Bishop W. Christopher Waddell

Ikaduhang Magtatambag sa Presiding Bishopric

Isip usa ka atleta sa kolehiyo, si Christopher Waddell nakadawat og scholarship sa volleyball sa San Diego State University sa California, USA. Apan nakat-unan niya nga magpasalamat sa usa ka bishop kinsa nangutana kaniya kabahin sa ubang mga butang kon mauli siya sa balay atol sa bakasyon.

“Wala siya moingon, ‘Kumusta man ang volleyball?’ apan ‘Kumusta man ka? Nag-ampo ka ba, nagpabiling lig-on, nagpabiling aktibo sa Simbahan?’ Nakadayeg gyud ko niadtong mga pangutana [kalabut] … sa mga butang nga labing importante,” nahinumdom si Bishop Waddell.

Ang pag-focus sa unsay labing importante nakatabang ni Bishop Waddell nga masunod ang duha ka motto sa pamilya, “Pauli nga madungganon” ug “Salig sa Ginoo.” Kana nga pagsalig nakapahimo kaniya nga mobiya lang una sa volleyball aron magmisyon. Sa iyang pagbalik gikan sa iyang misyon, kini nga pagsalig maoy nakapadayon sa iyang pakigrelasyon sa usa ka batan-ong babaye sa laing unibersidad bisan og lagyo sila. Sa kaulahian, human sila naminyo, ang pagsalig sa Ginoo nakapahimo kanila sa pagpaminaw sa Espiritu kon maghimo og desisyon kabahin sa pagbalhin.

“Mobuhat mo sa mga butang sa paagi sa Ginoo,” siya miingon, “ug ang mga butang mamaayo ra sa katapusan.”

Ang pagsalig sa Ginoo padayon nga mopanalangin ni Bishop Waddell, kinsa nagserbisyo isip General Authority Seventy sukad niadtong Abril 2011, samtang siya karon nahimong Ikaduhang Magtatambag sa Presiding Bishopric.

Si Wayne Christopher Waddell natawo sa Los Angeles, California, niadtong 1959. Naminyo siya ni Carol Stansel niadtong Hulyo 1984 sa Los Angeles California Temple. Mga ginikanan sila sa upat ka mga anak ug dunay tulo ka mga apo. Nahimo siyang magtatambag sa South America Northwest Area Presidency ug magpabilin sa Peru sa mubo nga panahon.

Si Bishop Waddell nakadawat og bachelor’s degree niadtong 1984 gikan sa San Diego State University. Naghimo usab siya og postgraduate work sa Executive MBA program sa BYU. Sugod niadtong 1984 nagtrabaho siya sa Merrill Lynch, diin nahimo siya nga first vice president of investments.

Si Bishop Waddell nakaserbisyo isip Area Seventy, presidente sa Spain Barcelona Mission (diin kaniadto nagserbisyo siya isip batan-ong full-time nga misyonaryo), presidente sa stake, magtatambag sa kapangulohan sa misyon, bishop, ug isip magtatambag sa bishopric.