Ang Akong Kasingkasing Namalandong Kanila sa Kanunay
Ni Devin G. Durrant
Unang Magtatambag sa Kinatibuk-ang Kapangulohan sa Sunday School
Kinasingkasing kong mag-ampo nga kamo mopili sa pagpamalandong sa mga pulong sa Dios sa dugay ug lawom nga paagi.
Sa propesyon, usa ko ka investor. Sa relihiyon, usa ko ka disipulo ni Jesukristo, ang Anak sa Dios.1 Sa akong pagnegosyo, nagsunod ko sa epektibong pinansyal nga mga baruganan. Samtang nagsunod ko sa akong tinuohan, naningkamot ko sa pagsunod sa espirituhanong mga baruganan nga makatabang kanako nga mas mahisama sa Manluluwas.
Ang mga Pagdapit Makahatag og mga Panalangin
Daghang personal nga mga ganti nga akong nadawat sa kinabuhi miabut isip resulta sa pagdapit sa usa ka tawo kanako sa pagbuhat og lisud nga buluhaton. Niana nga diwa, mohatag ko kaninyo og duha ka mga pagdapit. Ang una adunay implikasyon sa pinansyal. Sa ikaduhang pagdapit, espiritwal ang implikasyon. Kining duha ka mga pagdapit, kon dawaton, magkinahanglan og disiplinado nga paningkamot sa taud-taud nga panahon aron makaani sa mga ganti.
Ang Unang Pagdapit
Ang unang pagdapit yano ra: Dapiton ko kamo sa pagtigum og kwarta matag semana. Ang kantidad nga inyong tigumon dili kaayo importante; depende ra kana kaninyo. Samtang inyong batasanon ang pagtigom, makabenepisyo kamo sa personal nga paagi. Ug kamo makaangkon usab og mga oportunidad sa pagtabang sa uban sa pinansyal nga paagi isip resulta sa inyong pagkugi. Hunahunaa ang positibong resulta sa pagtigum og kwarta kada semana sulod sa unom ka bulan, usa ka tuig, 10 ka tuig, o labaw pa. Ang gagmay nga mga paningkamot nga palungtaron makamugna og dagkong mga resulta.2
Ang Ikaduha nga Pagdapit
Ang akong ikaduhang pagdapit lahi ug mas importante kay sa una. Mao ni: Dapiton ko kamo sa “pag-ponderize”3 og usa ka bersikulo sa kasulatan matag semana. Ang pulong ponderize dili makita sa diksyonaryo, apan kini anaa sa akong kasingkasing. Unsa man ang buot ipasabut sa ponderize? Gusto kong moingon nga kini kombinasyon sa 80 porsyento nga pagpamalandong ug 20 porsyento nga pagsag-ulo.
Adunay duha ka yanong mga lakang:
Una, pagpili og usa ka bersikulo sa kasulatan matag semana ug ibutang kini diin inyo kining makita kada adlaw.
Ikaduha, basaha o hunahunaa ang bersikulo sa pipila ka higayon matag adlaw ug pamalandong sa kahulugan sa mga pulong niini sa tibuok semana.
Hunahunaa ang makapabayaw nga resulta sa paghimo niini kada semana sulod sa unom ka bulan, usa ka tuig, 10 ka tuig, o labaw pa.
Samtang maningkamot kamo niini, kamo mobati og dugang nga pagka-espirituhanon. Kamo usab makatudlo ug makabayaw niadtong inyong gimahal sa mas makahuluganon nga mga paagi.
Kon kamo mopili sa pag-ponderize matag semana, mahimong mobati kamo og sama sa tawo nga malingaw kaniadto sa snorkeling apan karon gustong mosulay og scuba diving. Uban niana nga desisyon, ang mas lawom nga pagsabut sa mga baruganan sa ebanghelyo inyong maangkon ug ang bag-ong espirituhanong panglantaw mopanalangin sa inyong kinabuhi.
Samtang maghunahuna kamo sa inyong gipili nga bersikulo matag semana, ang mga pulong mapatik sa inyong kasingkasing.4 Ang mga pulong mapatik usab sa inyong hunahuna. Sa laing pagkasulti, ang pagsag-ulo mahimong sayon ug natural. Apan ang nag-unang tumong sa pag-ponderize mao ang paghatag og usa ka makapabayaw nga dapit alang sa inyong hunahuna—usa ka dapit nga magpaduol kaninyo sa Espiritu sa Ginoo.
Ang Manluluwas miingon, “Mahala sa kanunay diha sa inyong mga hunahuna ang mga pulong sa kinabuhi.”5 Ang pag-ponderize usa ka yano ug makalig-ong paagi sa pagbuhat niana.”
Nagtuo ko nga si Nephi usa ka tig-ponderize. Siya miingon, “Ang akong kalag nalipay sa mga kasulatan, ug ang akong kasingkasing namalandong kanila [sa kanunay], ug nagsulat kanila alang sa kasayuran ug kaayohan sa akong mga anak.”6 Naghunahuna siya sa iyang mga anak samtang siya namalandong ug misulat sa mga kasulatan. Sa unsang paagi makabenepisyo ang inyong pamilya samtang kamo kanunay nga maningkamot sa pagpamalandong sa mga pulong sa Dios?
Akong bersikulo
Bag-o lang kong nag-ponderized Alma 5:16. Kini mabasa, “Ako moingon nganha kaninyo, kamo makahanduraw ba sa inyong mga kaugalingon nga inyong mabati ang tingog sa Ginoo, mag-ingon nganha kaninyo, nianang adlawa: Duol ngari kanako kamo nga mga bulahan, kay tan-awa, ang inyong mga buhat mao ang mga buhat sa pagkamatarung diha sa ibabaw sa yuta?”
Sa katapusan sa semana, mao kini ang napatik sa akong hunahuna: Hunahunaa nga nakadungog sa tingog sa Ginoo nga nag-ingon, “Duol ngari kanako kamo nga mga bulahan, kay tan-awa, ang inyong mga buhat mao ang buhat sa pagkamatarung” (Alma 5:16).
Sama sa inyong nakita, wala nako sag-uloha ang matag pulong sa tibuok bersikulo. Hinoon, namalandong ko sa makadaghan sa importanting mga elemento sa bersikulo ug kon asa kini pangitaa. Apan ang labing maayong bahin sa proseso mao nga mas nindot ang sulod sa akong hunahuna. Sa tibuok semana akong gihunahuna ang Manluluwas nga nagsulti og makadasig nga mga pulong kanako. Kana nga imahe mitandog sa akong kasingkasing ug nagdasig kanako nga mobuhat og “mga buhat sa pagkamatarung.” Mao kana ang mahitabo kon kita “maghunahuna [ni [Kristo] sa matag hunahuna.”7
Kinahanglan Kitang Makigbatok
Tingali mangutana mo, “Nganong buhaton ko man kini?” Motubag ko nga kita nagpuyo sa panahon nga nagkadaghan ang kadautan. Dili kita angay nga modawat lang sa sitwasyon karon ug maminaw sa bati nga mga pulong ug ngil-ad nga mga imahe bisan asa kita molingi ug wala lay buhaton. Kinahanglan kitang makigbatok. Kon ang atong mga hunahuna mapuno sa makapabayaw nga mga hunahuna ug mga hulagway, kon kita “sa kanunay mohinumdom kaniya,”8 wala nay mahibilin nga luna alang sa mga law-ay ug basura.
Sa Basahon ni Mormon, si Jesukristo midapit sa tanan nga “pamalandonga kini nga mga butang nga [Siya] miingon.”9 Tan-awa ang pag-ponderize isip dugang sa inyong personal ug pamilya nga pagtuon sa kasulatan, apan ayaw kini himoa nga puli. Ang pag-ponderize susama sa pagdugang og bag-ong bitamina sa inyong espirituhanong kalan-on karon.
Lisud Kaayo Kini
Tingali moingon mo, “Ang pag-ponderize mora og lisud kaayo alang kanako.” Ayaw kabalaka. Ang lisud mahimong maayo. Si Kristo nagdapit kanato sa pagbuhat og daghang lisud nga mga butang tungod kay Siya nasayud nga kita mapanalanginan isip resulta sa atong mga paningkamot.10
Usa ka batan-on namong silingan nakakita og yanong paagi sa pag-ponderize. Iyang gihimong home screen sa iyang celphone ang iyang sinemana nga kasulatan. Laing ideya nga mahimo ninyong sulayan mao ang pagpakigbahin sa inyong bersikulo ngadto sa usa ka igsoon, anak o higala. Ang akong asawa, si Julie, ug ako nagtabang sa usag usa. Mopili mi sa among mga bersikulo matag Dominggo. Iyang ibutang ang iyaha diha sa among refrigerator. Akong ibutang ang akoa sa akong truck. Mopakigbahin dayon kami og mga hunahuna kabahin sa among mga bersikulo sa tibuok semana. Ganahan usab kami nga maghisgut sa among mga bersikulo uban sa among mga anak. Samtang amo kining buhaton, mora og mas nakomportable sila sa pagpakigbahin sa ilang mga hunahuna uban kanamo mahitungod sa pulong sa Dios.
Si Julie ug ako kabahin usab sa usa ka online nga grupo diin ang mga sakop sa pamilya, mga higala ug mga misyonaryo makapaambit sa ilang kasulatan matag semana ug usahay molakip og usa ka konektado nga hunahuna o pagpamatuod. Ang pag-apil og usa ka grupo makapasayon sa pagkahimong makanunayon. Ang akong high school nga anak nga babaye ug usa ka grupo sa iyang mga higala naggamit sa social media ug pakig-text aron mopakigbahin sa mga kasulatan sa usag usa.
Palihug ayaw pagpanuko sa paglakip sa mga tawo sa ubang tinuohan diha sa inyong mga grupo. Nangita usab sila og mga paagi sa pagbayaw sa ilang mga hunahuna ug mobati nga mas duol ngadto sa Dios.
Unsa Man ang mga Benepisyo?
Nan, unsa man ang mga benepisyo? Si Julie ug ako nag-ponderize og usa ka bersikulo matag semana sa sobra na sa tulo ka tuig karon. Sa sinugdanan, naghimo kami og 20 ka tuig nga tumong. Bag-ohay lang siyang misulti kanako: “Sa una nimong pagdapit kanako sa pag-ponderize og usa ka kasulatan matag semana sulod sa 20 ka tuig naghunahuna ko kon makahimo ba ko niini sulod sa usa ka bulan. Wala na akoy mga pagduha-duha pa. Dili ko makatuo kon unsa kalingaw nga mobutang og usa ka kasulatan diha sa refrigerator matag semana ug pinaagi lang sa pag-ponderize niini matag higayon nga makita ko kini, mobayaw kini sa akong espiritu.”
Human sa pag-ponderize sulod sa unom ka semana, ang usa ka sister gikan sa Texas miingon: “Ang akong pagpamatuod nalig-on, … ug ako mibati nga mas duol sa akong Langitnong Amahan. … Ganahan ko sa paagi nga ang pulong sa Dios nag-usab kanako ngadto sa pagka-mas maayo.”
Usa ka tin-edyer nga higala misulat: “Nalingaw gyud ko nga makahimo sa [pag-ponderize] tungod kay nakatabang ni nako sa pag-tutok sa mga butang nga tinud-anay nga importante.”
Usa sa atong mga misyonaryo mipakigbahin niini: “Nag-ponderize ko og usa ka bersikulo matag semana sukad pa sa Hunyo 2014, ug ganahan ko niini. … Kini nga mga kasulatan nahimong sama sa mga higala nga akong masaligan sa panahon sa panginahanglan.”
Sa akoa, mas hingpit nako nga nabati ang Espiritu samtang nag-ponderize ko kada semana. Ang akong gugma sa mga kasulatan nadugangan usab isip resulta sa pagpaningkamot nga “himo[on] ang hiyas nga modayan-dayan sa [akong] mga hunahuna nga walay hunong.”11
Ikonsiderar kini nga pagdapit ug dakong panalangin nga gipakigbahin ni Nephi: “Kon kamo mopadayon sa unahan, magbusog sa pulong ni Kristo,ug molahutay hangtud sa katapusan, tan-awa, sa ingon miingon ang Amahan: Kamo makabaton og kinabuhing dayon.”12 Diha sa diwa sa “[pag]busog sa pulong ni Kristo,” ang pag-ponderize daw sama sa pag-ingkit og lamian nga pagkaon ug dayon hinayon kini sa pag-usap aron hingpit kini nga matagamtam.
Unsay Inyong Bersikulo?
Mag-ponderize ba kamo og usa ka bersikulo sa kasulatan matag semana sulod niining tibuok bulan? sulod niining tibuok tuig? Tingali mas dugay pa? Si Julie ug ako midapit sa tanan namong lig-on nga mga misyonaryo sa Texas Dallas sa pag-ponderize uban kanamo sulod sa 20 ka tuig. Magdungan mi og human niini sa 17 ka mugbong mga tuig. Dayon maghimo na usab kami og bag-ong tumong sa pagbayaw sa among mga hunahuna ug nga mas mapaduol kami ngadto ni Kristo.
Mahimo kamong mosusi kanamo pinaagi sa pagpangutana, “Unsay inyong bersikulo?” Apan kon inyong buhaton, pangandam sa pagpakigbahin sa inyong kasulatan agi og balos. Ang matag usa kanato mabayaw isip resulta sa atong pagbinayloanay.
Inyo bang mahunahuna ko sa unsang paagi ang inyong kinabuhi ug ang kinabuhi sa inyong pamilya mausab kon mosulat kamo og usa ka bag-ong bersikulo sa kasulatan sa inyong kasingkasing ug hunahuna matag semana sa mosunod nga pipila ka bulan o pipila ka tuig o mas dugay pa?
Si Jesukristo Mao ang Atong Ehemplo.
Si Jesukristo siguradong nakapalambo og gugma alang sa kasulatan sa bata pa nga edad. Siya siguro nagbasa ug namalandong sa mga kasulatan sa bata pa aron makahimo og makahuluganong panaghisgut uban sa maalamong mga lider didto sa templo sa edad nga 12.13 He began his mission at age 30,14 and He referenced the scriptures early and often throughout His ministry.15 Can we not safely say that Jesus spent at least 20 years studying and pondering the scriptures as part of His mission preparation? Aduna bay butang nga kinahanglan ninyong buhaton karon aron maandam kamo sa espirituhanong paagi alang sa umaabut nga mga oportunidad sa pagtudlo ug pagpanalangin sa inyong pamilya ug sa uban?
Gamita ang Inyong Hugot nga Pagtuo ug Buhata Kini
Sa pagribyu, ako manghinaut nga makahukom kamo sa pagtigum og kwarta matag semana. Gamita ang inyong hugot nga pagtuo, disiplinaha ang inyong kaugalingon, ug buhata kini Ako usab kinasingkasing nga mag-ampo nga kamo mopili sa pagpamalandong sa mga pulong sa Dios sa dugay ug lawom nga paagi matag semana. Gamita ang inyong hugot nga pagtuo, disiplinaha ang inyong kaugalingon, ug buhata kini
Dili sama sa akong unang pagdapit sa pagtigum og kwarta, ang mga kaayohan sa akong ikaduha nga pagdapit sa pagluwas sa kalag mainyo sa kahangturan—gawasnon gikan sa tangkob ug taya niini nga kalibutan.16
Si Elder D. Todd Christofferson mitanyag niining klaro nga tambag ug saad: “… Tun-i ang mga kasulatan sa mabinantayon, tinuyo nga paagi. Pamalandong ug pag-ampo bahin niini. Ang mga kasulatan mga pagpadayag, ug kini modala og dugang pagpadayag.”17
Panapos
Mosaad ko nga dili kamo magmahay sa pagsulat og usa ka bersikulo sa kasulatan sa inyong hunahuna ug kasingkasing matag semana. Makasinati kamo og pagbati sa makanunayong espirituhanong katuyoan, panalipod, ug gahum.
Hinumdumi ang mga pulong ni Jesukristo sa dihang Siya miingon, “Buhata ang mga butang diin kamo nakakita kanako nga mibuhat.”18 Hinaut nga kita hingpit nga mogamit sa Iyang mga pulong sa atong mga kinabuhi, maoy akong pag-ampo sa pangalan ni Jesukristo, amen.