Paghimo sa Komperensya nga Kabahin sa Atong Kinabuhi

Hunahunaa ang paggamit sa pipila niini nga mga kalihokan ug mga pangutana isip sinugdanan sa panaghisgutan o personal nga pagpamalandong.

Para sa mga Bata

Pahina 86: Si Presidente Thomas S. Monson mihangyo nato sa pagkahimong maayong ehemplo pinaagi sa pagsunod ni Jesukristo. Kon Siya atong sundon, mahimo kitang mga suga sa kalibutan. Unsaon ninyo nga mahimong ehemplo ngadto sa inyong pamilya ug mga higala? Mahimo ninyong sugdan pinaagi sa paghimo og tumong nga mohimo mo og usa ka butang aron mas mahisama ni Jesus.
Pahina 104: Si Presidente Henry B. Eyring, Unang Magtatambag sa Unang Kapangulohan, misugilon bahin sa iyang amahan nga nangita sa simbahan usa ka Dominggo samtang mibisita siya sa Australia. Samtang nangita siya, nag-ampo siya sa matag abut niya og interseksyon aron masayud kon asa nga direksyon siya moadto. Wala madugay nakadungog siya og mga nanganta ug nahibalo nga ang Espiritu Santo mitabang nga matultulan niya ang padulngan. Hunahunaa ang usa ka panahon dihang mibati mo sa Espiritu Santo. Unsay gibati ninyo tungod niini?
Pahina 6: Si Sister Rosemary M. Wixom, kinatibuk-ang presidente sa Primary, mipakigbahin og usa ka istorya bahin sa usa ka batang babaye nga si Amy. Nag-ampo si Amy aron masayud kon ang Dios tinuod bang nahigugma niya ug anaa ba ang Dios alang niya. Basaha o isugilon og usab kini nga istorya nganha sa tibuok pamilya ug hisguti ang panahon dihang mibati mo sa gugma sa Dios. Unsay inyong gibati nga masayud nga kamo anak sa Dios? Unsaon ninyo sa pagtabang ang uban nga masayud nga sila mga anak sa Dios?
Pahina 121: Si Elder Allen D. Haynie sa Seventy misugilon bahin sa usa ka higayon dihang siya ug ang iyang duha ka magulang nga lalaki mikalot og dakong lungag nga gihimo nilang swimming pool. Ang mga bata nagkalapok og maayo sa pagdula niini. Ang lola ni Elder Haynie wala mopasulod kaniya sa balay hangtud nahugasan siya ug nalimpyo. Diha sa iyang istorya unsa ang gikatudlo niini mahitungod sa Pag-ula ni Jesukristo? Nganong importante nga magmahimong limpyo sa atubangan sa Dios?

Para sa mga Kabatan-onan

Pahina 83: Si Presidente Thomas S. Monson miingon nga ang mga sugo sa Dios dili babag apan mga giya kini alang sa kalipay. “Siya nga naglalang kanato ug nahigugma kanato sa hingpit,” siya miingon, “nasayud kon sa unsang paagiha kita magpakabuhi aron maangkon ang labing dakong kalipay kutob sa mahimo.” Sulayi ang mga pulong ni Presidente Monson, ug sunda ang mga sugo sa Ginoo. Ayaw katingala kon makadawat mo og balaan nga tabang ug proteksyon.
Pahina 6: Kon itandi nato ang atong kaugalingon ngadto sa uban, masagmuyo lamang kita. Si Sister Rosemary M. Wixom, kinatibuk-ang presidente sa Primary, miingon, “Nahibaloan nato ang atong kabililhon gikan [sa Ginoo] sa kahitas-an, dili gikan sa kalibutan o sa Facebook o Instagram.” Isulat sa inyong journal karong semanaha ang mahitungod sa inyong diosnong kinaiya ug mga panalangin nga moabut gumikan niana nga kahibalo.
Pahina 20: Si Presidente Dieter F. Uchtdorf, Ikaduhang Magtatambag sa Unang Kapangulohan, miingon, “Kon kamo naghunahuna nga ang ebanghelyo wala kaayo makahatag og benepisyo kaninyo, ako modapit kaninyo sa pag-atras, pagtan-aw sa inyong kinabuhi gikan sa mas taas nga ang-ang, ug ipasayon ang inyong pamaagi ngadto sa pagkadisipulo. Pag-focus sa sukaranang mga doktrina, mga baruganan, ug sa paggamit sa ebanghelyo.” Kon gibati ninyo ang kaluya ug kabug-at, paghunahuna og mga paagi nga kamo makahimong sayon sa inyong kinabuhi ug sa pagtahud sa ebanghelyo.
Pahina 65: Si Elder Neil L. Andersen sa Korum sa Napulog Duha ka mga Apostoles misugilon bahin sa usa ka batan-ong lalaki kinsa nangandoy nga makaserbisyo og misyon apan nakahibalo nga kinahanglan siyang moatiman sa iyang pamilya. Pinaagi sa hugot nga pagtuo ug mga panalangin gikan sa Ginoo, ang batan-ong lalaki nakamisyon ra sa katapusan. Sa unsang paagi nga kita mahimong sama niya ug makapadayon uban sa hugot nga pagtuo bisan pa sa mga babag diha sa atong agianan?
Pahina 33: Si Elder Larry R. Lawrence sa Seventy misugilon bahin sa usa ka returned missionary kinsa nakigbisog tungod sa iyang daghan nga obligasyon hangtud nga nakahukom siya nga ihalad ang Dominggo pinaagi sa pag-alagad sa Dios ug sa pagtuon sa ebanghelyo. “Kining gamay nga pag-adjust naghatag og kalinaw ug balanse nga iyang gipangita,” miingon si Elder Lawrence. Unsa ang inyong mahimo aron mas mapahinungod ang Dominggo ngadto sa Ginoo?

Para sa mga Hamtong

Pahina 86: Si Presidente Thomas S. Monson mipahinumdom nato sa pagkahimong ehemplo ug kahayag sa kalibutan. “Sa atong pagsunod sa ehemplo sa Manluluwas ug magpuyo sama sa Iyang pagpuyo ug sa Iyang pagtudlo,” miingon si Presidente Monson, “kana nga kahayag mosanag diha sa atong kaugalingon ug modan-ag sa dalan alang sa uban.” Unsa nga mga butang ang inyong mabuhat aron mahimong mas dakong kahayag nga “modan-ag sa nagkangitngit nga kalibutan”?
Sila si Presidente Russell M. Nelson, Presidente sa Korum sa Napulog Duha ka mga Apostoles, ug si Elder Jeffrey R. Holland sa Korum sa Napulog Duha ka mga Apostoles namulong bahin sa importansya sa mga babaye ug sa pagkainahan. Mitudlo si Elder Holland, “Walay gugma sa mortalidad nga mas susama kaduol sa tiunay nga gugma ni Jesukristo kay sa dili hinakog nga gugma sa usa ka mapahinunguron nga inahan alang sa iyang anak” (pahina 47). Si Presidente Nelson mitudlo nga ang nakabig nga mga babaye kinsa motuman sa ilang mga pakigsaad “mopatigbabaw sa nagkabati nga kalibutan” (pahina 95). Pamalandungi sa mainampuong paagi kini nga mga pakigpulong ug hisguti sa unsang paagi ang mga sakop sa pamilya makasuporta sa kababayen-an diha sa importante nilang hinatag sa Dios nga mga tahas.
Daghang mamumulong ang naghisgot bahin sa kalig-on sa paglatas sa kalisdanan. Si Elder Hugo Montoya sa Seventy mitudlo nga ang mga pagsulay ug mga tintasyon moabut ngadto sa tanan, “apan maghatag usab nato kini og kalig-on ug kalamboan kon molampus kita sa pagbuntog niini” (pahina 53). Basaha ang iyang pakigpulong ug ang mga pakigpulong nila ni Elder James B. Martino sa Seventy (pahina 58); ni Elder Koichi Aoyagi, emeritus nga sakop sa Seventy (pahina 126); ug Neill F. Marriott, Ikaduhang Magtatambag sa kinatibuk-ang kapangulohan sa Young Women (pahina 30). Paghunahuna og mga paagi nga inyong mapalig-on ang inyong pagtuo kang Jesukristo ug unsaon nga Siya makatabang ninyo sa paglatas sa kalisdanan.
Pahina 33: Sa iyang pakigpulong, si Elder Larry R. Lawrence sa Seventy mitudlo, “Ang Espiritu padayon sa paghagit nato sa pagkahimong mas maayo ug magpadayon. … Kon kita mapaubsanon ug matudloan, Iya kitang agakon ug giyahan nga makapauli.” Human ninyo mabasa ang iyang pakigpulong, tinguhaa ang giya sa Espiritu alang sa mga paagi nga kamo molambo ug mag-usab.
Pahina 104: Si Presidente Henry B. Eyring, Unang Magtatambag sa Unang Kapangulohan, mitudlo nga “ang kanunay nga pagbaton sa Espiritu uban kanato mao ang makabaton sa giya ug direksyon sa Espiritu Santo sa atong inadlaw nga mga kinabuhi.” Hunahunaa ang mga butang nga inyong buhaton o dili na buhaton aron sa kanunay makabaton sa Espiritu uban kaninyo.