Ang mga Bata Nag-ingon, “Kita ang Iyang mga Kamot”

Ang mga bata sa tibuok kalibutan madasigong mitubag sa kampanya [campaign] sa pagserbisyo nga gisugdan pinaagi sa mga magasin sa Simbahan. Ang mga magasin midapit sa mga bata sa pagpangita og mga paagi sa pagserbisyo, dayon sa pag-trace sa ilang mga kamot sa usa ka piraso nga papel, sa pagsulat sa ilang gibuhat nga pagserbisyo diha sa marka sa kamot [handprint], ug sa pagpadala niini ngadto sa Liahona.

Ang mga magasin nakadawat og kapin sa 30,000 ka mga marka sa kamot gikan sa mga bata kinsa mitabang sa pagpakigbahin sa gugma sa Manluluwas, mipanalangin sa mga pamilya ug sa mga kasilinganan sa tibuok kalibutan.

Ang inspirasyon alang sa kampanya miabut gikan sa Abril 2010 nga pakigpulong sa kinatibuk-ang komperensya ni Presidente Dieter F. Uchtdorf, Ikaduhang Magtatambag sa Unang Kapangulohan, nga giulohan og “Kamo Ang Akong mga Kamot.” Si Presidente Uchtdorf misaysay sa istorya bahin sa estatuwa ni Jesukristo nga nadaut sa Ikaduhang Gubat sa Kalibutan. Kay dili makahimo sa pag-ilis sa mga kamot sa estatuwa sa dihang giayo kini, ang mga lumulupyo midugang niini nga mga pulong diha sa ubos: “Kamo ang akong mga kamot.”

Ang mga buhat sa pagserbisyo sa mga bata ingon ka talagsaon sa mga marka sa kamot nga ilang gisumiter. Sama pananglit:

Si Natalie S., nag-edad og 5, nga gikan sa Hong Kong mipadala og duha ka mga marka sa kamot. Ang usa nag-ingon, “Mitabang ko ni mama sa trabahoon sa balay,” ug ang lain, “Mitabang ko sa pagtulod sa usa ka tawo nga nag-wheelchair.”

Si Erik S., nag-edad og 11, nga gikan sa Russia mipasabut, “Sa siyudad diin ko nagpuyo, dunay bugnaw nga winter.” Usa ka pamilya ang mibalhin ngadto sa iyang lungsod, ug wala silay baga nga sinina. “Akong gihatag ang akong coat ngadto ni Artur,” miingon si Erik, “ug nahimo nako siyang higala.”

Ang diyes anyos nga si Gabriela P. gikan sa Venezuela misulat diha sa marka sa iyang kamot: “Sa akong eskwelahan, ang akong mga higala ug ako anaa sa klase sa chess. Nangita ko og kauban nga ikadula sa dihang akong nakita ang usa ka bag-ong lalaki kinsa mora og magul-anon. Ganahan ko nga motabang apan wala ko masayud kon sa unsang paagi. Dayon usa ka tingog ang miingon nako nga gikinahanglan lamang nga mahimo ko niya nga higala. Miduol ko ug nakig-istorya niya. Karon kami ang labing suod nga higala.”

Ang mga marka sa kamot gi-display sa punoang buhatan sa Simbahan sa Siyudad sa Salt Lake, Utah, USA, sulod sa duha ka semana sa Septyembre ug Oktubre.