ashton gitawag nga moserbisyo sa kinatibuk-ang kapangulohan sa Sunday School sa dihang hapit na siya mahuman sa iyang pagserbisyo isip presidente sa Texas Houston South Mission. Ang calling gipahibalo niadtong Hunyo, ug siya gipaluyohan atol sa kinatibuk-ang komperensya sa Oktubre 2015.

Si Brother Tad R. Callister nagpadayon isip kinatibuk-ang presidente, ug si Brother Devin G. Durrant, kinsa nagserbisyo isip ikaduhang magtatambag sukad niadtong Abril 2014, nahimong unang magtatambag.

Ang bakante nga pwesto sa kapangulohan nahitabo tungod sa pagkatudlo ni John S. Tanner nga moserbisyo isip presidente sa Brigham Young University–Hawaii.

Si Brian Kent Ashton natawo sa Provo, Utah, USA, niadtong 1969 ngadto nila ni Kent ug Vicki Brown Ashton. Siya ang kinamagulangan sa siyam ka mga anak. Nakahinumdom siya sa iyang mga ginikanan nga mao kanunay ang mga magtutudlo sa ebanghelyo diha sa panimalay.

Si Brother Ashton nakaserbisyo og full-time nga misyon sa Peru Lima South Mission. Ang iyang desisyon nga moserbisyo naimpluwensyahan sa usa ka buotan nga higala kinsa mibati nga giaghat sa pagsulti kaniya nga kinahanglan siya nga magmisyon. Samtang ang iyang higala mipahayag sa iyang mga pagbati, si Brian mibati sa panghimatuod sa Espiritu. Sa iyang misyon nanlimbasug siya sa pipila ka mga hagit sa panglawas sa dihang gitawag siya nga moserbisyo isip presidente sa usa ka dako nga branch. Nianang higayuna, kinasingkasing ug padayon siya nga nag-ampo sa Langitnong Amahan alang sa panabang. “Nakakat-on ko nga mosalig Kaniya, ug mitabang Siya kanako,” miingon siya. “Ang pagkat-on nga mosalig Kaniya maoy nakahimo sa dakong kalainan.”

Human sa iyang misyon mieskwela siya sa Brigham Young University, diin nahimamat niya ang iyang umaabut nga asawa, si Melinda Earl. Hinoon, sa wala pa sila naminyo, miserbisyo siya sa Spain Malaga Mission samtang si Brother Ashton nagtrabaho sa midwestern sa Estados Unidos. Human sa iyang misyon naminyo sila sa St. George Utah Temple. Sila dunay pito ka mga anak.

Si Brother Ashton nakadawat og master’s degree sa business administration gikan sa Harvard University, samtang si Sister Ashton mieskwela sa pagka-doktor. Si Brother Ashton usa ka negosyante ug nagtukod og pipila ka mga kompanya.

Si Brother Ashton nagserbisyo kaniadto isip usa ka bishop, high councilor, presidente sa elders quorum, ug magtutudlo sa Doktrina sa Ebanghelyo.