Paghatag og Kahupayan sa mga Refugee

Ang LDS Charities, ang humanitarian arm sa Simbahan, nagpadayon sa paghatag og kahupayan sa mga dapit diin ang nagkalain-laing krisis maoy nakaingon nga daghang tawo ang naa sa lisud kaayong mga kahimtang. Ania ang tulo ka mga ehemplo:

• Ang panagsungi sa Ukraine maoy hinungdan nga usa ka milyon ka mga tawo ang namakwit sukad 2014. Saysenta porsyento sa mga namakwit mga tigulang. Ang LDS Charities mitabang sa United Nations Development Program sa pakigtambayayong sa hiniusang paningkamot uban sa lokal nga mga non-governmental organization nga nag-atiman sa mga kabus ug mga tigulang nga namakwit. Ang LDS Charities nakahatag og mga hygiene supply, mga sanitation kit, ug 3 ka bulan nga balor sa pagkaon ngadto sa 37 ka facility nga moserbisyo sa 13,000 ka mga tawo.

• Sukad niadtong Enero, sobra sa 350,000 ka mga refugee nga nagpalayo sa gubat nga sibil didto sa Syria ang nagtinguha nga modangup sa Europe, ang gidaghanon gilauman nga madoble sa katapusan sa tuig. Ang LDS Charities nakigtambabayong sa internasyonal nga mga non-governmental organization, lokal nga mga munisipyo, ug nasudnong mga ahensya sa gobyerno aron matubag ang panginahanglan sa mga refugee ug naghatag og mga kapanguhaan sa lokal nga mga kongregasyon sa Simbahan nga magamit sa ilang mga paningkamot sa pagtabang.

• Aron makahatag og mas maayong kapuy-an diha sa mga refugee camp sa tibuok kalibutan, ang LDS Charities miapil sa usa ka proyekto sa United Nations High Commission for Refugees. Usa ka internasyonal nga tigbaligya og furniture ang midesinyo og estraktura nga mas bintaha kon itandi sa tolda. Ang estraktura naglakip sa mga pultahan ug mga bintana alang sa dugang nga seguridad ug mas lig-on nga atup aron maproteksyunan ang mga namuyo gikan sa dautang elemento. Nagpadayon ang pagtrabaho alang sa 333 ka mga balay nga kapuy-an nga gihatag sa LDS Charities ngadto sa usa ka refugee camp sa Iraqi Kurdistan.