Ang Espiritu Santo isip Inyong Kauban

Ni Presidente Henry B. Eyring

Unang Magtatambag sa Unang Kapangulohan

Maangkon nato kana, kon kita magpuyo nga takus niini, maangkon nato ang panalangin sa Espiritu nga magauban kanato, dili lamang matag karon unya apan sa kanunay.

Mga kaigsoonan, Mapasalamaton ko nga makauban kamo niining adlaw nga Igpapahulay sa kinatibuk-ang komperensya sa Simbahan sa Ginoo. Akong gibati, ang sama sa inyong gibati, ang Espiritu, ang Espiritu Santo, nga nagpamatuod sa katinuod sa mga pulong nga atong nadungog nga gipamulong ug giawit.

Ang akong tuyo karon mao ang pagpalambo sa inyong tinguha ug sa inyong determinasyon sa pag-angkon sa gasa nga gisaad sa matag usa kanato human kita bunyagi. Panahon sa atong kumpirmasyon atong nadungog kini nga mga pulong: “Dawata ang Espiritu Santo.”¹ Sukad niana nga higayon, ang atong mga kinabuhi nausab sa kahangturan.

Maangkon nato kana, kon kita magpuyo nga takus niini, maangkon nato ang panalangin sa Espiritu nga magauban kanato, dili lamang matag karon ug unya, sama sa talagsaon natong nasinati karon, apan sa kanunay. Nasayud kamo gikan sa mga pulong sa pag-ampo sa sakrament unsang paagi kana nga saad matuman: “O Dios, ang Amahan sa Kahangturan, kami mangayo kanimo pinaagi sa ngalan sa imong Anak, nga si Jesukristo, sa pagpanalangin ug pagbalaan niining pan ngadto sa mga kalag sa tanan niadto kinsa moambit niini, nga sila unta mokaon agi og handumanan sa lawas sa imong Anak, ug mosaksi nganha kanimo, O Dios, ang Amahan sa Kahangturan, nga sila andam sa pagdala nganha kanila sa ngalan sa imong Anak, ug sa kanunay mohinumdom kaniya ug maghupot sa iyang mga sugo diin siya mihatag kanila.”

Ug dayon miabut ang mahimayaong saad: “Nga sila unta sa kanunay makabaton sa iyang Espiritu uban kanila” (D&P 20:77; emphasis gidugang).

Ang kanunay nga pagbaton sa Espiritu uban kanato mao ang makabaton sa giya ug direksyon sa Espiritu Santo sa atong inadlaw nga mga kinabuhi. Kita, sama pananglit, mapasidan-an pinaagi sa Espiritu aron mabatukan ang tintasyon sa pagbuhat og dautan.

Niana lamang nga rason, sayon rang makita nganong ang mga sulugoon sa Ginoo naningkamot nga madugangan ang atong tinguha sa pagsimba sa Dios sa atong mga miting sa sakrament. Kon kita moambit sa sakrament uban sa hugot nga pagtuo, ang Espiritu Santo makapanalipod nato ug niadtong atong gihigugma gikan sa mga tintasyon nga moabut nga nagkakusog ug nagkadaghan.

Ang pakig-uban sa Espiritu Santo naghimo sa maayo nga mas madanihon ug makapaminus sa kusog nga tintasyon. Kini igo na nga rason aron maningkamot kita nga mahimong takus aron ang Espiritu magauban kanato sa kanunay.

Sama nga ang Espiritu naglig-on kanato batok sa dautan, Siya usab naghatag nato sa gahum sa pag-ila tali sa kamatuoran gikan sa mga bakak. Ang kamatuoran nga labing mahinungdanon mamatud-an lamang pinaagi sa pagpadayag gikan sa Dios. Ang atong tawhanong pangatarungan ug ang paggamit sa atong pisikal nga pamalatian [senses] dili gayud igo. Kita nagpuyo sa panahon nga bisan ang makinaadmanon maglisud sa pag-ila sa kamatuoran gikan sa inantigo nga pagpanglingla.

Ang Ginoo mitudlo sa Iyang Apostol nga si Tomas, kinsa gusto og pisikal nga ebidensya sa Pagkabanhaw sa Manluluwas pinaagi sa paghikap sa Iyang mga samad, nga ang pagpadayag mas luwas nga ebidensya: “Ug si Jesus miingon kaniya, Mituo ba ikaw tungod kay nakita mo ako? Dalaygon kadtong wala managpakakita, ngani nanagpanuo” (Juan 20:29).

Ang mga kamatuoran nga nagtimaan sa dalan pabalik sa Dios mapamatud-an pinaagi sa Espiritu Santo. Dili mahimong moadto ta sa kakahoyan ug makita ang Amahan ug Anak nga namulong ngadto sa batan-ong Joseph Smith. Walay pisikal nga ebidensya o bisan unsang makatarunganong argumento nga makaestablisar nga si Elijah mianhi sumala sa gisaad aron sa pagtugyan sa mga yawe sa priesthood nga gihuptan karon ug gigamit sa usa ka buhi nga propeta.

Ang kumpirmasyon sa kamatuoran moabut ngadto sa usa ka anak sa Dios kinsa nakaangkon sa katungod nga makadawat sa Espiritu Santo. Tungod kay ang mga bakak mahimong ipresentar kanato bisan kanus-a, kita nagkinahanglan og kanunay nga impluwensya sa Espiritu sa Kamatuoran aron wala kitay mga higayon sa pagduha-duha.

Samtang usa ka sakop sa Korum sa Napulog Duha ka mga Apostoles, si George Q. Cannon nag-awhag nga padayunon nato ang pagtinguha sa Espiritu nga magauban kanato. Siya misaad, ug ako usab mosaad niini, nga kon ato kining buhaton, kita “dili gayud magkulang sa kahibalo” sa kamatuoran, “dili gayud magduhaduha o anaa sa kangitngit,” ug ang atong “hugot nga pagtuo lig-on, [atong] kalipay … hingpit.”²

Kita nagkinahanglan nianang makanunayong tabang gikan sa pagpakig-uban sa Espiritu Santo alang sa lain pa nga rason. Ang kamatayon sa usa ka minahal mahimong moabut nga wala damha. Ang pagsaksi sa Espiritu Santo mahitungod sa reyalidad sa mahigugmaong Langitnong Amahan ug sa nabanhaw nga Manluluwas maoy maghatag nato og paglaum ug kahupayan sa pagkawala sa usa ka minahal. Kana nga pagpamatuod kinahanglang anaa kanato kon dunay mamatay.

Mao nga, alang sa daghang mga rason, gikinahanglan nato ang kanunay nga pakig-uban sa Espiritu Santo. Kita nagtinguha niini, apan nasayud kita gikan sa kasinatian nga dili sayon ang pagmentinar niini. Matag usa nato makahunahuna, makasulti, ug makabuhat og mga butang sa atong inadlaw nga pagpakabuhi nga makapasilo sa Espiritu. Ang Ginoo mitudlo nato nga ang Espiritu Santo makauban nato sa kanunay kon ang atong mga kasingkasing puno sa gugma nga putli ug kon ang hiyas modayan-dayan sa atong hunahuna nga walay paghunong” (tan-awa sa D&P 121:45).

Alang niadtong naglisud sa taas nga sumbanan nga gikinahanglan aron mahimong sarang sa gasa sa pagpakig-uban sa Espiritu, motanyag ko niini nga awhag. Aduna na kamoy mga panahon nga gibati ninyo ang impluwensya sa Espiritu Santo. Mahimong nahitabo kini ninyo karon.

Makonsiderar ninyo kadtong mga higayuna sa inspirasyon nga sama sa binhi sa hugot nga pagtuo nga gihulagway ni Alma (tan-awa sa Alma 32:28). Itanom ang matag usa. Mabuhat ninyo kana pinaagi sa paglihok sa mga pag-aghat nga inyong gibati. Ang pinakabililhong inspirasyon mao nga kamo mahibalo sa unsay gustong ipabuhat kaninyo sa Dios. Kon pabayaron mo og ikapulo o pabisitahon og nagsubo nga higala, kinahanglang buhaton ninyo kini. Bisan unsa pa man, buhata kini. Kon inyong gipakita ang inyong kaandam sa pagsunod, ang Espiritu mopadala ninyo og dugang nga mga pag-aghat kon unsay ipabuhat sa Dios kaninyo.

Kon mosunod kamo, ang mga pag-aghat sa Espiritu mas kanunayng moabut, mas magkaduol ngadto sa kanunay nga pagpakig-uban. Ang inyong gahum sa pagpili sa matarung molambo.

Mahimo ninyong masayran kon kadto nga mga pag-aghat sa paglihok nga alang Kaniya gikan ba sa Espiritu o gikan ba sa inyong kaugalingong mga tinguha. Kon ang mga pag-aghat nagsubay sa mga gipanulti sa Manluluwas ug sa Iyang buhi nga mga propeta ug mga apostoles, makapili kamo sa pagsunod uban sa pagsalig. Dayon ang Ginoo mopadala sa Iyang Espiritu sa pagtabang kaninyo.

Sama pananglit, kon kamo makadawat og espirituhanong pag-aghat sa pagtahud sa Adlawng igpapahulay, ilabi na kon kini daw malisud, ang Dios mopadala sa Iyang Espiritu aron sa pagtabang.

Kana nga tabang miabut sa akong amahan mga tuig ang milabay dihang ang iyang trabaho midala kaniya ngadto sa Australia. Nag-inusara siya usa ka Dominggo, ug gusto siyang moambit sa sakrament. Wala siya makakita og impormasyon mahitungod sa mga miting sa mga Santos sa Ulahing mga Adlaw. Mao nga nagsugod siya sa paglakaw. Siya nag-ampo sa matag interseksyon aron masayud asa moagi. Human sa paglakaw ug pagliko-liko sulod sa usa ka oras, mihunong siya aron mag-ampo pag-usab. Mibati siya og pag-aghat nga mosulod sa usa ka pihong dalan. Sa wala madugay nakadungog siya og pagpanganta gikan sa unang andana sa usa ka apartment sa duol. Milili siya sa bintana ug nakakita og pipila ka tawo nga naglingkod duol sa lamesa nga adunay puti nga panapton ug mga tray sa sakrament.

Karon, daw wala ra kaayo ni ninyo, apan kini usa ka talagsaong butang ngadto kaniya. Nasayud siya nga ang saad sa pag-ampo sa sakrament natuman: “Sa kanunay mohinumdom kaniya ug maghupot sa iyang mga sugo diin siya mihatag kanila, nga sila unta sa kanunay makabaton sa iyang Espiritu uban kanila” (D&P 20:77).

Kadto usa lamang ka ehemplo sa usa ka higayon dihang siya nag-ampo ug dayon mihimo sa unsay gisulti sa Espiritu kaniya nga gusto sa Dios nga iyang buhaton. Siya nagpadayon niini sulod sa katuigan, sama sa atong buhaton. Wala gayud siya maghisgot sa iyang pagka-espirituhanon. Nagpadayon lamang siya sa pagbuhat sa gagmayng mga butang alang sa Ginoo diin siya giaghat sa pagbuhat.

Sa higayon nga dunay grupo sa mga Santos sa Ulahing mga Adlaw nga mohangyo nga mamulong siya ngadto kanila, iya kining buhaton. Dili igsapayan kon 10 ra ka mga tawo o 50 o unsa siya kakapoy. Mihatag siya sa iyang pagpamatuod sa Amahan, sa Anak, sa Espiritu Santo, ug sa mga propeta sa matag higayon nga ang Espiritu miaghat niya sa pagbuhat niini.

Ang iyang labing taas nga calling sa Simbahan mao ang sa Bonneville Stake high council, diin siya nangibut og sagbut sa umahan sa stake, ug siya mitudlo og klase sa Sunday School. Sulod sa katuigan, kon magkinahanglan siya, ang Espiritu Santo anaa isip iyang kauban.

Nagbarug ko tapad sa akong amahan sa usa ka lawak sa ospital. Ang akong inahan, iyang asawa sa 41 ka tuig, naghigda sa kama. Nagtan-aw mi kaniya sulod sa daghang oras. Among nakita nga anam-anam nga nawala ang mga timaan sa kasakit gikan sa iyang nawong. Ang mga tudlo sa iyang mga kamot, nga hugot ang pagkumo, nanglugak. Ang iyang mga bukton mipundo diha sa iyang kiliran.

Ang mga kasakit sa kanser sa daghang katuigan hapit na matapos. Akong nakita sa iyang nawong ang panagway sa kalinaw. Mihangos siya og kadali, dayon miutnga, ug dayon wala na molihok. Nagbarug kami nga naghulat kon duna pa bay laing pagginhawa.

Sa katapusan, si Papa hinay nga miingon, “Ang gamay nga batang babaye mipauli na.”

Wala siya mohilak. Kana tungod kay ang Espiritu Santo dugay nang mihatag kaniya og klaro nga hulagway kon kinsa siya, diin siya gikan, unsay iyang nakab-ot, ug kon asa siya padulong. Ang Espiritu mipamatuod kaniya sa daghang mga higayon sa usa ka mahigugmaong Langitnong Amahan, sa usa ka Manluluwas kinsa mibuntog sa kamatayon, ug sa katinuod sa sealing sa templo nga ilang giambitan ug sa pamilya.

Ang Espiritu dugay nang misiguro kaniya nga ang kabuotan ug hugot nga pagtuo sa iyang asawa naghimo niyang sarang nga makabalik ngadto sa langitnong panimalay diin siya mahinumduman isip usa ka talagsaong anak sa saad ug maabi-abi uban sa dungog sa iyang pagpauli.

Alang sa akong papa, sobra pa kana sa paglaum. Ang Espiritu Santo mihimo niini nga reyalidad alang kaniya.

Karon, tingali moingon ang uban nga ang iyang mga pulong ug mga hulagway nga diha sa iyang hunahuna mahitungod sa langitnong pinuy-anan mga pangandoy lamang, sa walay klarong panghunahuna sa usa ka bana sa panahon nga siya namatyan. Apan nasayud siya sa mahangturong kamatuoran sa bugtong paagi nga posible ninyong masayran.

Siya usa ka scientist kinsa nangita sa kamatuoran mahitungod sa pisikal nga kalibutan sa kinatibuk-an sa iyang hingkod nga kinabuhi. Maayo niya nga pagkagamit ang mga himan sa siyensya aron mapasidunggan sa iyang mga kaparang sa tibuok kalibutan. Kadaghanan sa iyang nabuhat sa chemistry naggikan sa pagkakita diha sa iyang hunahuna sa mga naglihok nga mga molecule ug dayon gikumpirma ang iyang panan-awon pinaagi sa mga eksperimento sa laboratoryo.

Apan siya misunod og laing dalan sa pagdiskobre sa mga kamatuoran nga labing importante kaniya ug sa matag usa kanato. Pinaagi lamang sa Espiritu Santo nga atong makita ang mga tawo ug mga panghitabo sama sa pagtan-aw sa Dios kanila.

Kana nga gasa nagpadayon sa ospital human nga namatay ang iyang asawa. Among gihipos ang mga butang sa akong inahan aron dad-on sa pag-uli. Si Papa mihunong aron magpasalamat sa matag nurse ug doktor nga among nakasugat sa paggawas padulong sa sakyanan. Nakahinumdom ko nga mibati nga, kinahanglan na ming mobiya aron mag-inusara sa among mga kagul-anan.

Nakaamgo ko karon nga iyang nakita ang mga butang diin ang Espiritu Santo lamang ang makapakita kaniya. Iyang nakita kadtong mga tawo isip mga anghel nga gipadala sa Dios aron sa pagbantay sa iyang pinalangga. Tingali gitan-aw nila ang ilang mga kaugalingon isip mga propesyonal sa panglawas, apan si Papa nagpasalamat kanila alang sa Manluluwas.

Ang impluwensya sa Espiritu Santo nagpadayon uban kaniya sa pag-abut namo sa balay sa akong mga ginikanan. Nag-istorya mi sulod sa pipila ka minuto diha sa sala. Si Papa nananghid nga moadto sa iyang kwarto sa duol.

Human sa pipila ka minuto, mibalik siya sa sala. Nindot ang iyang pahiyom. Miduol siya namo ug hilum nga miingon, “Nabalaka ko nga si Mildred moabut sa kalibutan sa mga espiritu nga mag-inusara. Naghunahuna ko nga basin mobati siya nga dili komportable sa iyang mga kaubanan.”

Dayon malipayon siyang miingon, “Bag-o lang kong nag-ampo. Nasayud ko nga maayo ra si Mildred. Ang akong inahan tua didto nga mosugat kaniya.”

Nakahinumdom ko nga mipahiyom sa iyang pagsulti niana, naghunahuna sa akong lola, ang iyang mugbo nga mga bitiis nga nagdagan, nagdali agi sa pundok sa katawhan aron pagsiguro nga anaa siya didto sa pagsugat ug paggakos sa iyang umagad nga babaye sa iyang pag-abut.

Karon, usa sa mga rason nga nangayo ang akong amahan ug nakadawat niana nga kahupayan mao ang kanunay niya nga pag-ampo uban sa hugot nga pagtuo sukad sa iyang pagkabata. Naanad na siyang makakuha og mga tubag nga miabut sa iyang kasingkasing sa paghatag og kahupayan ug giya. Agig dugang sa pagbaton og kinaiya sa pag-ampo, siya nasayud sa mga kasulatan ug sa mga pulong sa buhing mga propeta. Mao nga iyang nailhan ang pamilyar nga mga hunghong sa Espiritu, nga tingali gibati ninyo karon.

Ang pagpakig-uban sa Espiritu sobra pa kay sa mihupay ug migiya kaniya. Kini miusab kaniya pinaagi sa Pag-ula ni Jesukristo. Kon kita modawat niana nga saad sa pagbaton sa Espiritu uban kanato sa kanunay, ang Manluluwas makahatag kanato sa kaputli nga gikinahanglan alang sa kinabuhing dayon, ang labing mahinungdanon sa tanan nga mga gasa (tan-awa sa D&P 14:7).

Hinumdumi ninyo ang mga pulong sa Manluluwas: “Karon mao kini ang sugo: Paghinulsol, kamong tanan nga mga lumulupyo sa yuta, ug duol ngari kanako ug magpabunyag diha sa akong ngalan, aron kamo mahimo nga pagasantoson pinaagi sa pagdawat sa Espiritu Santo, aron mobarug nga walay lama sa akong atubangan sa katapusan nga adlaw” (3 Nephi 27:20).

Kadto nga mga sugo moabut uban niini nga saad gikan sa Ginoo:

“Ug karon, sa pagkatinuod, sa pagkatinuod, Ako moingon nganha kanimo, itugyan ang imong pagsalig diha niana nga Espiritu nga nagtultol sa pagbuhat og maayo—oo, sa paghimo sa makiangayon, sa paglakaw nga mapainubsanon, sa paghukom nga matinud-anon; ug kini ang akong Espiritu.

Sa pagkatinuod, sa pagkatinuod, Ako moingon nganha kanimo, Ako mohatag nganha kanimo sa akong Espiritu, nga mohatag og kahayag sa imong hunahuna, nga mopuno sa imong kalag uban sa hingpit nga kalipay” (D&P 11:12–13).

Ako mopamatuod kaninyo nga ang Dios nga Amahan buhi, nga ang nabanhaw nga si Jesukristo naggiya sa Iyang Simbahan, nga si Thomas S. Monson naghupot sa tanang yawe sa priesthood, ug nga ang pagpadayag pinaagi sa Espiritu Santo naggiya ug nagsuporta sa Ang Simbahan ni Jesukristo sa mga Santos sa Ulahing mga Adlaw ug sa mapainubsanong mga miyembro niini.

Mopamatuod pa gayud ako nga kining talagsaong mga tawo nga namulong kanato karon isip mga saksi sa Ginoo nga si Jesukristo, isip mga sakop sa Korum sa Napulog Duha ka mga Apostoles, mga tinawag sa Dios. Nahibalo ko nga ang Espiritu migiya ni Presidente Monson sa pagtawag kanila. Ug sa inyong pagpaminaw kanila ug sa ilang mga pagpamatuod, ang Balaang Espiritu mikumpirmar diha ninyo sa isulti nako kaninyo karon. Sila tinawag sa Dios. Gipaluyohan nako sila ug gihigugma sila ug nasayud nga ang Ginoo nahigugma nila ug mopaluyo kanila sa ilang pagserbisyo. Ug ako mohimo niini sa pangalan ni Jesukristo, amen.