Ang Priesthood Restoration Site Gipahinungod

Niadtong Septyembre 19, 2015, si Presidente Russell M. Nelson, Presidente sa Korum sa Napulog Duha ka mga Apostoles, nangulo sa pagpahinungod sa site didto sa Pennsylvania, USA, diin si Joseph Smith ug Oliver Cowdery nakadawat sa Aaronic Priesthood gikan ni Juan Bautista. Niadtong mga 1820 ang dapit nailhan nga Harmony, Pennsylvania, ug daghang panghitabo sa sayong kasaysayan sa gipahiuli nga Simbahan nahitabo didto:

• Ang panagtagbo nila ni Joseph Smith ug Emma Hale, ang ilang panaghigugmaay, ug ang ilang kinabuhi sa bag-o pang minyo.

• Ang pag-abut ni Oliver Cowdery aron sa pagtabang isip tigsulat [scribe] sa paghubad sa Basahon ni Mormon.

• Ang paghubad sa kadaghanang bahin sa Basahon ni Mormon.

• Ang pagpahiuli sa Aaronic Priesthood ug (bisan kon ang tukmang lokasyon wala mahibaloi) sa Melchizedek Priesthood.

• Ang unang mga bunyag nga gipahigayon pinaagi sa awtoridad sa priesthood sa modernong panahon.

• Mga pinadayag nga nadawat nga nahimong 15 ka seksyon diha sa Doktrina ug mga Pakigsaad ug usa ka bahin sa Perlas nga Labing Bililhon.

Ang bag-ong giayo nga site naglakip sa usa ka visitors’ center, nga gihimo usab nga meetinghouse alang sa usa ka lokal nga branch; ang gitukod og usab nga balay nila ni Joseph ug Emma ug sa mga ginikanan ni Emma, nga sila si Isaac ug Elizabeth Hale; ug agianan ngadto sa dapit sa Suba sa Susquehanna nga gituohan nga maoy dapit diin si Joseph ug Oliver gibunyagan.

“Ang Harmony naghatag ni Joseph sa espirituhanong dapit sa kalinaw ug proteksyon, nagtugot niya nga maka-focus sa paghubad sa Basahon ni Mormon,” miingon si Presidente Nelson. “Pinaagi niini nga panahon, ang Ginoo mitudlo si Joseph sa iyang balaang tahas isip propeta, manalagna ug tigpadayag.”

Si Presidente Russell M. Nelson ug ang iyang asawa, si Wendy, nag-tour sa replica sa panimalay ni Joseph ug Emma Smith, diin kadaghanan sa Basahon ni Mormon gihubad.